Она диёрим

Хаёлдан кетмайди кеча-ю кундуз,

Қаерда бўлса-да, соғинч-хуморим.

Мен учун дунёда ягона-ёлғиз,

Сен ўзинг фахримсан, ҳам ифтихорим,

Гўзал Ўзбекистон-она диёрим.

Элларнинг ичида эрур сараси,

Бепоён ерлари, тоғ-у дараси.

Ўзингсан гавҳарим-кўзим қораси.

Бўйнимдаги маржон, тилла туморим -

Гўзал Ўзбекистон-она диёрим.

Санъатига бугун тан берди жаҳон,

Довруғини кўриб, қолди лол-ҳайрон.

Ўғил-қизи бари ботир, паҳлавон.

Шу сабаб дилимда йўқдир-ғуборим,

Гўзал Ўзбекистон-она диёрим.

Олма, анор, узум меванинг тури,

Оллоҳ назар солган, йўқ, бунинг сири.

Кўрган ўзи айтар, жаннатнинг бири.

Тўрт фасли баравар: ёз-у баҳори,

Гўзал Ўзбекистон-она диёрим.

Ўзбек элим доим ўзига бекдир,

Ўзгалардан асло ҳеч ками йўқдир.

Бугун ҳаётидан кўнгиллар тўқдир,

Қанча фидо қилсам, арзийди борим,

Гўзал Ўзбекистон-она диёрим.

Мустақиллик - улуғ фаровон ҳаёт,

Мустақиллик билан эл-у юрт обод.

Мустақиллик бўлсин мудом барҳаёт,

Шомурод, абадий бўлсин шиорим -

Гўзал Ўзбекистон-она диёрим.