Истиқлол илҳомлари

Ватаним

Юртим йўлларини пиёда кездим,

Шунда мен бир ажиб ғурурни сездим.

Қалбимда қувонч-у сурурни сездим,

Мени мафтун этган гўзал масканим.

Амударё - Ватан ичра Ватаним!

Бир ёнда Хоразм, бир ёнда Туркман,

Йўллари равондир, боғлари чаман.

Ўзим фахрланиб шуни айтаман,

Боғи Эрамдан ҳам гўзал чаманим,

Амударё - Ватан ичра Ватаним!

Дарё бўйи - Назархоннинг даласи,

Унда бўлмас ҳеч бир ишнинг чаласи.

Элимиз фахридир Чилпиқ қалъаси,

Гавур ва Ёмпиқлар аждодим маним,

Амударё - Ватан ичра Ватаним!

Жумуртов тоғида бойлик тоғлари,

Бунчалар сўлимдир тўқайзорлари.

Кўзни қувонтирар буғдойзорлари,

Эккан ҳар бир уруғ унган маконим,

Амударё - Ватан ичра Ватаним!

Дунёга таниқли зўр овозаси,

Киришда-чиқишда қўш дарвозаси.

Юксалиб бормоқда ҳар бир соҳаси,

Қувониб ўтмоқда ҳар дам, ҳар оним,

Амударё - Ватан ичра Ватаним!

Ҳар қанча мақтансам озлик қилади,

Юртим жамолига кўздек бўлади.

Фарҳоднинг қиши ҳам ёздек бўлади,

Онамдек мўътабар азиз масканим,

Амударё - Ватан ичра Ватаним!

Фарҳод Авезов.

Ватанда тинчлик

Урушлар йўқ она Ватанда,

Осмон тиниқ, асло ғубор йўқ.

Бахт уфурар ҳар бир маконда,

Эл фаровон ва кўнгиллар тўқ.

Дилни ўйди неча разиллик

Ва иккинчи жаҳон уруши.

Неча йиллар эзганда қуллик,

Қийин бўлди кўзёш қуриши.

Поезд гўё ажал элчиси,

Шарқдан Ғарбга ташиди одам.

Не бир олим, Ватан куйчисин,

Юрагини ёндирди алам.

Танк ичида ёнди йигитлар

Ва қабрсиз кетди қанчаси.

Элим, деган ёвқур йигитлар

Қуриб қолган кўнгил ғунчаси.

Момоларим йиғлаб ўтдилар,

"Болам!” - дея нолалар қилиб.

Ёш гўдаклар бўйга етдилар,

"Отам!” – дея бағрини тилиб.

Ана, қаранг, Ватан гуллайди,

Истиқлолдан овуллар обод.

Эрк қуёши кўкда порлайди.

Ҳурлик куйин куйлайди Шаҳзод.

Шаҳзод Қурбонбоев.

(Фото - http://fikr.uz)