ШИФОКОРЛАР АҲОЛИ ЎРТАСИДА СОҒЛОМ ТУРМУШ ТАРЗИНИ ҚЎЛЛАБ-ҚУВВАТЛАШ БЎЙИЧА ТАДБИРЛАР ЎТКАЗИШМОҚДА

Мамлакатимизда аҳоли саломатлигини муҳофаза қилишда профилактика устувор вазифа сифатида белгиланган. Аҳоли орасида соғлом турмуш тарзини кенг тарғиб қилиш, жисмоний фаолликни оммалаштириш борасида амалга оширилаётган ишлар кўламини янада кенгайтиришга алоҳида эътибор қаратилмоқда. Бу борадаги вазифаларни таъминлашга қаратилган Президент Фармон ва Қарорлари соҳани ривожлантиришда муҳим дастуриламал бўлмоқда.

Амударё туманида ҳам Тиббиёт бирлашмаси шифокорлари, шунингдек, ўрта тиббиёт ходимлари томонидан аҳоли орасида юқумли ва юқумсиз касалликларнинг олдини олиш бўйича турли соғломлаштириш тадбирлари ўтказилмоқда.

Тиббиёт бирлашмасида Аҳолининг соғлом турмуш тарзини қўллаб-қувватлаш ва жисмоний фаоллигини ошириш бўлими ташкил этилган бўлиб, ушбу бўлимда шифокор ходимлар фаолият юритиб келмоқда. Аҳоли саломатлигини мустаҳкамлашга оид аниқ чора-тадбирлар ишлаб чиқиш, соғлом турмуш тарзини тарғиб қилиш, зарарли одатларга қарши курашиш, тиббий маданиятни ривожлантириш, жисмоний тарбия-соғломлаштириш ва оммавий спорт ҳаракатини тиббиёт профилактикаси билан интеграциялаш, бу борада оммавий тадбирларни ўтказиш улар фаолиятининг асосий йўналишлари этиб белгиланган.

Бўлим ходимлари иши маҳаллабай усулда ташкил қилиниб, туманнинг барча ҳудудларидаги оилавий поликлинка ва оилавий шифокорлик пунктларида саломатлик бурчаклари ҳамда саломатлик мактаблари ташкил қилинди. Ундан ташқари, аҳоли ўртасида турли тадбирлар ташкил этилиб, “Спорт саломатлик гарови”, “Жисмоний фаоллик ва оммавий спорт”, “Хонадонларга эслатма”, “Covid-19нинг юқиш йўли ва профилактикаси” каби мавзуларда эслатмалар ва микроплакатлар тарқатилиб келинмоқда.

Ўтган давр мобайнида “Тоза қўллар ва тўғри нафас олиш” акцияси, нафис гимнастика бўйича кўргазмали чиқишлар, фаол юриш тадбирлари ташкил этилди ва уларда тиббиёт бирлашмаси ва маҳалла фуқаролари қатнашишди. “Тўғри овқатланиш – соғлом ҳаёт демакдир” ҳафталигида туман бўйича саломатлик дарслари, учрашувлар ва давра суҳбатлари ўтказилди. Мактабларда, маҳаллаларда, аҳоли кўп тўпланадиган жойларда бўлиб ўтган ушбу тадбирларга имкон борича турли ёшдаги фуқаролар жалб этилди.

Жорий йил бошида Ватан ҳимоячилари куни муносабати билан тумандаги ҳарбий қисмда уларнинг оила аъзолари билан Covid-19нинг юқиши ва унинг олдини олиш, эмланиш, соғлом овқатланиш, жисмоний фаоллик, шахсий гигиена, зарарли одатлар, репродуктив саломатлик мавзуларида давра суҳбатлари уюштирилди. Барча ҳудудлардаги тиббиёт масканларида саломатлик бурчаклари ҳамда саломатлик мактаблари фаолияти йўлга қўйилди. Бирламчи тиббий-санитария ёрдами муассасаларида 40 ва ундан катта ёшдаги аҳоли орасида юқумли бўлмаган касалликлар хавф омилларини аниқлаш мақсадида Соғлиқни сақлаш вазирлигининг тегишли буйруғи ижроси бўйича январь ойида 4774 нафар 40 ёшдан ошган фуқаролар скринингдан ўтказилди ва уларга оммавий жисмоний фаоллик, соғлом овқатланиш, шахсий гигиена эмлашнинг аҳамияти бўйича тушунчалар берилди.

Ҳафтанинг душананба кунлари “Стрессга қарши кураш куни”, сешанба кунлари “Туз ва шакарни чеклаш куни” аҳоли кўп тўпланадиган майдон, бозор, хиёбонларда, корхона ва муассасаларда 18 ёш ва ундан катта ёшдаги аҳоли орасида антропометрик ўлчовлар ва қисқа саволнома асосида тадбирлар ташкил килиниб, тегишли тавсиялар берилмоқда.

“Тамакисиз кун” деб белгиланган чоршанба кунларида ҳам акциялар ўтказилиб, таълим муассасалари, корхона ва муассасаларда тамакининг инсон организмига зарарли таъсири бўйича тадбирлар ўтказилмоқда. Пайшанба кунлари “Соғлом овқатланиш куни” деб номланиб, маҳаллалар, корхона-ташкилотларда кўргазмали равишда соғлом овқатланиш тамойиллари бўйича “Саломатлик дарслари” ташкил килиниб, иштирокчиларга тегишли маслаҳатлар берилмоқда.

“Пиёда юриш” ва “Саломатлик” куни деб белгиланган жума ва шанба кунларида Тиббиёт бирлашмаси, оилавий поликлиника ва оилавий шифокорлик пунктлари майдончалари, марказий ўйингоҳларда гимнастрада, фаол ва спортча юриш тадбирлари ташкил этилиб, турли ёшдаги фуқаролар иштироки таъминланмоқда.

Соғлом турмуш тарзида одамлар саломатлигига таъсир кўрсатувчи зарарли омиллар бўлмаслиги, инсон улардан онгли равишда ўзини четга олиши керак. Бу борада кенг тушунчалар бериш, туманимиз аҳолисининг тиббий маданиятини янада ошириш ҳамда бу борадаги ҳукумат қарорлари ижросини, аҳоли саломатлигини таъминлаш тиббиёт ходимларининг асосий вазифаларидан ҳисобланади.

Жумабой Явкашев, ТТБ Аҳолининг соғлом турмуш тарзини қўллаб-қувватлаш ва жисмоний фаоллигини ошириш бўлими мудири.