АМУДАРЁЛИК ПАХТАКОРЛАР ЮКСАК ХИРМОН БУНЁД ЭТИШГА КИРИШДИЛАР

Кузнинг илк  кунлариданоқ йил бўйи қилган фидокорона меҳнатлари маҳсулини кўришга ошиққан деҳқон аҳли борки, дала-ю боғига кўчиб чиқади. Имконларини чамалаб, ҳосил хирмонларини бунёд этишга киришадилар. Сентябрь ойи, айниқса, пахтакорлар учун йил сарҳисобининг залворли рақамлари қайд этиладиган палла. Чунки  ана шу ойда етиштирилган пахта ҳосилининг асосий  қисми йиғиштириб олинади, кўзланган режалар, лафзлар юксак ҳосил хирмонларида намоён бўлади.

Мамлакатимиз Мустақиллигининг 30 йиллиги тантана қилинган жорий йилда амударёлик пахтакорлар ўз олдиларига улкан марраларни қўйдилар. Масъулияти чекланган жамият шаклидаги “Amudaryo tex” хорижий корхонаси кластери билан 350 та  пахтачилик фермер хўжаликлари ўртасида  шартномалар тузилиб, 15 минг 30 гектар ерга туманимиз иқлим шароитига мос серҳосил пахта навлари экилди. Ҳосилдорликни ҳар гектар ҳисобига 27,2 центнерга, ялпи ҳосил хирмонини 40 минг 950 тоннага етказишни режалаштирган фермер хўжаликлари раҳбарлари жорий қишлоқ  хўжалиги йилининг барча мавсум юмушларини агротехника қоидаларига мувофиқ ташкил этдилар.

Хусусан, ерларни чигит экишга тайёрлаш, ғўза яганаси, чопиқ қилиш, суғориш, қатор ораларига ишлов бериш, чилпиш каби агротехник тадбирларга масъулият билан ёндашилди. Аввалги йилларга нисбатан анча қурғоқчил келган мазкур деҳқончилик йили сув камчиллиги, ёзнинг ўта иссиқ келиши билан пахтакорларни жиддий синовларга рўпара қилди. Ана шундай мураккаб шароитда меҳнат қилган фермерлар, ижарачи деҳқонлар  бугун далалардаги ҳосил баракасидан кўнгиллари тўқ, 2021 йилги Амударё пахта карвонини отлантирдилар, сентябрь ойининг илк ҳафтасиданоқ юксак пахта хирмонлари қад ростлай бошлади.

Айни пайтда 12 минг 430 гектар майдонда дефолиация ишлари сифатли якунига етказилмоқда. Пахта йиғим-теримини кўтаринки руҳда, уюшқоқлик ва жипслик билан амалга ошириш, теримчилар ва кўнгилли ҳашарчилар учун зарур шарт-шароитлар яратиш мақсадида терилган пахтани қабул пунктларига ташиш учун 220 та транспорт воситалари, 535 та тиркама, терим суръатини бир маромда олиб боришни таъминлаш учун 580 та тарози тахт қилиб қўйилди.

Бундан ташқари, теримчиларнинг сифатли тушлик билан мунтазам таъминланишларига алоҳида эътибор қаратилди. Бунинг учун фермер хўжаликлари томонидан 580 та қозон-ўчоқлар, 870 та тоза ичимлик суви сақлаш идишлари, 46 минг 532 тадан зиёд этаклар тайёрланди.

Кўрилган барча чора-тадбирлар, яратилган шарт-шароитлар туфайли, айни кунда туманимиздаги илғор пахтачилик фермер хўжаликларида йиғим-терим мавсуми кўтаринки руҳда олиб борилмоқда. Хусусан, Уйшин маҳалла фуқаролар йиғини ҳудудидаги “Нуруллабой” фермер хўжалиги пахтакорлари жорий йил йиғим-терим мавсумини туманда биринчилардан бўлиб бошлаб юборишди.

Эрта баҳорда 78 гектар ерга “Султон”, С-47-27 навли тезпишар пахта уруғини эккан хўжалик пахтакорлари “Amudaryo tex” кластер корхонаси билан 134 тонна пахта топшириш юзасидан шартнома тузишган. Хўжалик далаларида шартномадаги режани ортиғи билан бажаргудай мўл-ҳосил етиштирилди.

Айни кунларда фермер хўжалиги далаларида 60 нафар ижрачи билан бирга уйшинлик кўнгилли ҳашарчи-ёшлар кунига умумий ҳисобда 7-8 тонна пахта теришга эришмоқдалар. Теримчилар учун дала бошида тоза ичимлик суви, кўнгилли тушлик қилишлари учун зарур шароитлар яратилган. Шунингдек, теримчиларнинг иш ҳақлари тарози бошида ҳисоб-китоб қилиб борилмоқда. Бу эса терим суръатининг янада юқори бўлишини таъминлаётир.

Анвар Қўчқоров, Асеной Хидирбоева, Сапарбой Худойберганов, Муяссар Муротбоева, Муҳаббат Шомуродова, Ўғилжон Омонбоева сингари теримчилар кунига 180-200, ҳатто 250 килограммдан пахта териб, фермер хўжалиги хирмонининг юксалишига ўз ҳиссаларини қўшмоқдалар.

- Мақсадимиз – етиштирилган ҳосилни кузнинг изғиринли кунларига қолмасдан сифатли йиғиб-териб, давлатга топшириш, - дейди фермер хўжалиги раҳбари Мадиёр Хидиров.

Биз ҳам лафзи ҳалол амударёлик пахтакорларга куч-қувват, машаққатли ишларида омадлар ёр бўлишини тилаб қоламиз.

Робия ЙЎЛДОШЕВА.