Қорақалпоғистон Республикаси секторлари раҳбарлари, вазирликлар, муассаса ва ташкилот раҳбарларининг ёшлар билан учрашуви бўлиб ўтди

4 февраль куни Амударё туманининг Қипчоқ шаҳарчаси ҳудудида жойлашган 21-сонли Болалар мусиқа ва санъат мактаби биносида Қорақалпоғистон Республикаси секторлари раҳбарлари, вазирликлар, муассаса ва ташкилот масъуллари ҳамда туманимиздаги бир қатор идора-ташкилот вакиллари ва ёшлар иштирокида онлайн тарзда сайёр қабул ўтказилди.

Қабул аввалида Халқ қабулхоналарининг доимий эътибор марказида бўлиб келаётган долзарб ижтимоий масала – ногиронлиги бўлган шахсларга ижтимоий ёрдам кўрсатиш мақсадида имконияти чекланган фуқароларга ногиронлик аравачалар топширилди.

I гуруҳ ногиронлиги бўлган фуқаролар Сапаргул Неъматова, Зокиржон Бобожанов, Отабек Шукуруллаев ва Анвар Аметовларга ногиронлик аравачалари берилди.

Ёрдамга муҳтож фуқароларга ижтимоий кўмак кўрсатилишида ҳоким ёрдамчилари томонидан маҳаллабай ва хонадонбай ўрганиш ишлари йўлга қўйилганлиги алоҳида эътиборга моликдир. Ҳоким ёрдамчилари ўзлари бириктирилган маҳаллаларда ижтимоий ҳимояга муҳтож фуқароларнинг яшаш шароитини ўрганиб амалий ёрдам кўрсатишмоқда.

Сайёр қабулда туманимизнинг турли ҳудудларидан ёшлар иштирок этишиб ўз муаммолари билан масъулларга мурожаат қилишди. Учрашувда 60 нафардан ортиқ ёшлар қатнашиб, турли мазмундаги жами 23 та мурожаат келиб тушди.

Туман ҳокими ўринбосари Маҳмуд Шерметов ёшларга мурожаат қилиб, мавжуд муаммо ва таклифлар билан бемалол мурожаат қилишлари мумкинлигини ва албатта ҳар бир мурожаат эътибордан четда қолмаслигини таъкидлади.

Шундан сўнг ёшларнинг мурожаатлари тингланди.

Туманимиздаги Болалар ва ўсмирлар спорт мактабида спортнинг карате тури бўйича тренер Акмал Раҳимов 18-20 февраль кунлари Бишкекда бўлиб ўтадиган турнирда 4 нафар шогирдининг йўл харажатлари қоплаб берилишида амалий ёрдам сўраб мурожаат қилди. Акмал Раҳимовга мурожаат албатта кўриб чиқилиб, тез орада ижобий ҳал қилиниши маълум қилинди.

Бундан ташқари, Бештом маҳалласида истиқомат қилувчи ёш тадбиркор Асадбек Юсупов, туманнинг олис ҳудудида ўқув маркази очишда ҳуқуқий ва амалий ёрдам сўраб мурожаат қилди.

Шунингдек, Бештом маҳалласида истиқомат қилувчи ёшлардан Азамат Мухтаров ўз маҳалласи ҳудудидаги фермер хўжаликларидан бирида 15 гектар майдонда ўзаро келишув асосида деҳқончилик билан шуғулланиб келаётганлигини, бундан буёғига ушбу ерларда ўз чорвачилик фаолиятини бошлаш истаги борлигини ҳамда бунда ҳуқуқий ёрдам берилишини сўраб мурожаат қилди.

Шунингдек, ҳудуд ёшлари ва тадбиркорлар асосан бандлик, имтиёзли кредит олиш, тикув машинаси олишда субсидия ажратилиши, тўлов-контрактнинг бир қисмини тўлашда кўмак сўраб ва бошқа масалаларда Қорақалпоғистон Республикаси секторлари масъулларига мурожаат қилди.

Келиб тушган мурожаатларнинг аксарияти жойида ҳал этилиб, айримларига қонуний тушунтириш берилди. Муддат талаб қилувчи мурожаатлар эса, тегишли масъуллар томонидан ўрганиб чиқилиши маълум қилинди.

Шунингдек, cайёр қабулда мурожаатларинг ҳеч бири эътибордан четда қолмаслиги ва ҳар бир мурожаат имкон қадар ижобий ечим топиши таъкидланди.

Шундан сўнг ёшларга, она Ватанимиз учун муносиб фарзанд бўлишга чорловчи “Темур” бадиий фильми намойиш этилди.

Ўтказилаётган сайёр қабуллар халқимизнинг узоғини яқин қилиб, уларга ҳар томонлама қулайлик яратибгина қолмасдан, ватанимиз келажаги бўлган ёшларнинг давлат идораларига бўлган ишончини янада мустаҳкамлашга хизмат қилади.

Туман ҳокимлигининг ахборот хизмати