Қиличбой овулида боғдорчилик соҳаси ривожига бағишланган семинар бўлиб ўтди

Мамлакатимизда қишлоқ хўжалигининг барча соҳаларини, шу жумладан, мевачиликни жадал ривожлантириш, тупроқ унумдорлигини, мева ҳосилдорлигини ошириш, маҳсулот сифатини яхшилаш ҳамда улардан қайта ишлаш саноатида тайёрланадиган маҳсулотларни кўпайтиришга, халқимизнинг мевага бўлган талабини тўла қондиришига алоҳида эътибор қаратилиб, бу борада тизимли ишлар амалга оширилмоқда.

Соҳадаги самарали ишлар натижасида мамлакатимизда боғдорчиликка ихтисослашган фермер хўжаликлари сони янада ортиб, аҳолининг мевага бўлган талаби ва эҳтиёжлари тўлиқ қондирилмоқда. Шунингдек, меваларнинг ҳосилдорлигини ошириш, маҳсулот сифатини кўтариш ҳамда мева маҳсулотини қайта ишлаб, уларни чет мамлакатларга экспорт қилиш борасида кенг имкониятлар яратилмоқда.

Боғбон фермерлар мева етиштиришда унинг ҳосилдорлигини кескин кўтариш, маҳсулот сифатини яхшилаш, қуруқ мева тайёрлаш ҳажмини ошириш, аҳолини ҳамда қайта ишлаш саноатини хомашё билан тўлиқ таъминлаб, юқори сифатли маҳсулотни четга чиқаришда тинимсиз меҳнат қилмоқдалар.

Айтиш керакки, боғдорчиликни юқори поғонага кўтаришда фермерларимиз илм-фан ютуқлари ва тавсия этилган технологияларни ўз вақтида ва юқори агротехника даражасида амалга оширишлари муҳим аҳамиятга эга. Амударё тумани Қиличбой овулида ташкил этилган семинар ҳам боғдорчиликни янада ривожлантириш мақсадига йўналтирилди.

9 октябрь куни туман фермер, деҳқон хўжаликлари ҳамда томорқа ер эгалари кенгаши ташаббуси Қиличбой овул фуқаролар йиғини биносида ташкил этилган семинарда интенсив боғлар учун илғор технологиялар асосида мевали кўчатлар етиштирувчи “Мевали Прантс” – Ўзбекистон ҳудудидаги илк ўзбек-турк қўшма компанияси ижрочи директори Мансур Раҳимов иштирок этди. Шунингдек, семинарда тумандаги намунали томорқа ер эгалари, меҳнаткаш деҳқонлар, фермер хўжаликлари раҳбарлари қатнашдилар.

Семинарда мамлакатимизда озиқ-овқат хавфсизлигини таъминлаш, аҳолининг қишлоқ хўжалиги, айниқса, боғдорчилик маҳсулотларига бўлган эҳтиёжини қондириш масаласига алоҳида эътибор қаратилаётгани таъкидланди. Боғларни илмий-агротехник тадбирлар асосида парваришлаш, янгилаш, интенсив боғлар барпо этиш, серҳосил, эртапишар мева навларини яратиш ҳар томонлама қўллаб-қувватланиб, кенг имконият ва имтиёзлар яратилаётганлиги қайд этилди.

 Шунингдек, боғдорчилик соҳасида амалга оширилаётган илғор технологиялар, янги навлар, соҳани янада ривожлантиришнинг асосий омиллари ҳақида кенг кўламли маълумотлар берилди.

 Таъкидланишича, боғлардан мўл ҳосил олишда зарур бўлган агротехник тадбирларни ўз вақтида юқори даражада бажарилиши устувор аҳамият касб этади. Тупроқ-иқлим шароитларининг қулайлиги, мева турлари ва ажойиб навларининг мавжудлиги, улардан юқори, мўл ва сифатли ҳосил олиш имкониятини беради.

Чарос Арслонова.