Сенатнинг Аграр, сув хўжалиги масалалари ва экология қўмитаси раиси Баҳодир Тажиев иштирокида йиғилиш ўтказилди

Маълумки, Президент Шавкат Мирзиёевнинг 2020 йил 11 ноябрда «2020-2023 йилларда Қорақалпоғистон Республикасини комплекс  ижтимоий-иқтисодий ривожлантириш чора-тадбирлари тўғрисида»ги қарори имзолаган эди.

Мазкур қарор Қорақалпоғистон Республикасининг мавжуд ижтимоий-иқтисодий, шу жумладан ишлаб чиқариш ва инвестиция салоҳиятидан самарали фойдаланиш, ҳудудда муҳандислик-коммуникация, ижтимоий ва ишлаб чиқариш инфратузилмаларини яхшилаш, иқтисодиёт тармоқларини барқарор ривожлантириш, шу асосда аҳоли бандлигини таъминлаш ва турмуш даражасини ошириш мақсадида қабул қилинган бўлиб, унинг ижросини таъминлаш борасида тизимли ишлар амалга оширилмоқда.

Жорий йилнинг 15 сентябрь санасида Амударё тумани ҳокимлигида ўтказилган йиғилиш мазкур қарорда белгиланган устувор йўналишлар борасида туманда амалга оширилган ишлар билан танишиш ҳамда мавжуд муаммо ва камчиликларни бартараф қилиш мақсадида ташкил этилди.

Йиғилишда Ўзбекистон Республикаси Олий Мажлиси Сенатининг Аграр, сув хўжалиги масалалари ва экология қўмитаси раиси Баҳодир Тожиев, туман ҳокими Султонбой Йўлдашев, Халқ депутатлари туман кенгаши депутатлари, ҳоким ўринбосарлари, корхона-ташкилотлар раҳбарлари, тадбиркорлар ҳамда банклар масъуллари иштирок этдилар.

Йиғилишда Ўзбекистон Республикаси Олий Мажлис Сенати аъзоси Баҳодир Тожиев сўзга чиқиб, давлатимиз раҳбари 2020-2023 йилларда Қорақалпоғистон Республикасини комплекс ижтимоий-иқтисодий ривожлантиришнинг қатор устувор йўналишларини белгилаб берганлиги ҳақида тўхталди.

Таъкидланганидек, Президент ташаббуси билан Қорақалпоғистон Республикасида барча соҳаларни жадал ривожлантиришга оид 3 йилга мўлжалланган чора-тадбирлар ишлаб чиқилган бўлиб, ҳар бир туманда 2 тадан фаолият тури ўзига хос «ўсиш нуқта»си сифатида белгилаб берилди. Қорақалпоғистон Республикасидаги барча туманларни янада ривожлантириш мақсадида ушбу «ўсиш нуқталари» бўйича тадбиркорлик субъектларига қатор имтиёзлар берилиши кўрсатилди. Шунингдек, ривожланиш даражаси паст бўлган туманларда янгидан ташкил этиладиган саноат корхоналарига 3 йил муддатга солиқ ва божхона имтиёзлари берилиши белгиланди.

Айтиш керакки, Амударё туманида 2020-2023 йилларда инвестиция лойиҳаларини амалга ошириш дастури бўйича 76 та лойиҳалар амалга оширилиши ҳамда шу орқали 2571 та янги иш ўринлари яратилиши белгиланган бўлиб, сентябрь ҳолатига 60 та, қиймати 88,9 млрд.сўмлик лойиҳалар амалга оширилган, натижада 2004 та янги иш ўринлари яратилган.

Шундан саноат маҳсулотларини ишлаб чиқариш бўйича 15 та, хизмат кўрсатишни ривожлантириш бўйича 21 та, қишлоқ хўжалигини ривожлантириш бўйича 24 та лойиҳалар амалга оширилган.

Йиғилишда қатор тадбиркорларнинг соҳада эришаётган ютуқлари билан бир қаторда муаммо ва камчиликлари юзасидан фикрлари тингланди. Тадбиркорлик фаолиятига тўсиқ бўлаётган муаммолар тегишли масъуллар билан келишилган ҳолда бартараф қилинадиган бўлди.

Шунингдек, очиқ мулоқот тарзида ўтказилган йиғилишда сенатор Баҳодир Тожиев Халқ депутатлари туман кенгаши депутатларининг фаолиятлари билан танишиб, уларга аҳоли муаммолари билан ишлаш борасида тегишли тавсияларни берди.

Туман ҳокимлигининг Ахборот хизмати.