Амударё тумани Ички ишлар бўлими ташаббуси билан "Соғлом ва баркамол оила" шиори остида оилавий танловлар ўтказилди

Республикамизда Ички ишлар вазири соврини учун "Соғлом ва баркамол оила" шиори остида 3-сектор ҳудудидаги оилалар ўртасида спорт мусобақалари ва китобхонлик беллашувлари ўтказиб келинмоқда. Аҳоли ўртасида соғлом турмуш тарзини, китобхонликни тарғиб этиш мақсадида ўтказилаётган танловларда сектор ҳудудидаги оилалар иштирок этиб, ўз маҳоратларини синовдан ўтказишмоқда.

Амударё туманида ҳам Ички ишлар бўлими ташаббуси билан худди шундай танловлар ва спорт мусобақалари ўтказилди. «Ёш китобхон оила» ва «Ёш спортчи оила» номи билан ўтказилган мазкур танловларда сектор ҳудудидаги маҳаллаларда яшовчи оилалар қатнашди.

14 декабрь куни 82-сонли мактабда шу муносабат билан ташкил этилган тадбирни туман Ички ишлар бўлими бошлиғининг ўринбосари Бахтиёр Уразов ҳамда туман ҳокими ўринбосари, Маҳалла ва оилани қўллаб-қувватлаш бўлими бошлиғи Алишер Йўлдошевлар очиб беришди. 

Тадбирда сўзга чиққанлар мазкур танловлар Президентимизнинг “Ўзбекистон Республикасида жисмоний тарбия ва спортни янада такомиллаштириш ва оммалаштириш чора-тадбирлари тўғрисида”ги, “Соғлом турмуш тарзини кенг татбиқ этиш ва оммавий спортни янада ривожлантириш чора-тадбирлари тўғрисида”ги Фармонларида кўрсатилган вазифаларни амалга ошириш мақсадида ўтказилаётганини маълум қилишди. Шунингдек, Вазирлар Маҳкамасининг “2020-2025 йилларда китобхонлик маданиятини ривожлантириш ва қўллаб-қувватлаш миллий дастурини тасдиқлаш тўғрисида”ги Қарори ижросини таъминлаш ҳам кўзда тутилганини алоҳида таъкидлаб ўтишди.

Шундан сўнг, тадбирларга старт берилиб, мактабнинг спорт залида спорт мусобақалари беллашувлари, фаоллар залида китобхон оилалар ўз маҳоратларини синовдан ўтказдилар. Мусобақа ва беллашувларда сектор ҳудудидан 6 та оила иштирок этди.

Мазкур мусобақа ва беллашувлар икки йўналиш бўйича ўтказилиб, сектор ҳудудидаги оилалар беллашувида ҳар бир йўналиш бўйича ғолиблар саралаб олинди.

Спортнинг "Қувноқ стартлар", "Стол тенниси", "Шахмат", "Шашка" ҳамда "Бадминтон" турлари бўйича мусобақаларда иштирок этган оилалар биргаликда ўз чаққонликларини, абжир ва зийракликларини намойиш этиб, ғолиблик учун курашдилар. Шунингдек, китобхонлик ҳамда маънавиятни тарғиб этувчи "Энг яхши маънавий етук оила" шиори остида ўтган танловда оилаларнинг билимдонлиги, қанчалик даражада китобларга ошнолиги синовдан ўтказилди. Иштирокчилар баҳру-байт айтишувларда зукколикларини кўрсатиб, ўқиган китоблари, севган асарларидаги қаҳрамонлар ҳақида маълумотлар беришди. Савол-жавоблар викторинасида ҳам бир-биридан қолишмасликка ҳаракат қилишди.

Спорт мусобақаларида фахрли 1-ўринни Бобур номли овулда яшовчи Гучбаевлар оиласи, 2-ўринни Оқ олтин овулида яшовчи Йўлдошевлар оиласи, 3-ўринни Дурунки маҳалласида яшовчи Бобожоновлар оиласи эгаллади. Китобхонлик йўналишида эса Оқ олтин овулида яшовчи Йўлдошевлар оиласи 1-ўрин, Бобур номли овулда яшовчи Гучбаевлар оиласи 2-ўрин, Хитой овулида яшовчи Худойбергановлар оиласи 3-ўрин ғолиблигини қўлга киритдилар.

Муросасиз ва кескин баҳсларга бой тарзда кечган танловлар ғолиблари туман Ички ишлар бўлими бошлиғининг дипломи ҳамда қимматбаҳо совғалари билан тақдирландилар. Сектор ҳудудида биринчи ўринни эгаллаган оилалар вакиллари мусобақаларнинг Қорақалпоғистон босқичида иштирок этадиган бўлишди.

Тадбирдан сўнг намойиш этилган концерт дастури барчага хушкайфият бахш этди.

О.Худойберганова.