MADANIYaT VA SANʼAT SOHASINI RIVOJLANTIRIShGA DOIR PREZIDENT QARORI MAZMUN-MOHIYaTI TUShUNTIRILDI

Tuman Madaniyat boʻlimida Oʻzbekiston Respublikasi Madaniyat vazirligining teatr hamda tsirk sanʼatini rivojlantirish boshqarmasi rahbari oʻrinbosari Mahmud Aytniyazov rahbarligida yigʻilish oʻtkazildi.

Yigʻilishda tuman Madaniyat boʻlimi boshligʻi Shuhrat Yusupov, 9-sonli Bolalar musiqa va sanʼat maktabi direktori Yoʻldosh Abdalov, 21-sonli Bolalar musiqa va sanʼat maktabi direktori Ahmad Jumaboyev, Xalq taʼlimi boʻlimi masʼullar hamda musiqa va sanʼat maktablari oʻqituvchilari, Madaniyat boʻlimi xodimlari ishtirok etdilar.

Yigʻilishga tashrif buyurgan Madaniyat vazirligi masʼuli Mahmud Aytniyazov Prezidentimizning 2022-yil 2-fevraldagi "Madaniyat va sanʼat sohasini yanada rivojlantirishga doir qoʻshimcha chora-tadbirlar toʻgʻrisida"gi Qarori mazmun-mohiyatini tushuntirdi.

Qarorda aholi, ayniqsa, olis hududlarda istiqomat qiladigan fuqarolarga madaniy dam olish xizmatlari koʻrsatish darajasini oshirish, respublikaning barcha hududlarida teatr, tsirk va boshqa turdagi ommaviy-madaniy va kontsert-tomosha tadbirlarini tizimli ravishda yoʻlga qoʻyish, madaniyat va sanʼat sohasida isteʼdodli yosh ijodkorlarni izlab topish va qoʻllab-quvvatlash kabi maqsadlar koʻzlangan.

Shu bilan birga taʼlim muassasalarini milliy cholgʻu asboblari, musiqa darsliklari, notalar toʻplamlari va oʻquv-metodik adabiyotlar bilan taʼminlashning yaxlit tizimini yaratish koʻrsatilgan. Shuningdek, 2022-2026-yillarga moʻljallangan Yangi Oʻzbekistonning taraqqiyot strategiyasini «Inson qadrini ulugʻlash va faol mahalla yili»da amalga oshirishga oid davlat dasturiga muvofiq tegishli chora-tadbirlar belgilangan.

Unga koʻra endilikda 2022-2023 oʻquv yilidan boshlab, taʼlim muassasalarida oʻquvchi va talabalarning musiqiy bilim va koʻnikmalarini oshirish maqsadida milliy musiqa cholgʻularidan kamida bittasida kuy ijro etish koʻnikmalari oʻrgatiladi. Shu maqsadda musiqa fani uchun haftasiga belgilangan bir oʻquv soati hamda unga qoʻshimcha ravishda har hafta milliy musiqa cholgʻularida kuy ijro etish amaliy toʻgaraklari va fakultativ darslari oʻtkaziladi. Shunga koʻra musiqa fani oʻqituvchilari uchun milliy cholgʻulardan kamida bittasida, 2023-2024 oʻquv yilidan boshlab esa kamida uchtasida kuy ijro etish mahoratiga ega boʻlish majburiy hisoblanadi.

Undan tashqari, Qarorda umumiy oʻrta, oʻrta maxsus, professional va oliy taʼlim muassasalarida Oʻzbekiston davlat filarmoniyasi va uning hududiy boʻlimlari tomonidan boshqa madaniyat muassasalari bilan hamkorlikda lektoriy kontsertlarini oʻtkazish yoʻlga qoʻyilishi, bu boradagi vazifalar batafsil koʻrsatilgan. Umumiy oʻrta taʼlim muassasalari, bolalar musiqa va sanʼat maktablari, madaniyat markazlari 2022-2024-yillarda 3 tadan milliy musiqa cholgʻulari toʻplamlari bilan taʼminlash, har yili oʻquvchilar va talabalar oʻrtasida “taʼlim muassasasi – tuman – viloyat – respublika” kesimida madaniyat va sanʼat sohasidagi respublika koʻrik-tanlovlari tashkil etish belgilangan.

Yigʻilish davomida mazkur chora-tadbirlarni amalga oshirishga doir vazifalar belgilab olindi. Shuningdek, soha xodimlarining Qarorga koʻra bajarilishi lozim boʻlgan vazifalar, yoʻlga qoʻyiladigan tadbirlarga doir savollariga batafsil javoblar berildi.

Nasiba Eshchanova, tuman Madaniyat boʻlimi xodimi.