МАДАНИЯТ ВА САНЪАТ СОҲАСИНИ РИВОЖЛАНТИРИШГА ДОИР ПРЕЗИДЕНТ ҚАРОРИ МАЗМУН-МОҲИЯТИ ТУШУНТИРИЛДИ
Туман Маданият бўлимида Ўзбекистон Республикаси Маданият вазирлигининг театр ҳамда цирк санъатини ривожлантириш бошқармаси раҳбари ўринбосари Маҳмуд Айтниязов раҳбарлигида йиғилиш ўтказилди.
Йиғилишда туман Маданият бўлими бошлиғи Шуҳрат Юсупов, 9-сонли Болалар мусиқа ва санъат мактаби директори Йўлдош Абдалов, 21-сонли Болалар мусиқа ва санъат мактаби директори Аҳмад Жумабоев, Халқ таълими бўлими масъуллар ҳамда мусиқа ва санъат мактаблари ўқитувчилари, Маданият бўлими ходимлари иштирок этдилар.
Йиғилишга ташриф буюрган Маданият вазирлиги масъули Маҳмуд Айтниязов Президентимизнинг 2022 йил 2 февралдаги "Маданият ва санъат соҳасини янада ривожлантиришга доир қўшимча чора-тадбирлар тўғрисида"ги Қарори мазмун-моҳиятини тушунтирди.
Қарорда аҳоли, айниқса, олис ҳудудларда истиқомат қиладиган фуқароларга маданий дам олиш хизматлари кўрсатиш даражасини ошириш, республиканинг барча ҳудудларида театр, цирк ва бошқа турдаги оммавий-маданий ва концерт-томоша тадбирларини тизимли равишда йўлга қўйиш, маданият ва санъат соҳасида истеъдодли ёш ижодкорларни излаб топиш ва қўллаб-қувватлаш каби мақсадлар кўзланган.
Шу билан бирга таълим муассасаларини миллий чолғу асбоблари, мусиқа дарсликлари, ноталар тўпламлари ва ўқув-методик адабиётлар билан таъминлашнинг яхлит тизимини яратиш кўрсатилган. Шунингдек, 2022-2026 йилларга мўлжалланган Янги Ўзбекистоннинг тараққиёт стратегиясини «Инсон қадрини улуғлаш ва фаол маҳалла йили»да амалга оширишга оид давлат дастурига мувофиқ тегишли чора-тадбирлар белгиланган.
Унга кўра эндиликда 2022-2023 ўқув йилидан бошлаб, таълим муассасаларида ўқувчи ва талабаларнинг мусиқий билим ва кўникмаларини ошириш мақсадида миллий мусиқа чолғуларидан камида биттасида куй ижро этиш кўникмалари ўргатилади. Шу мақсадда мусиқа фани учун ҳафтасига белгиланган бир ўқув соати ҳамда унга қўшимча равишда ҳар ҳафта миллий мусиқа чолғуларида куй ижро этиш амалий тўгараклари ва факультатив дарслари ўтказилади. Шунга кўра мусиқа фани ўқитувчилари учун миллий чолғулардан камида биттасида, 2023-2024 ўқув йилидан бошлаб эса камида учтасида куй ижро этиш маҳоратига эга бўлиш мажбурий ҳисобланади.
Ундан ташқари, Қарорда умумий ўрта, ўрта махсус, профессионал ва олий таълим муассасаларида Ўзбекистон давлат филармонияси ва унинг ҳудудий бўлимлари томонидан бошқа маданият муассасалари билан ҳамкорликда лекторий концертларини ўтказиш йўлга қўйилиши, бу борадаги вазифалар батафсил кўрсатилган. Умумий ўрта таълим муассасалари, болалар мусиқа ва санъат мактаблари, маданият марказлари 2022-2024 йилларда 3 тадан миллий мусиқа чолғулари тўпламлари билан таъминлаш, ҳар йили ўқувчилар ва талабалар ўртасида “таълим муассасаси – туман – вилоят – республика” кесимида маданият ва санъат соҳасидаги республика кўрик-танловлари ташкил этиш белгиланган.
Йиғилиш давомида мазкур чора-тадбирларни амалга оширишга доир вазифалар белгилаб олинди. Шунингдек, соҳа ходимларининг Қарорга кўра бажарилиши лозим бўлган вазифалар, йўлга қўйиладиган тадбирларга доир саволларига батафсил жавоблар берилди.
Насиба Эшчанова, туман Маданият бўлими ходими.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
