Кузги бошоқли дон экинларини оптимал муддатларда ва сифатли қилиб экишга тайёргарлик кўриш бўйича кўргазмали семинар ўтказилди

6 август куни Амударё  тумани  Ўрта қалъа овули ҳудудидаги «Юсуф хўжа» фермер  хўжалигида 2022 йил хосили учун кузги бошоқли дон экинларини оптимал муддатларда ва сифатли қилиб экишга тайёргарлик кўриш бўйича кўргазмали семинар бўлиб ўтди.

Семинарда туман ҳокими Султонбой Йўлдашев, туман ҳокимининг қишлоқ ва сув хўжалиги масалалари бўйича ўринбосари, Файзулла Саъдуллаев, бир гуруҳ соха мутахассислари, олимлар, фурмерлар иштирок этдилар.

Семинарда туман ҳокими Султонбой Йўлдашев бошоқли дон экинларини етиштириш борасида жорий йилда туманимизда олиб борилаётган ишлар хусусида сўз юритди.

Таъкидланишича, туманда 2022 йил хосили учун 346 та фермер хўжаликлари ҳамда қишлоқ хўжалиги корхоналари томонидан жами 1166 контурда 6000 гектар майдонда ғалла экиш режалаштирилган бўлиб, ғалланинг белгиланган муддатларда экилишини таъминлаш учун  ғалла экиш графиклари белгилаб олинган.

Ғалла экиш ишларини уюшқоқлик билан амалга ошириш мақсадида 18 та отрядлар ташкил қилинган. Экиш ишларига 18 та юқори унумли сурим техникалари, 34 та занжирли сурим техникалари, 12 та ғалла экиш сеялкалари, 60 та чизеллар, 42 та культиватор мосламалари, 50 та ер тайёрлаш механизмлари, 50 та ер текислагичлар, 16 та уғит сепгичлар ҳамда 21 та эгат олгичлар қатнашиши режалаштирилган бўлиб мавжуд  техникалари 18 та экиш отрядларига бириктирилган. 

Жорий йилда ғалла экиш мавсуми учун гектарига ўртача 250 кг уруғликлар сарфланиб, жами 1500 тонна уруғлик захираси зарур бўлади. Туманда 745,9 тн  уруғлик  ғалла  тайёрланган  бўлиб, қолган  754 тонна  уруғлик  ғаллани  бошқа  вилоятлардан  олиб  келиш  режалаштирилган.

Семинарда иштирок этаётган қишлоқ хўжалиги соҳасининг тажрибали мутахассис олимлари туманимиздаги фермерлар, аграр соҳа билан вакилларига кузги бошоқли дон экинларини оптимал муддатларда ва сифатли қилиб экиш борасида қимматли тавсиялар бердилар.

Айтиш керакки, кузги буғдой етиштиришда унинг парвариши бўйича барча агротехника тадбирларнинг ўз вақтида сифатли ўтказилиши мўл ва сифатли дон етиштиришнинг асосий омилидир.

Олимларнинг қайд этишича, ғалла етиштириш технологияси ҳар бир минтақада ўзига хос бўлиб, эътибор ўша тупроқ-иқлим шароитида юқори ва сифатли дон етиштиришга қаратилиши лозим. Кузги буғдойда ҳар қандай шароитда ҳам физиологик жараён давом этиб, унинг ривожи учун энергия зарур бўлади.

Юқоридагилардан келиб чиқиб, буғдой парваришида куз-қиш фаслида бажарилиши лозим бўлган агротехник тадбирларга алоҳида эътибор қаратиш топширилди. Энг биринчи сув, яъни уруғ сувидан кейин тупроқ намлиги етарли даражада бўлса, 7–8 кунда экилган уруғ текис униб чиқади. Мақбул муддатда экилган майдондаги уруғ бир хилда текис ундириб олиниб, 3–4 тадан туплаганда ғалла ўсимлигининг кузги ривожи, илдиз тизимининг яхши ривожланиши натижасида қишдан яхши чиқади ва уларнинг кейинги ривожланиши, ҳосилдорлиги юқори бўлади.

Шунингдек, ғалла униб чиққандан кейин 20–22 кун ичида туплаш фазаси бошланади. Ғалла ниҳолларининг қишловга туплаган ҳолда кириши ниҳолларнинг совуққа чидамлилигини ошириш билан бир қаторда юқори ҳосилдорликни таъминлашда муҳим омиллардан бири ҳисобланади. Ғалланинг кузги парваришидан асосий мақсад – ғалла майдонларида мақбул кўчат қалинлигини сақлашдир.

Ғўза қатор орасига кузги буғдой экилган майдонлардаги ғўзапояни ер музлаган вақтида буғдой илдизига зарар етказмасдан ўриб, даладан олиб чиқиш ва буғдой майдонларининг пайҳонгарчилигига йўл қўймаслик, яна энг муҳим агротехник тадбирлардан бири ўртача 1 гектар майдонга 10 тоннадан маҳаллий ўғит жамғариш лозимлиги айтилди.

Семинарда ғаллакорларимиз ўзларини қизиқтирган саволлар билан мутахассисларга мурожаат қилдилар ҳамда жавоблар олдилар.

Туман ҳокимлигининг Ахборот хизмати.