AMUDARYoLIK TADBIRKORLAR UChUN BIZNES-TRENING TAShKIL ETILDI

Muvaffaqiyatga oʻz-oʻzidan erishilmaydi. Har bir yutuq zamirida zahmatli harakat  yotadi. Tadbirkor biznes sohasida oʻz oʻrnini topishi uchun nafaqat mehnat qilishi kerak, balki unga bilim va tajriba ham suv va havodek zarur. Shu sababli ham joylarda tadbirkorlik sohasida yutuqqa erishgan trenerlar ishtirokida biznes-treninglar tashkil qilinmoqda.

Amudaryolik tadbirkor Javlonbek Oʻrozboyev ham yurtdoshlarimizga qulaylik yaratish va tadbirkorlarning bilimlarini oshirish, shu orqali tumanimiz iqtisodiy rivojiga hissa qoʻshish maqsadida oʻz tashabbusi bilan biznes-trening tashkil qildi.

"Biznesni analiz qilish va strategiya tuzish" mavzusidagi treningni "Biznes drayv", "Kitapp" loyihalari asoschisi, Alisher Qultayev va boshqalar oʻtkazishdi.

Alisher Qultayev 1990-yilda Samarqand viloyatida tugʻilgan.

Al-Xorazmiy nomidagi Toshkent axborot texnologiyalari universitetini 2015-yilda tamomlagan. U biznesda 9-yillik tajribaga ega.

Biznes-treningda Alisher Qultayev tomonidan havola etilgan loyiha ishtirokchilarda katta qiziqish uygʻotdi. Ayniqsa, Alisher Qultayevning “Biznes drayv” loyihasini amalga oshirish jarayonida oʻzi  kuzatgan holatlar, ilk biznesni boshlash boʻyicha tajribalari ishtirokchilarning qizgʻin munozaralariga sabab boʻldi. Xususan, oʻz biznesini boshlash niyatida boʻlgan shaxsning qanday maqsadni amalga oshirishni koʻzlab harakat qilishi va bu borada aniq strategiyasi boʻlishi zarurligi haqidagi fikrlar har bir ishtirokchini qiziqtirmay qolmadi.

Alisher Qultayev “Biznes drayv” loyihasini amalga oshirishda tadbirkor oʻz  oldiga aniq maqsad qoʻygan holda ishlab chiqadigan strategiyasiga toʻxtalar ekan, avvalo, maqsad bor-u strategik rejasi yoʻq biznesning holati qanday boʻlishini misollar tariqasida tushuntirib oʻtdi. Yaʼni, har qanday biznes aniq maqsad qoʻyishdan boshlanishi va albatta, kompaniyaning belgilangan ana shu maqsadga  erishish yoʻlidagi uzoq muddatli umumiy harakatlar rejasi mavjud boʻlgandagina kompaniya faoliyatida barqaror rivojlanish, oʻsish boʻlishi, kuchli raqobatbardosh bozorlarda aynan ana shu strategiya kompaniya uchun kurash vositasi rolini bajarishini iqtisodiy jihatdan asoslab, tadbirkor uchun biznes maqsad va strategiyaning ahamiyati xususida keng tushunchalar berdi.

Bundan tashqari, biznes-treningda amudaryolik tadbirkorlarga kompaniya boshqaruvining umumiy tuzilishi, strategiyaning muhimligi, strategiya tuzish, savdo tahlili instrumentlari, tarqatma materiallari, oʻsish va inqiroz, maqsad qoʻyishning smart modeli xususida va strategiya tuzishning eng sodda insrumentini “Biznes drayv” loyihasi misolida koʻrsatib, bu borada keng koʻrgazmali va targʻibot vositalari orqali tushuntirishlar berildi.

Biznes-trening yakunida amudaryolik tadbirkorlar "Biznes nimadan boshlanadi?", "Strategiya nima?", "Marketing nima" va boshqa koʻplab savollariga javob oldilar.

Robiya YOʻLDOShEVA.