СОҒЛОМ ТУРМУШ ТАРЗИНИ ТАРҒИБ ҚИЛИШГА БАҒИШЛАНГАН ТАДБИР ЎТКАЗИЛДИ

Саломатликни асраш ва мустаҳкамлашнинг ягона йўли бу – соғлом турмуш тарзига амал қилишдир. Соғлом турмуш тарзи эса инсоннинг ҳаёти, саломатлиги хавфсизлигини таъминлашга хизмат қилувчи кўникмаларга эга бўлиш асосида ҳаёт фаолиятини йўлга қўйиши ҳисобланади.

Бу борада кенг тушунчалар бериш мақсадида Соғлиқни сақлаш вазирлигининг аҳоли соғлом турмуш  тарзини қўллаб-қувватлаш ва жисмоний фаоллигини ошириш маркази Қорақалпоғистон  ҳудудий  бўлими  шифокорлари  Гулойим Шразова, Венера Давлетмурадова ва Амударё тумани Тиббиёт  бирлашмаси масъул шифокорларининг аҳоли билан учрашуви ўтказилди.

18 февраль куни Олмазор маҳалла фуқаролар йиғини маъмурий биносида бўлиб ўтган ушбу учрашувда фуқароларга кундалик ҳаётда соғлом турмуш тарзини шакллантириш, юқумли касалликлардан ҳимояланиш, спорт билан мунтазам равишда шуғулланишга эътибор қаратиш борасида маърузалар қилинди. Асосий мавзу, яъни инсон ҳаётида соғлом турмуш тарзи, соғлом овқатланиш, пиёда юришнинг фойдаси, саломатликни сақлашда тўғри нафас олиш машқларининг аҳамияти бўйича маълумотлар берилди.

Таъкидланганидек, спорт билан мунтазам равишда шуғулланиш, тўғри овқатланишни йўлга қўйиш, зарарли одатлардан воз кечиш, кун тартибига, шахсий гигиенага риоя қилиш, тоза ҳавода сайр қилиш кабилар соғлом турмуш тарзининг асоси ҳисобланади.

Соғлом турмуш тарзи, бу – ҳар қандай касалликлар профилактикаси ва саломатлик, куч-қувват гаровидир. Соғлом турмуш тарзи қоидаларига риоя этган одам оиласи, меҳнат жамоаси, умуман, жамиятда ўз ўрнига эга бўлади, турли мураккаб вазиятларни енгиб ўтиш, ҳаёт қийинчиликлари олдида ўзини йўқотмасликка ўрганади.

Мутахассислар муайян шахснинг саломатлиги биринчи навбатда унинг ҳаёт тарзига, ана шу турмуш тарзи элементларига онгли ёндошишига боғлиқлигини эътироф этишди. Соғлом турмуш тарзининг ҳар бир йўналишини такомиллаштиришга ҳаракат қилиб бориш кераклигини, бунинг учун оилада соғлом турмуш тарзи ва сиҳат-саломатликни сақлаш, жисмонан баркамолликка эришиш тўғрисидаги қўлланмаларни ўқиш, теледастурлардаги саломатлик ва жисмоний баркамоллик мавзусидаги кўрсатувларни мунтазам кўриш, шу соҳага алоқадор билимлар доирасини кенгайтириш ва тиббий саводхонликни ошириб бориш лозимлиги тўғрисида батафсил сўзлаб ўтишди.

Маърузалардан сўнг мутахассислар томонидан фуқароларнинг юқумли касалликларнинг турлари, улардан ҳимояланиш, вакцинациянинг аҳамияти тўғрисида берилган саволларга тўлиқ жавоблар берилди.

Тадбир давомида  82-сонли умумий ўрта таълим мактабининг 6-синф ўқувчилари иштирокида  нафас олиш машқлари техникаси кўргазмали равишда кўрсатиб берилди. Шундан сўнг, тадбир иштирокчилари, маҳалла фуқаролари билан биргаликда соғломлаштириш машқлари бажарилди.

Тадбир якунида иштирокчиларга  грипп, ўткир респиратор вирусли инфекция касаллиги ва унинг юқиш йўллари, аҳоли ўртасида коронавирус касаллигининг олдини олиш тадбирлари, жисмоний фаоллик, соғлом овкатланиш, шахсий гигиена, соғлом бўлишнинг оддий қоидалари, иммунитетни мустаҳкамлаш бўйича тавсиялар қайд этилган буклет ва эслатмалар тарқатилди.

Жумабой Явкашев, ТТБ АСТТКК ва ЖФО бўлими шифокори.