УЗУМЧИЛИКНИ РИВОЖЛАНТИРИШГА БАҒИШЛАНГАН ЎҚУВ-ТАРҒИБОТ СЕМИНАР ЎТКАЗИЛДИ
Маълумки, амударёликлар учун боғлар барпо этиш, мавжуд боғларни асраб-авайлаш, меваларнинг энг сара навларини яратиш орқали боғдорчилик маданиятини юксалтириш бобомерос қадриятлар сирасига киради. Шунинг учун ҳам туманимизнинг қайси ҳудудига борманг, серҳосил боғ-роғларга кўзингиз тушади. Айниқса, сўнгги йилларда давлатимиз томонидан соҳага қаратилаётган эътибор туфайли туманимизнинг энг чекка овул ва маҳаллалари ҳудудларида ҳам бири-биридан сўлим боғ-роғлар барпо этилиб, соҳибкор-у боғбонларимиз етиштирган ноз-неъматлар халқимиз дастурхонига тортиқ қилинмоқда.
Жорий йилнинг 7 июль санасида Президентимиз Ш.Мирзиёев раҳбарлигида бўлиб ўтган видеоселектор йиғилишида давлатимиз раҳбари мамлакатимизда узумчиликни ривожлантириш, соҳага янги, замонавий технологияларни кенг жорий этиш орқали узум етиштиришда саноат усулида қайта ишлашни ташкил этиш ҳамда ҳудудларда экотуризмни йўлга қўйиш бўйича соҳа мутахассисларига зарур тавсиялар бериб, юртимизда азалдан узумчилик анъанасини давом эттирибгина қолмай, уни ўз шахсий тажрибалари орқали янада бойитиб, даромад манбаига айлантирган соҳибкор-боғбонлар тажрибасини оммлаштиришни таъкидлаган эдилар. Жорий йил 5 август санасида Аёқчи маҳалласи ҳудудидаги “Оталар чойхонаси”да Президентимиз томонидан илгари сурилган таклиф ва тавсияларни соҳага изчил татбиқ этиш мақсадида, шунингдек Булоқбоши тумани соҳибкор-боғбонлари тажрибасини қўллаган ҳолда узумзорларда сўритоклар қуриш, узум ниҳолларининг сўритоклардаги бағазлар бўйлаб ўсишини таъминлашга бағишланган ўқув-тарғибот семинари ўтказилди.
Ўқув-тарғибот семинари ишида Қорақалпоғистон Республикаси Фермер, деҳқон хўжаликлари ва томорқа ер эгалари Кенгаши раисининг ўринбосари Дуйсенбой Отербаев, Амударё туман Фермер, деҳқон хўжаликлари ва томорқа ер эгалари Кенгаши раиси Илҳом Полвонов, шунингдек тумандаги боғдорчилик ва узумчилик тармоғига эга фермер хўжаликлари боғбонлари, қишлоқ хўжалик корхоналари раҳбарлари иштирок этдилар.
Бўлиб ўтган ўқув-тарғибот семинарида узумчилик бўйича масъул мутахассислар Булоқбоши тумани соҳибкор-боғбонлари тажрибасини туманимиз шароитида қўллаш орқали эришиладиган ютуқлар ва кўзланаётган натижалар ҳақида семинар иштирокчиларига кенг тушунчалар ва маълумотлар бердилар.
Шундан сўнг, ўқув-тарғибот семинари иштирокчиларига Дўрман овул фуқаролар йиғини ҳудудидаги Баҳром Собировнинг томорқа хўжалигида Булоқбоши тажрибасини қўллаган ҳолда сўриток ташкил этиш амалда кўрсатиб берилди. Шу билан бирга, сўритокларда етиштирилган узум меваси оддий усулда етиштирилганидан анча серҳосил бўлиши, мавсум давомида соҳибкор-боғбонлар томонидан узумзорларга агротехник ишлов бериш муддатлари ҳақида батафсил тушунчалар берилди.
Семинарда аҳоли вакиллари ҳам иштирок этишиб, узумчиликни ривожлантириш, узум меваларини қиш ойларида сифатли сақлаш, узум зараркунандалари ва касаликларига қарши курашиш юзасидан саволлар билан мурожаат қилдилар.
Иштирокчилар томонидан берилган барча саволлар юзасидан масъул мутахассислар зарур тушунчалар ва тавсиялар беришди.
Робия ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
