Қишлоқ хўжалигида баҳорги агротехник тадбирлар бўйича семинар ўтказилди
Баҳор фасли қишлоқ хўжалигида энг муҳим паллалардан саналади. Ерларни экишга тайёрлаш ва уруғ қадаш каби долзарб юмушлар амалга ошириладиган ушбу давр деҳқонлардан доимгидан-да кўпроқ меҳнат қилишни, ҳар бир дақиқани ғанимат билишни талаб этади.
Бу борада фермерларга йўл-йўриқ ва тавсиялар бериш мақсадида 1 март куни Амударё туманиинг Чойкўл овулида кўргазмали семинар бўлиб ўтди. Семинарда Қорақалпоғистон Республикаси Вазирлар Кенгаши раиси ўринбосари Дарябай Қайпов, Агросаноат мажмуи устидан назорат қилиш инспекцияси Қорақалпоғистон Республикаси бошқармаси бошлиғи Анвар Йўлдашев, туман ҳокими ўринбосари Исломбек Маткаримов, туман Фермер, деҳқон хўжаликлари ва томорқа ер эгалари Кенгаши раиси Илҳом Полвонов ҳамда туманда фаолият юритаётган фермер хўжаликлари раҳбарлари иштирок этишди.
Семинарда ерларнинг шўрини ювиш, картошка экиш тартиби ҳамда 2022 йилда ғалла етиштириш бўйича агротехник тадбирларнинг бажарилиши каби муҳим масалаларда фермер хўжаликлари масъулларига тавсиялар берилди.
Кўргазмали семинарда сўзга чиққан мутахассислар аввало шўрланган ерларни ювиш ишларини ўз вақтида ва сифатли амалга ошириш экинларнинг ўсиши, ривожланиши ва мўл ҳосил бериши учун катта аҳамият касб этишини таъкидлашди. Шунинг учун тупроқдаги зарарли ва ортиқча миқдордаги тузларни чиқариб ташлаш ҳамда сизот сувларининг минераллашганлигини камайтириш долзарб вазифа эканлигини қайд этдилар.
Семинарда картошка етиштиришнинг ўзига хос усуллари ва танланиши лозим бўлган уруғ навлари ҳақида ҳам маълумотлар берилди. Маълумки, юртимизда эртаги картошка февраль ойи охири ва март ойи бошларида экилади. Картошка экишни белгиланган муддатларда сифатли амалга ошириш ниҳоятда зарур тадбирлардан бири бўлиб, ушбу амаллар ҳосил тақдирини белгилашда муҳим аҳамият касб этади. Фермер хўжаликлари раҳбарларига бу борада ҳам илмий асосланган тавсиялар баён қилинди.
Бундан ташқари семинар иштирокчиларига ер майдонини чигит экиш ишларига сифатли тарзда тайёрлаш, экиш мавсуми олдидан минерал ўғит, дориланган сифатли уруғлик захирасини яратиш, экиладиган майдонларни меъёрида суғоришни ташкил этиш бўйича алоҳида тушунтиришлар берилди.
Семинарда сўзга чиққанлар ерларни экишга сифатли тарзда тайёрлаш мўл ҳосил олишнинг муҳим шартларидан бири эканлиги, бу борада янги замонавий усуллар, технологиялар ва илмий хулосалардан фойдаланиш лозимлиги ҳақида фикр билдиришди. Шу билан бир қаторда ушбу вазифаларни тезкорлик билан, тизимли равишда амалга ошириш бўйича фермерларга топшириқ ва тавсиялар берилди. Шунингдек, энди ҳар бир фермер ер билан ишлашда илм-фанга таяниши, керакли минерал ўғитлар меъёрларига қатъий риоя қилиши лозимлиги алоҳида таъкидланди.
Семинар давомида мутахассислар кузги буғдой парваришида эътибор қаратилиши лозим бўлган муҳим жиҳатларга ҳам тўхталиб ўтдилар. Фермерлар ҳам ўзларини қизиқтирган саволлар билан мурожаат қилиб, тегишлича жавоблар олишди.
Туман ҳокимлигининг Ахборот хизмати
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
