ҲАМЖИҲАТЛИКДА ҚИЛИНГАН МЕҲНАТДА БАРАКА БЎЛАДИ

Инсон дунёда меҳнат билан улуғ мартабаларга эришади. Кейинги йилларда Президентимиз Ш.Мирзиёев  ташаббуси билан аграр соҳага, халқимизнинг ризқи бутун, дастурхони тўкинлиги йўлида ёзнинг жазирамаси-ю, қишнинг қаҳратонида ҳам тинмай фидойилик қиладиган қишлоқ хўжалиги меҳнаткашларига улкан эътибор қаратилмоқда. Қишлоқ  хўжалиги ходимлари куни белгилангани, аграр соҳада фаолият юритаётганлар учун кўкрак нишонлари таъсис этилгани ҳам шулар жумласидандир.

Мен “Қишлоқ хўжалиги фидойиси” кўкрак нишони билан тақдирланган кунимни ҳаётимнинг энг ёрқин кунларидан бири бўлди, дея оламан. Меҳнатларинг эътироф этилиши одамга яна ҳам куч-қувват бағишлайди. 2004 йилда “Боғи эрам” фермер хўжалигини ташкил этган эдим. Шундан бери номи бир неча марта ўзгарди. Бироқ ҳар йили экин майдонлардан мўл ҳосил етиштириб келаяпмиз.

Тилсиз замин бағрига уруғ қадаб, ҳосил ундириш осон эмас. Бунинг учун ернинг тилини билиш, омилкорлик  керак, агротехник тадбирларни ўз вақтида бажариш лозим. Яна деҳқонларда йил-йилга ўхшамайди, деган  ибора бор. Бу гоҳ қурғоқчилик, гоҳ намгарчилик юқори бўлса-да, ҳосил ундиришнинг чорасини қилиш керак, дегани.

Биз хўжалигимиз аъзолари билан ҳамжиҳатликда қилган меҳнатларимиз туфайли 2021 йилда ҳам деҳқончиликнинг барча турлари бўйича режаларимизни ортиғи билан адо этдик ва маҳсулот етиштириш харажатлари, иш ҳақларидан ташқари, 500 миллиондан зиёд соф даромад олдик. 34 гектар ердаги буғдойдан 60-70 центнердан ҳосил етиштирдик. Пахта майдонларимиз ҳосилдорлиги гектарига 36-45 центнергача бўлди.

Хўжалигимизда деҳқончиликдан олинаётган даромадларимиздан янги техникалар харид қилаяпмиз. Ҳозир ерларни текислашдан тортиб, экиш, парваришлаш, ҳосилини  йиғиштириб олишгача бўлган барча ишларда ўз техникаларимиздан фойдаланамиз. Ўтган йилги даромадимиздан лазер қурилмали ер текислагич агрегатини харид қилганимиз туфайли экин майдонларимиз 100 фоиз текисланди ва суғоришга тайёрланди. Бундан ташқари, экин майдонларимизни сув тежовчи технологиялар  ёрдамида суғориш чораларини  кўраяпмиз. 100 тонналик сиғимли музлаткич омборхонамизда 2 гектарлик боғимизда етиштирилган мевалар, шунингдек, сабзавотлар сақланаяпти. 8 нафар механизатор, 40 нафар пудратчиларимизнинг ойлик иш ҳақлари доимо ўз вақтида ҳисоб-китоб қилиб борилаяпти.

Ўтган йили хўжалигимизнинг 14 гектар ғалладан бўшаган ерида  пудратчиларимизга ва ҳудудимиздаги 20 та кам таъминланган оилаларга такрорий экин экиб бердик. Эҳтиёжманд 10 та оилани оталиққа олиб, вақтида моддий-маънавий қўллаб келаяпмиз.

Фермер хўжалигини бошқаришдан ташқари, мана уч йилдирки, туман Деҳқон, фермер ва томорқа ер эгалари Кенгашига ҳам раислик қилиб келаяпман. Кенгашимиз томонидан туманимиз аҳолисини томорқа ерлардан самарали фойдаланиш тарғиб этилиб, бу борада қатъий назорат ҳам олиб борилаяпти, уларга деҳқон, фермер хўжаликларига зарур тавсия ва кўрсатмалар ҳам берилаяпти. Меҳнатларимиз маҳсулини юртдошларимиз дастурхонида кўриш ҳам улкан бахт.

Илҳом ПОЛВОНОВ, туман Фермер, деҳқон хўжаликлари ва томорқа ер эгалари Кенгаши раиси,

“Қишлоқ хўжалиги фидойиси” кўкрак нишони соҳиби.