Туманимизда Ўзбекистон Республикаси давлат мустақиллигининг 30 йиллиги муносиб нишонланди

Мамлактимизда энг улуғ, энг азиз байрам Ўзбекистон Республикаси мустақиллигининг 30 йиллиги тантанали равишда нишонланмоқда. Ҳудудларда байрам тадбирларига муносиб тайёргарлик кўрилиб,  шодиёналар кўтаринки руҳда ташкил этилмоқда.

28 август куни Амударё тумани Хотира майдонида ҳамда Истироҳат боғида мустақиллигимизнинг 30 йиллик байрами тадбири ташкил этилиб, истиқлол айёми кенг нишонланди. “Янги Ўзбекистонда эркин ва фаровон яшайлик!” шиори остида ташкил этилган байрам тадбирини туман ҳокими Султонбой Йўлдашев очиб берди ҳамда истиқлол йилларида мамлакат тараққиёти йўлида амалга оширилаётган ислоҳотлар натижасида қўлга киритилган ютуқларимизни санаб ўтди.

Туман ҳокими Султонбой Йўлдашев ўз сўзида халқимизнинг метин иродаси, мислиз куч-қидрати орқали барча соҳаларда қўлга киритаётган ютуқларимиз Янги Ўзбекистонда янги бир уйғониш даври – Учинчи Ренессанс даврига пойдевор яратилаётганлигидан далолат беришини қайд этиб, “Ватанимизнинг истиқлол йилларида босиб ўтган шонли йўлига назар ташлар эканмиз, эртанги кунимизга, ўз куч ва имкониятларимизга бўлган ишончимиз тобора ортади”, дея таъкидлади.

Дарҳақиқат, сўнгги йилларда мамлакатимиз тараққиёти йўлида амалга оширилаётган ислоҳотлар натижасида, барча соҳаларда сезиларли ўзгаришлар кузатилиб, янги ютуқлар қўлга киритилди. Ислоҳотлар самарадорлигини ошириш борасидаги тизимли ишлар орқали мамлакатимизнинг энг чекка ҳудудлари ҳам тобора ривожланиб, аҳоли турмуш тарзи яхшиланмоқда.

Туманимизда ҳам ислоҳотлар натижасида салмоқли ишлар амалга оширилиб, янги ривожланиш босқичига қадам қўйилмоқда. Хусусан, туманда фаол инвестиция сиёсати юритилиб, янги, замонавий корхоналар барпо этилмоқда, тадбиркорлик ва хусусий мулкни ривожлантириш, барча соҳа ва тармоқларда янгича ёндашувларни жорий этишга алоҳида эътибор қаратилмоқда. Шунингдек, қишлоқ хўжалиги соҳасини жадал ривожлантиришда  замонавий технологиялардан фойдаланиш, соҳада самарали усулларни қўллаш бўйича амалий ишлар олиб борилмоқда.

Туманимизда “Янги Ўзбекистонда эркин ва фаровон яшайлик!” шиори остида кўтаринки руҳда ўтказилган байрам тадбирида туман ҳокими Султонбой Йўлдашев бутун туманимиз аҳлини энг улуғ, энг азиз айём – мустақиллигимизнинг 30 йиллик байрами билан самимий табриклади.

Байрам тадбири республикамизнинг таниқли хонандалари ҳамда туман Маданият бўлими хонанадаларининг куй-қўшиқлари ҳамда ажойиб чиқишлари билан давом эттирилди. Хотира майдонига байрам тадбирини томоша қилишга келган юртдошларимиз куй-қўшиқларга рақсга тушдилар. Жажжи болажонларимиз севимли хонандаларининг ашулаларини биргаликда куйладилар.

Янги Ўзбекистон, тинчлик, она Ватанга муҳаббат, истиқлол, севги ва садоқат рукнидаги куй-қўшиқлар юртдошларимиз қалбида шукроналик ва эртанги кунга ишонч туйғуларини яна бир бор мустаҳкамлади. Тантанали тадбир якунида намойиш этилган мушакбозлик байрамга янада кўтаринки руҳ бағишлади.

Таъкидлаш керакки, туманимизда халқимиз ҳаётидаги унутилмас тарихий воқеа – Ватанимиз мустақиллигининг ўттиз йиллик байрамини катта шод-у хуррамлик билан нишонланди.

Шу фурсатдан фойдаланиб, аждодларимиз неча асрлар давомида орзу қилган, бутун халқимизга истиқлолнинг буюк неъматларини ҳадя этган - Мустақиллик байрами билан барча юртдошларимизни чин дилдан самимий муборакбод этамиз.

Туман ҳокимлигининг Ахборот хизмати.