AMUDARYoLIK PAXTAKORLAR YuKSAK XIRMON BUNYoD ETIShGA KIRIShDILAR

Kuzning ilk  kunlaridanoq yil boʻyi qilgan fidokorona mehnatlari mahsulini koʻrishga oshiqqan dehqon ahli borki, dala-yu bogʻiga koʻchib chiqadi. Imkonlarini chamalab, hosil xirmonlarini bunyod etishga kirishadilar. Sentyabr oyi, ayniqsa, paxtakorlar uchun yil sarhisobining zalvorli raqamlari qayd etiladigan palla. Chunki  ana shu oyda yetishtirilgan paxta hosilining asosiy  qismi yigʻishtirib olinadi, koʻzlangan rejalar, lafzlar yuksak hosil xirmonlarida namoyon boʻladi.

Mamlakatimiz Mustaqilligining 30-yilligi tantana qilingan joriy yilda amudaryolik paxtakorlar oʻz oldilariga ulkan marralarni qoʻydilar. Masʼuliyati cheklangan jamiyat shaklidagi “Amudaryo tex” xorijiy korxonasi klasteri bilan 350 ta  paxtachilik fermer xoʻjaliklari oʻrtasida  shartnomalar tuzilib, 15 ming 30 gektar yerga tumanimiz iqlim sharoitiga mos serhosil paxta navlari ekildi. Hosildorlikni har gektar hisobiga 27,2 tsentnerga, yalpi hosil xirmonini 40 ming 950 tonnaga yetkazishni rejalashtirgan fermer xoʻjaliklari rahbarlari joriy qishloq  xoʻjaligi yilining barcha mavsum yumushlarini agrotexnika qoidalariga muvofiq tashkil etdilar.

Xususan, yerlarni chigit ekishga tayyorlash, gʻoʻza yaganasi, chopiq qilish, sugʻorish, qator oralariga ishlov berish, chilpish kabi agrotexnik tadbirlarga masʼuliyat bilan yondashildi. Avvalgi yillarga nisbatan ancha qurgʻoqchil kelgan mazkur dehqonchilik yili suv kamchilligi, yozning oʻta issiq kelishi bilan paxtakorlarni jiddiy sinovlarga roʻpara qildi. Ana shunday murakkab sharoitda mehnat qilgan fermerlar, ijarachi dehqonlar  bugun dalalardagi hosil barakasidan koʻngillari toʻq, 2021-yilgi Amudaryo paxta karvonini otlantirdilar, sentyabr oyining ilk haftasidanoq yuksak paxta xirmonlari qad rostlay boshladi.

Ayni paytda 12 ming 430 gektar maydonda defoliatsiya ishlari sifatli yakuniga yetkazilmoqda. Paxta yigʻim-terimini koʻtarinki ruhda, uyushqoqlik va jipslik bilan amalga oshirish, terimchilar va koʻngilli hasharchilar uchun zarur shart-sharoitlar yaratish maqsadida terilgan paxtani qabul punktlariga tashish uchun 220 ta transport vositalari, 535 ta tirkama, terim surʼatini bir maromda olib borishni taʼminlash uchun 580 ta tarozi taxt qilib qoʻyildi.

Bundan tashqari, terimchilarning sifatli tushlik bilan muntazam taʼminlanishlariga alohida eʼtibor qaratildi. Buning uchun fermer xoʻjaliklari tomonidan 580 ta qozon-oʻchoqlar, 870 ta toza ichimlik suvi saqlash idishlari, 46 ming 532 tadan ziyod etaklar tayyorlandi.

Koʻrilgan barcha chora-tadbirlar, yaratilgan shart-sharoitlar tufayli, ayni kunda tumanimizdagi ilgʻor paxtachilik fermer xoʻjaliklarida yigʻim-terim mavsumi koʻtarinki ruhda olib borilmoqda. Xususan, Uyshin mahalla fuqarolar yigʻini hududidagi “Nurullaboy” fermer xoʻjaligi paxtakorlari joriy yil yigʻim-terim mavsumini tumanda birinchilardan boʻlib boshlab yuborishdi.

Erta bahorda 78 gektar yerga “Sulton”, S-47-27 navli tezpishar paxta urugʻini ekkan xoʻjalik paxtakorlari “Amudaryo tex” klaster korxonasi bilan 134 tonna paxta topshirish yuzasidan shartnoma tuzishgan. Xoʻjalik dalalarida shartnomadagi rejani ortigʻi bilan bajarguday moʻl-hosil yetishtirildi.

Ayni kunlarda fermer xoʻjaligi dalalarida 60 nafar ijrachi bilan birga uyshinlik koʻngilli hasharchi-yoshlar kuniga umumiy hisobda 7-8 tonna paxta terishga erishmoqdalar. Terimchilar uchun dala boshida toza ichimlik suvi, koʻngilli tushlik qilishlari uchun zarur sharoitlar yaratilgan. Shuningdek, terimchilarning ish haqlari tarozi boshida hisob-kitob qilib borilmoqda. Bu esa terim surʼatining yanada yuqori boʻlishini taʼminlayotir.

Anvar Qoʻchqorov, Asenoy Xidirboyeva, Saparboy Xudoyberganov, Muyassar Murotboyeva, Muhabbat Shomurodova, Oʻgʻiljon Omonboyeva singari terimchilar kuniga 180-200, hatto 250 kilogrammdan paxta terib, fermer xoʻjaligi xirmonining yuksalishiga oʻz hissalarini qoʻshmoqdalar.

- Maqsadimiz – yetishtirilgan hosilni kuzning izgʻirinli kunlariga qolmasdan sifatli yigʻib-terib, davlatga topshirish, - deydi fermer xoʻjaligi rahbari Madiyor Xidirov.

Biz ham lafzi halol amudaryolik paxtakorlarga kuch-quvvat, mashaqqatli ishlarida omadlar yor boʻlishini tilab qolamiz.

Robiya YOʻLDOShEVA.