Туманимизнинг 2-сектори ҳудудида Ёшлар форуми ўтказилди

Ёшлар – ҳар бир давлатнинг келажагини, салоҳиятини белгиловчи муҳим ижтимоий қатлам саналади. Зеро, ҳар бир жамиятнинг ҳолати, тақдири ва истиқболи унда яшаётган ёшларнинг салмоғи, маънавияти ва онглилиги даражаси билан белгиланади. Ёшлар жамиятнинг эртанги келажаги, унинг фаол аъзоси, таъбир жоиз бўлса жамият эртасининг муносиб ворисларидир. Мазкур нуқтаи назарга кўра ёшлар давлат ва жамият томонидан доимий эътиборда бўлади.

Ушбу мақсад ва вазифалардан келиб чиққан ҳолда, қолаверса, Ўзбекистон Республикаси Президентининг “Маҳаллаларда ёшлар билан ишлаш тизимини тубдан такомиллаштириш чора-тадбирлари тўғрисида”ги қарори ижросини таъминлаш мақсадида 10 февраль куни туман ҳокимлиги, Амударё туман туризм ва спорт бўлими, Ёшлар ишлари агентлиги ва бошқа кўплаб ҳамкор ташкилотлар билан биргаликда Амударё туманининг 2-сектори ҳудудидаги маҳаллаларида яшовчи ёшлар иштирокида “Янги Ўзбекистон ёшлари, бирлашайлик!” шиори остида спорт мусобақалари ва спорт тадбирлари ўтказилди.

Форум Ўрта қалъа овули ҳудудидаги Манғит айланма йўлида “Саломатлик учун беш минг қадам” шиори остида пиёда юриш марафони ва эрталабки бадантирбия машқлари билан бошланди. Мазкур марафонга маҳалла ёшларининг 500 нафардан ортиғи қамраб олинди. Маълумот учун, Ўрта қалъа овул фуқаролар йиғиида 14 минг 335 нафар ёшлар истиқомат қилишади.

Шунингдек, ҳудуддаги 64-сонли умумтаълим мактабида “Ёш китобхон” кўрик танлови ўтказилиб, унда туманимизнинг турли ҳудудларидан ташриф буюрган ёшлар иштирок этишди ва ўз билимларини синовдан ўтказишди.

Бундан ташқари, ёшларни тадбиркорлик соҳасига жалб этиш, ишбилармонлик қобиляти бор ёшларни эрта аниқлаш, ишсиз аёл-қизларнинг касб-ҳунар эгаллашлари учун қизиқиш уйғотиш мақсадида ўз тикувчилик фаолиятини 2009 йилда бошлаган Тамара Юсупованинг тикувчилик корхонасига саёҳат ташкил қилинди. Саёҳат давомида ҳам оиласига даромад келтириб, ҳам туман иқтисоди юксалишига ҳисса қўшаётган фаол тадбиркор аёл ёшларга тадбиркорлик бўйича ўз кўрсатма ва тавсияларини берди.

Давлатимиз раҳбари томонидан ёшлар орасида соғлом турмуш тарзини ва спортни тарғиб қилиш давлат сиёсати даражасига кўтарилган бир вақтда ўтказилаётган ушбу тадбирлар эртанги кун эгаларининг униб-ўсишида катта аҳамият касб этади, албатта. Айниқса, келажак авлодни дунёга келтирувчи аёл-қизларнинг ўз ҳаётларида соғлом турмуш тарзини тадбиқ этиши долзарб масаладир.

Шу мақсадда, Амударё туманиининг Янгиобод маҳалласи ҳудудидаги 40-сонли умумтаълим мактабида аёл-қизлар иштирокида волейбол мусобақаси ўтказилди. Кескин ва муросаси руҳда ўтказилган мусобақада 1-ўринни Куюк кўпир овули, 2- ўринни Тош ёп овули ва 3-ўринни Тўлқин овули жамоалари эгаллашди. Мазкур мусобақага маҳаллалардан 64 нафар аёл-қизлар қамраб олинди.

Шундан сўнг ўғил ва қиз болалар иштирокида киберспорт, шахмат ва шашка бўйича мусобақалар ўтказилиб, мазкур мусобақаларда 62 нафар ёшлар иштирок этишди.

Шунингдек ёшлар ўртасида спортнинг мини футбол тури бўйича Фаровон маҳалласи ҳудудидаги сунъний қопламали мини футбол майдонида мусобақа ўтказилиб, мусобақада туманимизнинг турли ҳудудларидан ташриф буюрган 144 нафар маҳалла ёшлари иштирок этди. Шиддатли ва муросасиз кечган жамоалар учрашувида 1- ўринни Ўрта қалъа, 2- ўринни Оқ олтин овули ёшлари, ва 3- ўринни Намуна маҳалласи ёшларидан иборат жамолар эгаллашди.

Шундан сўнг Дўстлик маҳалласи ҳудудидаги Болалар-ўсмирлар спорт мактаби стадионида камондан ўқ отиш, тир, стол тенниси, WORKOUT, стритбол, енгил атлетиканинг 100 метрга югуриш туридан мусобақалар ўтказилди. Бу мусобақаларга жами 227 нафар ёшлар қамраб олиниди.

Ўтказилган мусобақа ва танловларда ғолиблар туман Туризм ва спорт бўлими томонидан муносиб равишда тақдирланди.

Жумладан, 1-, 2- ва 3-ўринни эгаллаган 139 нафар ғолибларга Хоразм вилоятининг Хива шаҳрига, Республикамиздаги Мўноқ туманига, ва Нукус шаҳридаги Савицкий музейига бир марталик саёҳатга йўлланмалар берилди.

Бундан ташқари, форум доирасида тумандаги 92-02 ҳарбий қисм қурол-аслаҳаларининг кўргазмаси, ҳарбий машқлари, ҳудуддаги гимнастика тўгараги аъзоларининг чиқишлари ёшлар эътиборига тақдим қилинди.

Таъдбир туман Маданият бўлими томонидан тайёрланган гала концерт дастури билан давом эттирилди. Концерт давомида “Гулҳан ёқиш” маросими ўтказилди, бу эса барча ёшлар дилида ўзгача тассурот қолдирди. Маросимда тумандаги иқдидорли ёшлар томонидан жонли ижродаги куй-қўшиқлар билан янада завқли тарзда, кўтаринки руҳда давом этди.

Кун давомида барча ўтказилган мусобақалар, танловлар, ҳарбий чиқишлар ва концерт дастурларига 2-сектор ҳудудидан жами 1000 нафардан ортиқ ёшлар жалб қилинди. Ёшлар форуми доирасида ўтказилган мусобақалар, маҳорат дарслари, концерт дастурлари орқали ёшлар кўплаб дўстлар орттириш билан бирга бўш вақтларини мазмунли тарзда ўтказишди.

Туман ҳокимлигининг ахборот хизмати