Ona diyorim

Xayoldan ketmaydi kecha-yu kunduz,

Qayerda boʻlsa-da, sogʻinch-xumorim.

Men uchun dunyoda yagona-yolgʻiz,

Sen oʻzing faxrimsan, ham iftixorim,

Goʻzal Oʻzbekiston-ona diyorim.

Ellarning ichida erur sarasi,

Bepoyon yerlari, togʻ-u darasi.

Oʻzingsan gavharim-koʻzim qorasi.

Boʻynimdagi marjon, tilla tumorim -

Goʻzal Oʻzbekiston-ona diyorim.

Sanʼatiga bugun tan berdi jahon,

Dovrugʻini koʻrib, qoldi lol-hayron.

Oʻgʻil-qizi bari botir, pahlavon.

Shu sabab dilimda yoʻqdir-gʻuborim,

Goʻzal Oʻzbekiston-ona diyorim.

Olma, anor, uzum mevaning turi,

Olloh nazar solgan, yoʻq, buning siri.

Koʻrgan oʻzi aytar, jannatning biri.

Toʻrt fasli baravar: yoz-u bahori,

Goʻzal Oʻzbekiston-ona diyorim.

Oʻzbek elim doim oʻziga bekdir,

Oʻzgalardan aslo hech kami yoʻqdir.

Bugun hayotidan koʻngillar toʻqdir,

Qancha fido qilsam, arziydi borim,

Goʻzal Oʻzbekiston-ona diyorim.

Mustaqillik - ulugʻ farovon hayot,

Mustaqillik bilan el-u yurt obod.

Mustaqillik boʻlsin mudom barhayot,

Shomurod, abadiy boʻlsin shiorim -

Goʻzal Oʻzbekiston-ona diyorim.