ОИЛАВИЙ ПОЛИКЛИНИКАДАГИ ТИББИЙ ХИЗМАТДАН АҲОЛИ МАМНУН

Тиббиётнинг бирламчи бўғини аҳоли саломатлигини сақлаш, жамиятда соғлом турмуш тарзини қарор топтиришда беқиёс ўринга эга. Шу боис, мамлакатимизда аҳолига бирламчи тиббий-санитария ёрдами кўрсатишнинг сифати, самарадорлиги ва оммабоплигини ошириш, тиббиёт ходимларининг жамиятдаги ўрни ва мақомини кучайтиришга катта эътибор қаратилмоқда.

Амударё туманида ҳам 2017 йилда ташкил этилган Қипчоқ қишлоқ врачлик пункти негизида 1-сонли оилавий поликлиника ташкил этилди. Ҳозирги кунда Рустам Хидирбоев мудирлик қилаётган мазкур оилавий поликлиникада тумандаги Тўлқин, Чойкўл, Қипчоқ овуллари, Қипчоқ шаҳарчаси, Бештом, Дарёбўйи, Уйшин маҳаллалари худудида яшовчи  30711 нафар аҳолига сифатли тиббий хизмат кўрсатиш йўлга қўйилган.

Тиббиёт масканида 13 нафар оилавий шифокор, 1нафар акушер-гинеколог, 1 нафар хирург, 1 нафар шифокор-лаборант, 1 нафар  ультратовуш ташхиси мутахасиси ишлайди. Шифокорлардан ташқари,  37 нафар патронаж ҳашира ва 21 нафар ҳамширалар аҳоли саломатлигини мустаҳкамлашда  ўз билим ва тажрибаларига таяниб хизмат кўрсатишмоқда.

Оилавий поликлиникада беморларни қабул қилиш учун оилавий шифокорлар хоналари, аёллар маслаҳатхонаси, жарроҳлик амалиёти, лаборатория, ультратовуш ташхиси, муолажа хоналари мавжуд. Шунингдек, 8 ўринли кундузги стационар, эмлаш, ДОТ ва оналар мактаби учун хоналари ажратилган. Ижтимоий аптека ва тез ёрдам шохобчаси ҳам ташкил этилган.

Поликлиника мазкур йилда замонавий ультратовуш текширув аппарати билан таъминланди. Ушбу аппаратда малакали шифокор Умида Холиқулова  ҳудуддаги аҳолининг узоғини яқин қилиб, шифокорларга аниқ ташхис қўйишда яқиндан ёрдам бериб келмоқда.

Лаборатория хонаси ҳам замонавий тиббий ускуналар билан жиҳозланган. Текширувлар сифатли ўтказилиши учун лабораторияга олий тоифали  шифокор-лаборант Эркиной Тожибоева бириктирилган. Беморларнинг ташхисини аниқлашда лаборатор таҳлиллар муҳим ўрин тутади. Бу борада Эркиной Тожибоева ўз билим ва тажрибаларини қўллаб, беморларга аниқ ташхис қўйилишини таъминламоқда.

Акушер-гинеколог Давлатбика Тўқлибоева ҳам ҳудудда яшовчи 7914 нафар аёлларнинг репродуктив саломатлигини мустаҳкамлашда ҳормай толмай меҳнат қилиб келмоқда. Ҳомиладор аёлларни ҳисобга олиш ва чақалоқ туғилгунга қадар ҳомиладорларни назорат қилиб, оналарнинг соғлом фарзанд дунёга келтиришга кўмак бермоқда.

Ҳозирги кунда аҳолини короновирус касаллигига қарши эмлаш,  инфекция тарқалишининг олдини олиш, аҳолини чуқурлаштирилган, мактаблар ва боғчалардаги болаларни, туғиш ёшидаги аёлларни тиббий кўрикдан ўтказиш,  аниқланган беморларни амбулатор ёки стационар шароитда даволаш ишларини ҳам олиб боришмоқда. Бу ишларда жонбозлик кўрсатаётган оилавий шифокорлардан  Ҳабиба Нуримова, Мақсуда Абдуллаева, Зулфия Егизбоева, Раъно Таировалар, патронаж ҳамширалардан Моҳира Авезова, Дилноза Солиева, Дилафрўз Ўрозимбетова, Муяссар Ештаева, Муяссар Худойбергановаларнинг меҳнатларини, фидойиликларни алоҳида тилга олиб ўтса арзийди.

Мазкур йилнинг ўтган даври мобайнида тиббиёт маскани ходимлари томонидан чуқурлаштирилган тиббий кўрикдан ўтказиш ишлари режа асосида олиб борилди. Ҳудуддаги кўрилиши лозим бўлган 30019 нафар аҳолидан  29571 нафари кўрикдан ўтказилиб, 9241 нафар бемор аниқланди. Аниқланган беморларнинг  91,1 фоизи соғломлаштирилди,  7658 нафари амбулатор, 762 нафари стационар шароитда, 2 нафари  санатория-курортларда соғлом ҳаётга қайтарилди.

Тиббиёт масканида Президентимизнинг соғлиқни сақлаш тизимига оид Фармон ва Қарорларида белгиланган топшириқларнинг ижросини ўз вақтида самарали таъминлаш мақсадида ҳам тиббиёт бирлашмаси ва тегишли идоралар билан ҳамкорликда бир қатор ишлар амалга оширилди. Шу мақсадда 13 нафар шифокор, 34 нафар ўрта тиббиёт ходимларидан иборат 13 та тиббиёт бригадалари ташкил этилди. 30711 нафар аҳолининг 30033 нафарида антропометрик ўлчовлар амалга оширилди. Ўрганишлар натижасида 19516 нафар катта ёшдаги аҳоли орасида 6416 нафарида ортиқча вазн, 2604 нафарида семизлик, 4918 нафар аҳоли мева ва сабзавотларни, 2068 нафар аҳоли сут маҳсулотларини кам истеъмол қилиши, 5620 нафар ширинликларни, 5598 нафар ёғли овқатларни, 4839 нафар тузли озиқ-овқат маҳсулотларни истеъмол қилиши маълум бўлди. 

Шунингдек, 645 нафар тамаки чекувчилар, 354 нафар алкоголь маҳсулотларини истеъмол қилувчилар борлиги, 4284 нафар аҳоли жисмонан нофаол ҳаёт кечириши аниқланди. 

Текширувлар натижасида 11195 нафар болалардан 198 нафарида ортиқча вазн, 21 нафарида семизлик, 735 нафари мева ва сабзавотларни, 470 нафари сут маҳсулотларини кам истеъмол қилиши, 3841 нафари ширинликларни, 589 нафари ёғли овқатларни, 563 нафари тузли озиқ-овқат маҳсулотларни истеъмол қилиши, 334 нафари жисмонан нофаол ҳаёт кечириши маълум бўлди.

Жами хатловдан ўтказилган 30033 нафар аҳоли орасида 4368 нафар  аҳолида турли хил сурункали касалликлар аниқланиб, шу асосда касаллик тури бўйича 4 та гуруҳга  таснифланди.

Ҳудуд аҳолисига соғлом ҳаёт тарзини, ўз саломатлигини асраш, масъулият билан қарашни тушунтириш мақсадида шу йил 1 мартдан тумандаги 7 та маҳаллага оилавий шифокорлар ва патранож ҳамширалардан иборат маҳалла тиббий бригадалари ҳам  ташкил этилди. Ҳар бир маҳаллада  ва  Оилавий поликлинканинг ўзида тиббий бригадалар маълумотлар  тахтаси шакллантирилиб, таклиф ва эътирозларни қайд қилиш учун “таклиф ва эътирозлар дафтари”, саломатлик бурчаклари, тиббиёт  саломатлик сабоқлари каналлари йўлга қўйилди.

Юртимизда соғлиқни сақлаш тизимида тизимли ва изчил ислоҳотлар олиб борилмоқда. Барча тиббиёт масканларидаги каби 1-сонли оилавий поликлинкада ҳам аҳоли саломатлигини асраш борасидаги вазифаларни амалга оширишда ушбу ислоҳотлар муҳим аҳамият касб этмоқда. Масканда сифатли хизмат кўрсатилаётганидан, узоғи яқин бўлганидан ҳудуд аҳолиси ниҳоятда мамнун.

О.Худойберганова.