ШАҲИДЛАРНИ ЙЎҚЛАНГ ДУОДА

(Афғон уруши қатнашчиларига).

Афғон элда қолганлар ҳаққи,
Мангу қўним топганлар ҳаққи.
Бағри қонга тўлганлар ҳаққи,
Бир қиз қучмай ўлганлар ҳаққи,
Шаҳидларни йўқланг дуода.

Орзулари осмонча бўлиб,
Байнилминал бурчим деб билган.
Ўзга юртда жон таслим қилиб,
Ўн гулидан тўққизи сўлган,
Шаҳидларни йўқланг дуода.

Нолалари кўкларга етган,
Кўкси ўйиқ оталар ҳаққи.
Зор-зор йиғлаб дунёдан ўтган,
Қадди эгик оналар ҳаққи,
Шаҳидларни йўқланг дуода.

Уй тўрида михга илинган,
Эгасини кутар кемтик нон.
Юрт жамоли насиб қилмаган,
Қасамёдга содиқ қолган жон,
Шаҳидларни йўқланг дуода.

Дайди ўқ еб қанча қоракўз,
Тобутларда келишди қайтиб.
Истиқлолни кўрмади афсус,
Поки руҳларини шод этиб,
Шаҳидларни йўқланг дуода.

Асабингиз бузишар баъзан,
Нодон каслар бужмайтиб афтин.
Ёнингизда,қаторда ҳамон,
Фарзанд суйиб,кўрмади бахтин,
Шаҳидларни йўқланг дуода.

Мусофирлик қисмати оғир,
Кечмишингиз таъмлари тахир.
Учратганди аламли тақдир,
Ёдда сақлаб,дўстларни бир-бир,
Шаҳидларни йўқланг дуода.

Завқ,шавқ ила ёнарди кўзи,
Ёш эди у,навқирон йигит.
Айтолмади энг сўнгги сўзин,
Юрагингиз кемирганда дард,
Шаҳидларни йўқланг дуода.

Бугун сафда юрганингиз бахт,
Оловларда синади ҳаёт.
Дилингизда чандиқ умрбод,
Юз ўгирди улардан омад,
Шаҳидларни йўқланг дуода.

Жангу жадаллардан асорат,
Тўрт мучалда армонли қусур.
Қўл,оёқда,кўздаги иллат,
Берса ҳамки,туну кун озор,
Шаҳидларни йўқланг дуода.

Туб бурилиш,ўзгарди замон,
Ҳурлик келди,озоддир Ватан.
Ноз неъматга тўла дастурхон,
Ўтган кунлар қайтмас ҳеч қачон,
Шаҳидларни йўқланг дуода.

Тугамайди дунёнинг ками,
Шодон кулиб яшангиз ҳар дам.
Унутганча ташвишу ғамни,
Тетик бўлиб тўқсон,юзда ҳам,
Шаҳидларни йўқланг дуода.

Аҳмадхон Обидхон, Ўзбекистон ёзувчилар уюшмаси аъзоси, шоир, ИИВ фахрийси, истеъфодаги подполковник, Жиззах вилояти