Qishloq xoʻjaligida bahorgi agrotexnik tadbirlar boʻyicha seminar oʻtkazildi
Bahor fasli qishloq xoʻjaligida eng muhim pallalardan sanaladi. Yerlarni ekishga tayyorlash va urugʻ qadash kabi dolzarb yumushlar amalga oshiriladigan ushbu davr dehqonlardan doimgidan-da koʻproq mehnat qilishni, har bir daqiqani gʻanimat bilishni talab etadi.
Bu borada fermerlarga yoʻl-yoʻriq va tavsiyalar berish maqsadida 1-mart kuni Amudaryo tumaniing Choykoʻl ovulida koʻrgazmali seminar boʻlib oʻtdi. Seminarda Qoraqalpogʻiston Respublikasi Vazirlar Kengashi raisi oʻrinbosari Daryabay Qaypov, Agrosanoat majmui ustidan nazorat qilish inspektsiyasi Qoraqalpogʻiston Respublikasi boshqarmasi boshligʻi Anvar Yoʻldashev, tuman hokimi oʻrinbosari Islombek Matkarimov, tuman Fermer, dehqon xoʻjaliklari va tomorqa yer egalari Kengashi raisi Ilhom Polvonov hamda tumanda faoliyat yuritayotgan fermer xoʻjaliklari rahbarlari ishtirok etishdi.
Seminarda yerlarning shoʻrini yuvish, kartoshka ekish tartibi hamda 2022-yilda gʻalla yetishtirish boʻyicha agrotexnik tadbirlarning bajarilishi kabi muhim masalalarda fermer xoʻjaliklari masʼullariga tavsiyalar berildi.
Koʻrgazmali seminarda soʻzga chiqqan mutaxassislar avvalo shoʻrlangan yerlarni yuvish ishlarini oʻz vaqtida va sifatli amalga oshirish ekinlarning oʻsishi, rivojlanishi va moʻl hosil berishi uchun katta ahamiyat kasb etishini taʼkidlashdi. Shuning uchun tuproqdagi zararli va ortiqcha miqdordagi tuzlarni chiqarib tashlash hamda sizot suvlarining minerallashganligini kamaytirish dolzarb vazifa ekanligini qayd etdilar.
Seminarda kartoshka yetishtirishning oʻziga xos usullari va tanlanishi lozim boʻlgan urugʻ navlari haqida ham maʼlumotlar berildi. Maʼlumki, yurtimizda ertagi kartoshka fevral oyi oxiri va mart oyi boshlarida ekiladi. Kartoshka ekishni belgilangan muddatlarda sifatli amalga oshirish nihoyatda zarur tadbirlardan biri boʻlib, ushbu amallar hosil taqdirini belgilashda muhim ahamiyat kasb etadi. Fermer xoʻjaliklari rahbarlariga bu borada ham ilmiy asoslangan tavsiyalar bayon qilindi.
Bundan tashqari seminar ishtirokchilariga yer maydonini chigit ekish ishlariga sifatli tarzda tayyorlash, ekish mavsumi oldidan mineral oʻgʻit, dorilangan sifatli urugʻlik zaxirasini yaratish, ekiladigan maydonlarni meʼyorida sugʻorishni tashkil etish boʻyicha alohida tushuntirishlar berildi.
Seminarda soʻzga chiqqanlar yerlarni ekishga sifatli tarzda tayyorlash moʻl hosil olishning muhim shartlaridan biri ekanligi, bu borada yangi zamonaviy usullar, texnologiyalar va ilmiy xulosalardan foydalanish lozimligi haqida fikr bildirishdi. Shu bilan bir qatorda ushbu vazifalarni tezkorlik bilan, tizimli ravishda amalga oshirish boʻyicha fermerlarga topshiriq va tavsiyalar berildi. Shuningdek, endi har bir fermer yer bilan ishlashda ilm-fanga tayanishi, kerakli mineral oʻgʻitlar meʼyorlariga qatʼiy rioya qilishi lozimligi alohida taʼkidlandi.
Seminar davomida mutaxassislar kuzgi bugʻdoy parvarishida eʼtibor qaratilishi lozim boʻlgan muhim jihatlarga ham toʻxtalib oʻtdilar. Fermerlar ham oʻzlarini qiziqtirgan savollar bilan murojaat qilib, tegishlicha javoblar olishdi.
Tuman hokimligining Axborot xizmati
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
