“УМИД НИҲОЛЛАР-2022” СПОРТ МУСОБАҚАСИНИНГ ТУМАН БОСҚИЧИ ЎТКАЗИЛМОҚДА

Мамлакатимизда ўқувчи-ёшлар ўртасида спортни ривожлантириш, уларни оммавий равишда жисмоний тарбия ва спортга жалб қилишга қаратилган тизимли ишлар амалга оширилмоқда. Бунинг натижасида ёшларимизнинг спортга бўлган қизиқишлари кундан кунга орта бориб, улар соғлом, иродаси мустаҳкам, ватанимизнинг содиқ фарзандлари бўлиб вояга етмоқда.

Ёшларда спортга бўлган ҳавас ва интилишни, жамиятда соғлом турмуш тарзи тамойилларини янада кучайтириш, ёш иқтидорли спортчиларни танлаб олиш, уларда профессионал маҳорат ва кўникмаларни ривожлантириш, спорт турлари бўйича мамлакат терма жамоаларига спорт захирасини тайёрлаш, ўқувчи ва талабаларни спорт машғулотларига узлуксиз жалб этишга қаратилган спорт мусобақалари тизимини янада такомиллаштириш мақсадида 2018 йил 25 октябрь куни Вазирлар Маҳкамасининг қарори қабул қилинган эди.

Мазкур қарор билан умумий ўрта таълим мактаблари ҳамда академик лицейлар ўқувчилари ўртасида “Умид ниҳоллари” спорт мусобақаларининг финал босқичини ҳар уч йилда бир марта Қорақалпоғистон Республикасининг Нукус шаҳрида, вилоят марказларида ҳамда Тошкент шаҳрида ўтказиш тартиби белгиланди.

Республикамиз миқёсида умумий ўрта таълим мактаблари ҳамда академик лицейлар ўқувчи-ёшлари ўртасида “Умид ниҳоллари” спорт мусобақаларининг ҳудудий босқичлари бу йил ҳам юқори савияда ўтказилмоқда.  Иштирокчилар учун байрам тусини оладиган ушбу мусобақа жорий йилда Амударё туманида ҳам кўтаринки руҳда ўтказилмоқда.

Шу кунгача ушбу мусобақанинг мактаблараро, ҳудудий босқичларида спортнинг 14 та тури яъни футбол, велейбол, баскетбол, гандбол, мини футбол, стол тенниси, шахмат ва шашка, бадминтон, енгил атлетика, стритбол, кураш, спорт ва бадиий гимнастика турлари бўйича мусобақалар ўтказилиб, ғолиблар аниқланди. Мусобақалар 1-4, 5-6, 7-8 ва 9-11 синфлар ўқувчилари орасида ўтказилди.

Шу йилнинг 5-6 январь кунларида “Умид ниҳоллари-2022” спорт мусобақаларининг 8 та ҳудудлар ўртасида ҳудудий босқичлари ўтказилди ва ушбу босқич ғолиблари туман босқичига йўлланмани қўлга киритишди. 7 январь куни “Умид ниҳоллари - 2022” спорт мусобақасининг туман босқичига старт берилди. Шу куни спортнинг стритбол, стол тенниси ва кураш турлари бўйича мусобақалар ўтказилиб, ғолиблар аниқланди.

Ушбу мусобақаларда қуйи босқичларда ғолибликка эришган 600 нафар маҳоратли ва эпчил ўқувчилар иштирок этишди. Шунинг 230 нафарини қизлар ташкил қилади. Мусобақанинг ғолиб ва совриндорлари Ўзбекистон “Ёшлик жисмоний тарбия ва спорт жамияти” Амударё тумани ҳудудий бўлинмасининг диплом ва эсдалик совғалари билан тақдирланди.

“Умид ниҳоллари - 2022” мусобақасининг туман босқичида ўзаро баҳс олиб бориб, рақибларидан устун келган жамоа ва ўқувчилар ушбу спорт мусобақасининг финал, яъни Қорақалпоғистон Республика босқичида қатнашиш учун йўлланмани қўлга киритдилар.

Кейинги кунларда ушбу мусобақанинг спортнинг бошқа турлари бўйича туман босқичи баҳслари давом эттирилади. Юқори кайфиятда, ғолиблик учун астойдил интилиб мактаби, яшаш ҳудуди спорт шарафини юқори кўтаришга интилаётган ўқувчи-ёшлар учун ҳаяжонли кунлар ҳали давом этади.

Севара Исмоилова.