КЎРГАЗМАЛИ СЕМИНАР-КЕНГАШ БЎЛИБ ЎТДИ

19 октябрь куни Амударё туманининг Қипчоқ овулидаги “Ҳайтимбетов Султон” фермер хўжалиги даласида кўргазмали семинар кенгаш бўлиб ўтди.

Қипчоқ овулидаги “Ҳайтимбетов Султон” фермер хўжалиги даласида ўтказилган кўргазмали семинар-кенгаш қишлоқ хўжалигида бугунги куннинг долзарб масалаларига бағишланди.

Кўргазмали семинар-кенгашда туман ҳокими Султонбой Йўлдошев, секторлар раҳбарлари, қишлоқ хўжалиги мутахассислари ва фермер хўжаликлари раҳбарлари иштирок этдилар.

Қишлоқ хўжалиги экинларидан 2022 йилда мўл ҳосил олишга эришиш учун айни кунда соҳа мутахассислари, деҳқонлар олдида турган кечиктириб бўлмайдиган вазифаларга бағишланган тадбирни туман ҳокими Султонбой Йўлдашев очди.

Кун тартибидаги 2022 йил ҳосили учун экилган ғалла парвариши, озиқлантирилиши, 2022 йилда қишлоқ хўжалик экинлари экиладиган майдонларни сифатли  текислаш, экиш мавсумига техникаларни сифатли  таъмирлаб, тахт қилиб қўйиш, экин майдонларининг шўрланиб кетишининг олдини олиш учун мавжуд коллектор-дренажларни сифатли тозалаш ва бошқада масалалар юзасидан Ўзбекистон Қишлоқ хўжалиги вазирининг биринчи ўринбосари Шуҳрат Тешаев, Қорақалпоғистон Республикаси Вазирлар Кенгаши раисининг ўринбосари Дарьябой Кайповлар маъруза қилдилар.

Она заминимиз халқмиз ризқ-рўзи унадиган бебаҳо табиий хазинамиздир. Кейинги йилларда ердан оқилона фойдаланиш, мўл-кўл ҳосил етиштирилишига эришиш орқали деҳқонлар ҳаёти фаровонлигини таъминлашга алоҳида эътибор қаратилмоқда. Бунинг учун илм-фан ютуқларидан самарали фойдаланилиб, экин майдонлари ҳосилдорлигини ошириш ва касалликларга чидамли, табиий иқлим шароитимизга мос ҳосилдор навлар яратилиб, экилмоқда. Натижада қишлоқ хўжалиги маҳсулотлари етиштириш ҳажми йилдан йилга ошиб бормоқда.

Туманимизда 2 та ғаллачилик кластери фаолият юритиб, асосий  қишлоқ хўжалик экинларидан ҳисобланмиш дон етиштиришни кўпайтириш борасида самарали  ишларни амалга оширмоқда.

Ушбу кластерларга қарашли фермер хўжаликларида 2022 йил ҳосили учун режадаги 6000 гектар, қўшимча 400 гектар, жами 6400 гектар майдонга ғалла экилди.

Ғалла экилган майдонларда сув танқислигининг олдини олиш ва мўл ҳосил етиштирилишига эришиш учун 1000 гектар майдондаги ғўзаларни ёмғирлатиб суғориш кўзда тутилмоқда.

Ғалла майдонларининг 1720 гектарига “Аср”, 1010 гектарига “зимница”, 2568 гектарига “Антонина”, 654 гектарига “Васа” нави, 48 гектарига эга бошқа сифат кўрсаткичлари юқори бўлган навлар экилди.

Семинарда ушбу экин майдонларидан униб  чиққан буғдой майсаларини ўз вақтида агротехника қоидаларига мувофиқ парвариш қилиш, қиш мавсумидан талофатсиз олиб чиқишни таъминлаш бугунги куннинг асосий вазифаларидан эканлиги таъкидланиб, бу борада зарур тавсиялар берилди.

Тадбир сўнггида туман ҳокими Султонбой Йўлдашев сўзга чиқиб, қишлоқ хўжалиги ходимлари олдида турган айни кундаги долзарб вазифалар хусусида тўхталиб ўтди.

О.РАЖАБОВА.