Senatning Agrar, suv xoʻjaligi masalalari va ekologiya qoʻmitasi raisi Bahodir Tajiyev ishtirokida yigʻilish oʻtkazildi

Maʼlumki, Prezident Shavkat Mirziyoyevning 2020-yil 11-noyabrda «2020-2023-yillarda Qoraqalpogʻiston Respublikasini kompleks  ijtimoiy-iqtisodiy rivojlantirish chora-tadbirlari toʻgʻrisida»gi qarori imzolagan edi.

Mazkur qaror Qoraqalpogʻiston Respublikasining mavjud ijtimoiy-iqtisodiy, shu jumladan ishlab chiqarish va investitsiya salohiyatidan samarali foydalanish, hududda muhandislik-kommunikatsiya, ijtimoiy va ishlab chiqarish infratuzilmalarini yaxshilash, iqtisodiyot tarmoqlarini barqaror rivojlantirish, shu asosda aholi bandligini taʼminlash va turmush darajasini oshirish maqsadida qabul qilingan boʻlib, uning ijrosini taʼminlash borasida tizimli ishlar amalga oshirilmoqda.

Joriy yilning 15-sentyabr sanasida Amudaryo tumani hokimligida oʻtkazilgan yigʻilish mazkur qarorda belgilangan ustuvor yoʻnalishlar borasida tumanda amalga oshirilgan ishlar bilan tanishish hamda mavjud muammo va kamchiliklarni bartaraf qilish maqsadida tashkil etildi.

Yigʻilishda Oʻzbekiston Respublikasi Oliy Majlisi Senatining Agrar, suv xoʻjaligi masalalari va ekologiya qoʻmitasi raisi Bahodir Tojiyev, tuman hokimi Sultonboy Yoʻldashev, Xalq deputatlari tuman kengashi deputatlari, hokim oʻrinbosarlari, korxona-tashkilotlar rahbarlari, tadbirkorlar hamda banklar masʼullari ishtirok etdilar.

Yigʻilishda Oʻzbekiston Respublikasi Oliy Majlis Senati aʼzosi Bahodir Tojiyev soʻzga chiqib, davlatimiz rahbari 2020-2023-yillarda Qoraqalpogʻiston Respublikasini kompleks ijtimoiy-iqtisodiy rivojlantirishning qator ustuvor yoʻnalishlarini belgilab berganligi haqida toʻxtaldi.

Taʼkidlanganidek, Prezident tashabbusi bilan Qoraqalpogʻiston Respublikasida barcha sohalarni jadal rivojlantirishga oid 3-yilga moʻljallangan chora-tadbirlar ishlab chiqilgan boʻlib, har bir tumanda 2 tadan faoliyat turi oʻziga xos «oʻsish nuqta»si sifatida belgilab berildi. Qoraqalpogʻiston Respublikasidagi barcha tumanlarni yanada rivojlantirish maqsadida ushbu «oʻsish nuqtalari» boʻyicha tadbirkorlik subʼektlariga qator imtiyozlar berilishi koʻrsatildi. Shuningdek, rivojlanish darajasi past boʻlgan tumanlarda yangidan tashkil etiladigan sanoat korxonalariga 3-yil muddatga soliq va bojxona imtiyozlari berilishi belgilandi.

Aytish kerakki, Amudaryo tumanida 2020-2023-yillarda investitsiya loyihalarini amalga oshirish dasturi boʻyicha 76 ta loyihalar amalga oshirilishi hamda shu orqali 2571 ta yangi ish oʻrinlari yaratilishi belgilangan boʻlib, sentyabr holatiga 60 ta, qiymati 88,9 mlrd.soʻmlik loyihalar amalga oshirilgan, natijada 2004 ta yangi ish oʻrinlari yaratilgan.

Shundan sanoat mahsulotlarini ishlab chiqarish boʻyicha 15 ta, xizmat koʻrsatishni rivojlantirish boʻyicha 21 ta, qishloq xoʻjaligini rivojlantirish boʻyicha 24 ta loyihalar amalga oshirilgan.

Yigʻilishda qator tadbirkorlarning sohada erishayotgan yutuqlari bilan bir qatorda muammo va kamchiliklari yuzasidan fikrlari tinglandi. Tadbirkorlik faoliyatiga toʻsiq boʻlayotgan muammolar tegishli masʼullar bilan kelishilgan holda bartaraf qilinadigan boʻldi.

Shuningdek, ochiq muloqot tarzida oʻtkazilgan yigʻilishda senator Bahodir Tojiyev Xalq deputatlari tuman kengashi deputatlarining faoliyatlari bilan tanishib, ularga aholi muammolari bilan ishlash borasida tegishli tavsiyalarni berdi.

Tuman hokimligining Axborot xizmati.