АМУДАРЁЛИК ТАДБИРКОРЛАР УЧУН БИЗНЕС-ТРЕНИНГ ТАШКИЛ ЭТИЛДИ

Муваффақиятга ўз-ўзидан эришилмайди. Ҳар бир ютуқ замирида заҳматли ҳаракат  ётади. Тадбиркор бизнес соҳасида ўз ўрнини топиши учун нафақат меҳнат қилиши керак, балки унга билим ва тажриба ҳам сув ва ҳаводек зарур. Шу сабабли ҳам жойларда тадбиркорлик соҳасида ютуққа эришган тренерлар иштирокида бизнес-тренинглар ташкил қилинмоқда.

Амударёлик тадбиркор Жавлонбек Ўрозбоев ҳам юртдошларимизга қулайлик яратиш ва тадбиркорларнинг билимларини ошириш, шу орқали туманимиз иқтисодий ривожига ҳисса қўшиш мақсадида ўз ташаббуси билан бизнес-тренинг ташкил қилди.

"Бизнесни анализ қилиш ва стратегия тузиш" мавзусидаги тренингни "Бизнес драйв", "Kitapp" лойиҳалари асосчиси, Алишер Қултаев ва бошқалар ўтказишди.

Алишер Қултаев 1990 йилда Самарқанд вилоятида туғилган.

Ал-Хоразмий номидаги Тошкент ахборот технологиялари университетини 2015 йилда тамомлаган. У бизнесда 9 йиллик тажрибага эга.

Бизнес-тренингда Алишер Қултаев томонидан ҳавола этилган лойиҳа иштирокчиларда катта қизиқиш уйғотди. Айниқса, Алишер Қултаевнинг “Бизнес драйв” лойиҳасини амалга ошириш жараёнида ўзи  кузатган ҳолатлар, илк бизнесни бошлаш бўйича тажрибалари иштирокчиларнинг қизғин мунозараларига сабаб бўлди. Хусусан, ўз бизнесини бошлаш ниятида бўлган шахснинг қандай мақсадни амалга оширишни кўзлаб ҳаракат қилиши ва бу борада аниқ стратегияси бўлиши зарурлиги ҳақидаги фикрлар ҳар бир иштирокчини қизиқтирмай қолмади.

Алишер Қултаев “Бизнес драйв” лойиҳасини амалга оширишда тадбиркор ўз  олдига аниқ мақсад қўйган ҳолда ишлаб чиқадиган стратегиясига тўхталар экан, аввало, мақсад бор-у стратегик режаси йўқ бизнеснинг ҳолати қандай бўлишини мисоллар тариқасида тушунтириб ўтди. Яъни, ҳар қандай бизнес аниқ мақсад қўйишдан бошланиши ва албатта, компаниянинг белгиланган ана шу мақсадга  эришиш йўлидаги узоқ муддатли умумий ҳаракатлар режаси мавжуд бўлгандагина компания фаолиятида барқарор ривожланиш, ўсиш бўлиши, кучли рақобатбардош бозорларда айнан ана шу стратегия компания учун кураш воситаси ролини бажаришини иқтисодий жиҳатдан асослаб, тадбиркор учун бизнес мақсад ва стратегиянинг аҳамияти хусусида кенг тушунчалар берди.

Бундан ташқари, бизнес-тренингда амударёлик тадбиркорларга компания бошқарувининг умумий тузилиши, стратегиянинг муҳимлиги, стратегия тузиш, савдо таҳлили инструментлари, тарқатма материаллари, ўсиш ва инқироз, мақсад қўйишнинг смарт модели хусусида ва стратегия тузишнинг энг содда инсрументини “Бизнес драйв” лойиҳаси мисолида кўрсатиб, бу борада кенг кўргазмали ва тарғибот воситалари орқали тушунтиришлар берилди.

Бизнес-тренинг якунида амударёлик тадбиркорлар "Бизнес нимадан бошланади?", "Стратегия нима?", "Маркетинг нима" ва бошқа кўплаб саволларига жавоб олдилар.

Робия ЙЎЛДОШЕВА.