ТОМОРҚА ХИЗМАТИНИ КЎРСАТИШ СИФАТИНИ ЯНАДА ЯХШИЛАШ БЎЙИЧА СЕМИНАР БЎЛИБ ЎТДИ

Маълумки, фермер, деҳқон хўжаликлари ва томорқа ер эгалари фаолиятини тубдан такомиллаштириш бўйича Президентимиз томонидан бир нечта қарорлар қабул қилинган. Ушбу қарор ҳужжатлари асосида аҳоли томорқаларидан унумли фойдаланиш, ерга сифатли ишлов бериш борасида кўплаб саъй-ҳаракатлар, тадбирлар амалга оширилмоқда. Амударё туманида ҳам томорқа ер эгалари фаолиятига бағишланган семинарлар ташкил этилимоқда. Бу орқали аҳолининг томорқадан унумли фойдаланиш бўйича тажрибаси янада ошишига замин яратилмоқда.

2022 йил 11 январь куни “Амударё томорқа хизмат” масъулияти чекланган жамияти кластери корхонасида Ўзбекистон Республикаси Президентининг “Томорқадан фойдаланиш самарадорлигини ошириш, шунингдек, аҳолининг тадбиркорлик ташаббусларини молиявий қўллаб-қувватлаш бўйича қўшимча чора-тадбирлар тўғрисида”ги қарорини тарғиб қилиш, томорқа хизмати кўрсатишда кластер корхоналари фаолиятини янада ривожлантириш бўйича семинар бўлиб ўтди.

Семинарда, Ўзбекистон Фермер, деҳқон хўжаликлари ва томорқа ер эгаларини қуллаб-қуватлаш жамғармаси директори Тўлқин Саттаров, Қорақалпоғистон Фермер, деҳқон хўжаликлари ва томорқа ер эгалари кенгаши раиси Қувончбой Нурымбетов, Туман фермерлар кенгаши мутахассислари, тумандаги 49 та овул ва маҳаллаларда иш бошлаётган ҳоким ёрдамчилари иштирок этишди.

Семинарда аҳоли томорқасидан самарали фойдаланиб, йилига 2-3 мартадан ҳосил олиш, маҳсулотлар ишлаб чиқариш ҳажмини камида 1,5 бараварга кўпайтириш юзасидан амалга оширилган ишлар ва кўрилган чоралар тўғрисида ахборот берилди.

Бу борада, тумандаги “Амударё томорқа хизмат” масъулияти чекланган жамияти кластер корхонасининг фаолияти алоҳида эътирофга лойиқлиги таъкидланди. Корхона томонидан Фермерлар кенгаши жамғармаси маблағларидан 5 млрд. сўм кредит олинган ва 12 йўналиш бўйича томорқаларга хизмат кўрсатиш фаолияти йўлга қўйилган.

Маълумот учун айтиб ўтиш жоизки, Амударё туманида 39 минг 406 нафар томорқа ер эгалари ихтиёрида 6 минг 652,2 гектар экин ери мавжуд. Кенгаш ҳузуридаги жамғарма томонидан кўчат сотиб олиш учун тадбиркорлик субъектлари, фермер хўжаликлари ва “Томорқа хизмати” масъулияти чекланган жамиятига жами 500 млрд. сўм маблағлар ажратилган.

Амударё туманидаги Оқ олтин овули ҳудудида яшовчи фуқаро Янгибой Қурбаниязов, Қиличбой овулида яшовчи Бахтиёр Манглиев, Бобур овулида яшовчи Абдураҳмон Матсапаев, Чойкўл овулида яшовчи Маҳмуджон Норбоев, Қорамон маҳалласи ҳудудида яшовчи Атахан Утамуратовлар хонадонларида саримсоқпиёз, пиёз, ва бошқа кўкатлар етиштириш орқали бир йилда ҳар бир томорқадан 25-30 млн. сўм даромад олинган. Томорқа орқали юқори даромад олаётган хонадонлар тажрибаси бошқа маҳаллаларда ҳам тарғиб қилиб борилмоқда.

Туманнинг Оқ олтин, Тўлқин, Қиличбой, Бобур каби қатор ҳудудларидаги томорқа ер эгаларининг асосий фаолият тури иссиқхона ҳисобланади. Ушбу йўналишида фаолият юритаётган томорқа ер эгаларининг улуши тумандаги томорқа ер эгалари сонининг 5 фоизини ташкил этади. Иссиқхоналарда турли сабзавот экинлари экилиб, туман аҳолисининг дастурхони мўл-кўл бўлишига хисса бўлиб қўшилмоқда.

Шу ўринда айтиб ўтиш жоизки, Амударё туманидаги “Амударё томорқа хизмат” масъулияти чекланган жамиятига қарашли кластер корхонаси томонидан “Бир маҳалла – бир маҳсулот” тамойили асосида тумандаги Тўлқин, Оқ олтин, Хизр эли, Қипчоқ, Қангли овул ва маҳаллаларига турли хилдаги сабзавот экинлари кўчатлари етказиб берилмоқда. Айни кунларда ҳаво ҳарорати паст бўлишига қарамай томорқа ер эгалари ўз иссиқхоналарига сабзавотлар экиб, аҳоли эҳтиёжларини қондирмоқда.

Халқимиз томонидан бежизга, ер бойлиги – эл бойлиги деб айтилмаган. Ҳар бир фуқаро ўз томорқасидан унумли фойдаланса, ўз оиласи, яқинлари ва маҳалладошлари дастурхонига тўкинлик бахш этибгина қолмасдан, оилавий бюджети учун ҳам катта фойда келтирган бўлади. Бунинг учун эса Амударё туманида барча шарт-шароитлар яратилган.

Ф.Эшимбетова.