KOʻRGAZMALI SEMINAR-KENGASh BOʻLIB OʻTDI

19-oktyabr kuni Amudaryo tumanining Qipchoq ovulidagi “Haytimbetov Sulton” fermer xoʻjaligi dalasida koʻrgazmali seminar kengash boʻlib oʻtdi.

Qipchoq ovulidagi “Haytimbetov Sulton” fermer xoʻjaligi dalasida oʻtkazilgan koʻrgazmali seminar-kengash qishloq xoʻjaligida bugungi kunning dolzarb masalalariga bagʻishlandi.

Koʻrgazmali seminar-kengashda tuman hokimi Sultonboy Yoʻldoshev, sektorlar rahbarlari, qishloq xoʻjaligi mutaxassislari va fermer xoʻjaliklari rahbarlari ishtirok etdilar.

Qishloq xoʻjaligi ekinlaridan 2022-yilda moʻl hosil olishga erishish uchun ayni kunda soha mutaxassislari, dehqonlar oldida turgan kechiktirib boʻlmaydigan vazifalarga bagʻishlangan tadbirni tuman hokimi Sultonboy Yoʻldashev ochdi.

Kun tartibidagi 2022-yil hosili uchun ekilgan gʻalla parvarishi, oziqlantirilishi, 2022-yilda qishloq xoʻjalik ekinlari ekiladigan maydonlarni sifatli  tekislash, ekish mavsumiga texnikalarni sifatli  taʼmirlab, taxt qilib qoʻyish, ekin maydonlarining shoʻrlanib ketishining oldini olish uchun mavjud kollektor-drenajlarni sifatli tozalash va boshqada masalalar yuzasidan Oʻzbekiston Qishloq xoʻjaligi vazirining birinchi oʻrinbosari Shuhrat Teshayev, Qoraqalpogʻiston Respublikasi Vazirlar Kengashi raisining oʻrinbosari Daryaboy Kaypovlar maʼruza qildilar.

Ona zaminimiz xalqmiz rizq-roʻzi unadigan bebaho tabiiy xazinamizdir. Keyingi yillarda yerdan oqilona foydalanish, moʻl-koʻl hosil yetishtirilishiga erishish orqali dehqonlar hayoti farovonligini taʼminlashga alohida eʼtibor qaratilmoqda. Buning uchun ilm-fan yutuqlaridan samarali foydalanilib, ekin maydonlari hosildorligini oshirish va kasalliklarga chidamli, tabiiy iqlim sharoitimizga mos hosildor navlar yaratilib, ekilmoqda. Natijada qishloq xoʻjaligi mahsulotlari yetishtirish hajmi yildan yilga oshib bormoqda.

Tumanimizda 2 ta gʻallachilik klasteri faoliyat yuritib, asosiy  qishloq xoʻjalik ekinlaridan hisoblanmish don yetishtirishni koʻpaytirish borasida samarali  ishlarni amalga oshirmoqda.

Ushbu klasterlarga qarashli fermer xoʻjaliklarida 2022-yil hosili uchun rejadagi 6000 gektar, qoʻshimcha 400 gektar, jami 6400 gektar maydonga gʻalla ekildi.

Gʻalla ekilgan maydonlarda suv tanqisligining oldini olish va moʻl hosil yetishtirilishiga erishish uchun 1000 gektar maydondagi gʻoʻzalarni yomgʻirlatib sugʻorish koʻzda tutilmoqda.

Gʻalla maydonlarining 1720 gektariga “Asr”, 1010 gektariga “zimnitsa”, 2568 gektariga “Antonina”, 654 gektariga “Vasa” navi, 48 gektariga ega boshqa sifat koʻrsatkichlari yuqori boʻlgan navlar ekildi.

Seminarda ushbu ekin maydonlaridan unib  chiqqan bugʻdoy maysalarini oʻz vaqtida agrotexnika qoidalariga muvofiq parvarish qilish, qish mavsumidan talofatsiz olib chiqishni taʼminlash bugungi kunning asosiy vazifalaridan ekanligi taʼkidlanib, bu borada zarur tavsiyalar berildi.

Tadbir soʻnggida tuman hokimi Sultonboy Yoʻldashev soʻzga chiqib, qishloq xoʻjaligi xodimlari oldida turgan ayni kundagi dolzarb vazifalar xususida toʻxtalib oʻtdi.

O.RAJABOVA.