Президент қарорининг мазмун-моҳияти юзасидан туман Маданият бўлимида йиғилиш бўлиб ўтди

Халқимизнинг кино, театр, мусиқага, умуман, санъатга меҳри, қизиқиши ҳар доим юқори бўлган. Аксарият хонадонларда рубоб, дутор ва доирага кўзингиз тушади. Бугун санъат ва маданият ривожи янги босқичга чиқди, десак муболаға бўлмайди. Буни мамлакатимизда ўтказилаётган мақом, бахшичилик каби халқаро фестиваллар мисолида ҳам кўришимиз мумкин. Ана шундай кенг миқёсдаги маданий анжуманлар, мамлакатимизда соҳага кўрсатилаётган юксак эътибор туфайли маданият ва санъат халқимизнинг кундалик турмушида тобора юксак ўрин эгаллаб бормоқда.

Шу маънода, давлатимиз раҳбарининг “Маданият ва санъат соҳасини янада ривожлантиришга доир қўшимча чора-тадбирлар тўғрисида” ги қарори санъатсевар халқимиз учун муҳим воқеа бўлди. Ҳужжат билан аҳоли, айниқса, олис ҳудудларда истиқомат қиладиган фуқароларга маданий дам олиш хизматларини кўрсатиш даражасини ошириш, умумтаълим мактаблари, мусиқа ва санъат мактабларида таълим сифатини янада ошириш, ўқувчиларни мусиқа дарсликлари ва чолғу асбоблари билан таъминлашга доир қўшимча-чора тадбирлар белгиланди. Ушбу қарорда белгилаб берилган вазифаларни амалиётга тадбиқ этиш ҳамда ижросини таъминлаш мақсадида Амударё тумани Маданият бўлими биносида йиғилиш бўлиб ўтди.

Йиғилиш туман Маданият бўлими мудири Шуҳрат Юсупов, 9-сонли Болалар мусиқа ва санъат мактаби директори Йўлдош Абдалов ҳамда 21-сонли Болалар мусиқа ва санъат мактаби директори Аҳмад Жумабоевлар бошчилигида ўтказилди.

Мазкур йиғилишда туман Маданият бўлими, Халқ таълими бўлими ҳамда тумандаги мусиқа ва санъат мактабларида фаолият юритувчи ходимлар, умумтаълим мактаблардаги мусиқа фани ўқитувчилари қатнашиб, қарорнинг мазмун-моҳияти ва аҳамияти ҳақида янада кенгроқ тушунчаларга эга бўлдилар.

 Қарорга мувофиқ 2022-2023 ўқув йилидан бошлаб таълим муассасаларида ўқувчи ва талабаларинг маданий билим ва кўникмаларини, миллий маданиятга муҳаббатини ошириш, ёш истеъдодларни аниқлаш ва қўллаб-қувватлашга қаратилган бир қатор чора-тадбирлар амалга оширилади.

 Хусусан, умумий ўрта таълим муассасаларида ўқувчиларга миллий мусиқа чолғуларидан камида биттасини чала олиш маҳорати ўргатилади ҳамда бу ҳақда уларнинг таълим тўғрисидаги ҳужжатларига тегишли қайд киритилади.

Шунингдек, мусиқа фани ўқитувчиларининг миллий чолғуларнинг камида биттасини, 2022-2023 ўқув йилидан бошлаб эса камида 3 тасини чала олиш маҳоратига эга бўлиши мажбурий ҳисобланади.

Мусиқа дарсларида “Ҳаётимга ҳамроҳдир чолғу” шиори остида чолғу ижрочилиги машғулотлари йўлга қўйилади.

Йиғилишда ушбу қарор Тараққиёт стратегиясини “Инсон қадрини улуғлаш ва фаол маҳалла йили”да амалга оширишга доир давлат дастурига ҳамоҳанглиги, муҳими, ушбу ҳужжат энг олис ҳудудлар аҳолисининг ҳам мусиқага ошно бўлиб, халқимизнинг маънавий савияси янада юксалишига хизмат қилиши таъкидланди.

Албатта, давлатимиз раҳбари томонидан қабул қилинаётган қарорлар ва фармонлар негизида эртанги кун эгалари бўлган ёш авлоднинг келажаги ётади. Шундай экан, истеъдодли ёшларни ҳар томонлама қўллаб-қувватлашга ҳар биримиз масъулмиз.

Ф.Эшимбетова