Халқ депутатлари Амударё туман Кенгашининг 37-сессияси тўғрисида ахборот
Жорий йилнинг 10 сентябрь куни Халқ депутатлари Амударё туман Кенгашининг 37-сессияси бўлиб ўтди. Сессия мажлисида депутатлар, Ўзбекистон Республикаси Президенти сайловини ўтказувчи 1-Қорақалпоғистон округ сайлов комиссияси раиси Улугбек Жалменов ҳамда комиссия аъзоси Айсултан Қурбанова, ҳокимлик масъуллари, ҳуқуқ-тартибот органлари ва бўлимлар раҳбарлари, фуқаролар йиғинлари раислари ва оммавий ахборот воситалари вакиллари иштирок этдилар.
Сессия кун тартибида “Ўзбекистон Республикаси Президенти сайловини ўтказувчи участка сайлов комиссиялари аъзолигига номзодлар тавсия қилиш тўғрисида”ги ҳамда Кенгаш ваколатига доир бошқа қатор масалалар муҳокама қилинди.
Айни кунларда мамлакатимизда Ўзбекистон Республикаси Президенти сайловига тайёргарлик ишлари қизғин паллага кирган. Амударё туманида ҳам Ўзбекистон Республикаси Президенти сайловига тайёргарлик жараёнлари Сайлов кодекси ҳамда сайлов қонунчилиги талабларига мувофиқ амалга оширилмоқда. Туман ҳудудида Ўзбекистон Республикаси Президенти сайловини ўтказувчи 64 та сайлов участкаларини тузиш бўйича тақдимнома берилган бўлиб, 1-Қорақалпоғистон округ сайлов комиссияси томонидан шу йилнинг 24 августида сайлов участкаларини тузиш тўғрисидаги қарори қабул қилинди.
Сессия кун тартибидаги масала юзасидан Халқ депутатлари туман Кенгашининг Қонунийликни таъминлаш ва коррупцияга қарши курашиш масалалари бўйича доимий комиссияси раиси Музаффар Ешчановнинг ахбороти тингланди.
Ахборотда таъкидланганидек, Ўзбекистон Республикаси Сайлов кодексининг 23-моддасида участка сайлов комиссияси аъзолигига номзодлар фуқароларнинг ўзини ўзи бошқариш органлари, жамоат бирлашмалари, корхоналар, муассасалар ва ташкилотлар томонидан таклиф этилиб, бу номзодлар халқ депутатлари туман Кенгашларининг мажлисларида муҳокама қилиниши ҳамда тегишли округ сайлов комиссиясига тасдиқлаш учун тавсия этилиши белгиланган.
Амалдаги қонунчиликка мувофиқ сайлов кампанияси эълон қилинганидан кейин фуқароларнинг ўзини ўзи бошқариш органлари, жамоат бирлашмалари, корхоналар, муассасалар ва ташкилотлар ўз ташаббусига кўра ёки Халқ депутатлари туман, шаҳар Кенгашларининг таклифларига асосан участка сайлов комиссияси аъзолигига номзодлар заҳирасини шакллантиради.
Тумандаги 64 та участка сайлов комиссияси аъзоларига номзодлар шакллантирилиб, улар таркиби Халқ депутатлари туман Кенгашининг Қонунийликни таъминлаш ва коррупцияга қарши курашиш бўйича доимий комиссияси томонидан ўрганилиб чиқилган.
Қайд этилишича, участка сайлов комиссиялари таркибини шакллантиришда комиссия аъзолари 21 ёшга тўлганлиги, ўрта ёки олий маълумотга эгалиги, илгари сайловларда қатнашиб, тажриба орттиргани, аҳоли ўртасидаги обрў-эътиборга эгалигига ҳамда комиссия таркибининг ярмидан кўпи хотин-қизлардан иборат бўлишига, комиссия аъзоларининг ярмидан кўпи битта ташкилотдан бўлмаслигига эътибор қаратилган.
Ўзбекистон Республикаси Марказий сайлов комиссиясининг “Сайлов комиссияси аъзоларининг малакасини оширишни ташкил этиш ҳақида”ги қарорига мувофиқ участка сайлов комиссиялари раиси, ўринбосари ва котиблигига номзодлар учун 3 босқичдан иборат семинар-тренинг машғулотлари ўтказилган.
Сессия мажлисида Ўзбекистон Республикаси Президенти сайловини ўтказувчи 1-Қорақалпоғистон округ сайлов комиссияси раиси Улугбек Жалменов ҳамда комиссия аъзоси Айсултан Қурбанова жорий йилда ўтказиладиган давлатимиз ва халқимиз ҳаётида муҳим сиёсий воқеа – Ўзбекистон Республикаси Президенти сайлови барча даражадаги сайлов комиссияларининг зиммасига улкан масъулият юклашини алоҳида таъкидлади. Мамлакатимизда сайлов тизимини ислоҳ қилиш ва янада демократлаштириш, унинг ҳуқуқий асосларини мустаҳкамлаш, миллий қонунчилигимизни сайлов ҳуқуқига оид халқаро стандартларга уйғунлаштиришга алоҳида эътибор қаратилаётгани қайд этиб ўтилди.
Сессия кун тартибидаги шу ва бошқа масалалар бўйича депутатлар ўз фикр – мулоҳазаларини билдирдилар. Халқ депутатлари туман Кенгашининг 37-сессияси кун тартибига киритилган масалалар тўлиқ кўриб чиқилиб, муҳокама қилинди. Билдирилган фикр-мулоҳазалар ҳамда таклифларни инобатга олган ҳолда тегишли қарорлар қабул қилинди.
Туман ҳокимлигининг Ахборот хизмати.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
