“ҚОР МАЛИКАСИ” ОЧИҚ ТУРНИРИ ЎТКАЗИЛДИ

Бадиий гимнастика – олимпиа спорт турларидан бири бўлганлиги туфайли унга мамлакатимизда улкан эътибор қаратилмоқда.

Ўз олдларига эзгу мақсадлар қўйиб, юксак марраларни кўзлаб ушбу нафис спорт тури билан шуғулланаётган ёшлар, ўсмирларнинг  маҳоратларини синовдан ўтказиб бориш мақсадида турли мусобақалар ўтказиб келинмоқда.

21 декбарь куни Амударё тумани Болалар-ўсмирлар спорт мактабида Янги йил байрами олдидан спортнинг бадиий гимнастика тури бўйича “Қор маликаси” деб номланган очиқ биринчилик ўтказилди.

Мусобақада Амударё ва Беруний туманларидан 50 нафар маҳоратли бадиий гимнастикачи қизлар ўзаро беллашдилар. 1-сонли мактаб спорт залида бўлиб ўтган мусобақанинг очилиши худди  байрам тусини олди. Иштирокчилар мактаб остонасида тантанали суратда қарши олинди. Улар спорт залга йиғилиб бўлишгач, саф тортдилар.

Болалар-ўсмирлар спорт мактаби директори ўринбосари Махсуд Кенжаев мусобақа иштирокчиларини Янги йил байрами билан қутлаб, беллашувларда омад ёр бўлишини тилади. Спорт мактаб услубчилари Баҳром Соатов, Зокир Йўлдошевлар ҳам барчани умримизда янги саҳифа очаётган Янги йил билан қутладилар.

Шундан сўнг мусобақаларга старт берилди. Унда 2007-2017 йиллар оралигида туғилган ёш гимнастикачи қизлар навбатма-навбат ўз маҳоратларини намойиш этишди. Катта ёшдаги қизлар 4 хил - халқа, лента, копток, булава каби буюмларда, кичик ёшдаги қизлар эса буюмсиз, тана ҳаракатлари билан ўйин кўрсатдилар.

Айтиш керакки, Амударё тумани Болалар-ўсмирлар спорт мактабида, умумий ўрта таълим, мактабгача таълим муассасаларида гимнастика тўгараклари ташкил этилган бўлиб, уларда тажрибали мураббийлар ёшларга бу нафис спорт тури маҳоратларини ўргатишмоқда.

Бадиий гимнастика тўгаракларида шуғулланиб, техник маҳорат ва мусиқа садолари остида мураккаб тана ҳаракатларини турли буюмлардан фойдаланган ҳолда ифодали бажариб, кучи, эгилувчанлиги, сакровчанлиги, тезкорлиги, мувозанатни тута билиши ва чидамлилигини намойиш этаётган иқтидорли қизлар сафи тобора кенгаймоқда.

Уларнинг спорт тайёргарлигидан кўзлаган асосий мақсади – мамлакат биринчилиги, жаҳон чемпионатларида, нуфузли халқаро мусобақаларда иштирок этиш ва ғолибликка эришиб, мамлакатимиз ва туманимиз спорт шарафини юксалтиришга ҳисса қўшишдир.

Очиқ биринчилик давомида тажрибали бадиий гимнастика мураббийларидан тузилган ҳакамлар ҳайъати аъзолари иштирокчилар бажарган машқларни одилона баҳолаб бордилар.

Амударё тумани Болалар-ўсмирлар спорт мактаби томонидан ташкиллаштирган “Қор маликаси” деб номланган очиқ биринчиликда ғолиб бўлган спортчи қизлар диплом, медаль ва қимматбаҳо совғалар билан тақдирландилар.

Очиқ турнир иштирокчиларни ўз устларида яна ҳам қунт билан ишлаб, маҳоратини ошириб боришга рағбатлантирди, ўз машғулотларига нисбатан масъулиятни янада оширди.

Ойгул РАЖАБОВА.