KARANTIN QOIDALARIGA RIOYa ETILIShINI TAʼMINLASh BOʻYIChA REYDLAR OʻTKAZILMOQDA

Butun dunyoni tashvishga solayotgan koronavirus infektsiyasi soʻnggi paytlarda turli shtammlar, koʻrinishlarda namoyon boʻlib, insonlar hayotini xavf ostida qoldirishda davom etmoqda. Oʻtgan oylar davomida kasallik tarqalishi yanada avj olib, yuqtirayotganlar soni orta boshladi. Shu sababdan yurtimizda karantin cheklovlari kuchaytirilib, umumiy ovqatlanish muassasalari, kafe va restoranlar, savdo shoxobchalarida xizmat koʻrsatish vaqtlari qisqartirildi. Shuningdek, kontsert va tomoshalar kabi ommaviy tadbirlarni oʻtkazish cheklandi.

2-avgust kuni tuman hududida karantin cheklovlariga amal qilinishi boʻyicha nazoratni taʼminlash maqsadida reyd tadbirlari oʻtkazildi. Ushbu reyd tadbirlarida tuman Ichki ishlar boʻlimi profilaktika inspektorlari va boshqa masʼullari ishtirok etdilar. Tadbir davomida savdo majmualari, oziq-ovqat doʻkonlari kirish qismida niqobda boʻlish, tana haroratini oʻlchash, qoʻllarni antiseptik bilan zararsizlantirish amaliyotiga rioya etilishi, kafe va boshqa umumiy ovqatlanish obʼektlarining belgilangan vaqtlarda, umumiy sigʻimining 50 foizdan ortiq boʻlmagan holatda faoliyat yuritilayotgani nazorat qilindi.

Aytish joizki, shu yil 17-aprel kuni bosh vazir Abdulla Aripov Respublika maxsus komissiyasining kengaytirilgan yigʻilishida Oʻzbekistonda 18-apreldan koronavirus tufayli joriy etilgan karantin cheklovlari kuchaytirilishi haqida maʼlum qilgan edi. Unga koʻra Ichki ishlar, Milliy gvardiya, Sanitariya epidemiologiya xizmati, Mahalla va oilani qoʻllab-quvvatlash boʻlimlari masʼullari tomonidan jamoat joylarida niqob taqish, ijtimoiy masofani saqlash, shaxsiy gigiyena qoidalariga rioya etish, qoʻllarni antiseptik bilan zararsizlantirish tadbirlari nazoratini kuchaytirishi va qoidabuzarlarga nisbatan qatʼiy javobgarlik choralari koʻrilishini, jarimalar solinishini taʼminlashi belgilab qoʻyildi.

Shunga koʻra tuman hududida oʻtkazilgan reyd tadbirlari davomida Mangʻit shahri markazidagi umumiy ovqatlanish joylari, kafe va oziq-ovqat doʻkonlari nazoratdan oʻtkazildi.

Oʻzbekistonda jamoat joylarida niqobsiz yurish 2020-yilning mart oyidan boshlab taʼqiqlangan. Niqobsiz yurganlar jarimaga tortiladi. Maʼmuriy javobgarlik toʻgʻrisidagi kodeksning 54-moddasiga asosan, vakolatli organning maxsus talablariga zid ravishda jamoat joylarida niqobsiz boʻlish bazaviy hisoblash miqdorining besh baravarigacha miqdorda jarima solishga sabab boʻladi.

Joriy yilning 7 oyi davomi tuman hududida 460 fuqarolar karantin qoidalari buzganligi aniqlanib, ularning barchasi jarimaga tortildilar.

Oʻzbekiston Respublikasiga koronavirusning kirib kelishi va tarqalishining oldini olish yuzasidan chora-tadbirlar dasturini tayyorlash boʻyicha respublika maxsus komissiyasining shu yil 17-iyul kungi yigʻilishi bayonining ijrosini taʼminlash maqsadida oʻtkazilgan mazkur reyd tadbirida tumandagi oshxona va kafelarda soat 20:00dan keyin faoliyat yuritib turganlik holati tekshirildi. Tekshirishlar davomida baʼzi kafelar karantin qoidalariga roiya qilmasdan faoliyat yuritib turganligi aniqlanib, chora koʻrish uchun tegishli hujjatlar rasmiylashtirildi. Shuningdek, tadbir davomida karantin cheklovlari va tartib-qoidalariga rioya etish, oʻzaro muloqotda oraliq masofa saqlash, tibbiy niqobda yurish tartibiga amal qilmaslik holatlarining javobgarlikka sabab boʻlishi haqida tushunchalar berildi.

Tumanda koronavirus tarqalishining oldini olish maqsadida profilaktika inspektorlari tomonidan keng turdagi targʻibot va tashviqot ishlari olib borilmoqda. Karantin qoidalariga rioya qilmagan fuqarolarga qattiq choralar koʻrilmoqda. 

Orifjon Qosimov, tuman IIB Huquqbuzarliklar profilaktikasi boʻlinmasi boshligʻi.