ОТА ДУОСИНИ ОЛГАН ҚИЗ
Майра Умирбоеванинг ўқитувчилик касбига ихлос қўйишига отаси – бир умр болаларга таълим-тарбия бериб келаётган, неваралар ардоғида, ўғил-қизлари камолидан қувониб яшаётган Марат Отажонов сабабчи бўлди.
Майра улғайсам, албатта, отамдек устоз бўламан, деб орзу қилар, хаёлан ўзини отаси ўрнида тасаввур қилиб ҳам кўрарди. Бироқ Хўжайли шаҳридаги 1-сонли мактабнинг 9-синфини тамомлагач, шу туман Тиббиёт бирлашмасида шифокор бўлиб ишлайдиган онасининг раъйини қайтара олмай, Тиббиёт коллежига ўқишга кирди. Коллежни аъло баҳоларга битириб, ўз мутахассислиги бўйича фаолиятини бошлаган вақтида ҳам кўнглидаги ўқитувчиликка бўлган ҳавас уни тарк этмади. Шундай қилиб, қўли енгил, ширин сўзли ҳамшира бўлиб ишлаб юрган қиз НДПИга ҳужжат топширди ва синовдан яхши ўтиб, давлат гранти асосида талабаликка қабул қилинди.
Майра олийгоҳни муваффақиятли тугатгач, Куюк кўпир овулига келин бўлиб тушди ва ҳудуддаги 14-сонли мактабда қозоқ тили фани ўқитувчиси бўлиб меҳнат фаолиятини бошлади. Бунга эндигина 9 йил бўлаяпти. Шу давр ичида Майра мактаб ўқитувчилар жамоаси билан бир оила фарзандларидай бўлиб кетди. Дастлаб янги оила, янги мактаб ўқитувчилари, ўқувчиларига кўникиши осон ҳам бўлмади. Бироқ мактабнинг раҳбарлари, математика ўқитувчиси А.Бекмуродов, география фани ўқитувчиси Р.Тўрамуродовлар унга далда, йўл-йўриқ бериб туришди.
Ҳа, Майра эплади, устоз ўқитувчилар ишончини оқлаб, болаларнинг севимли устозига айланди.
У ўқитувчилик қилиб, қозоқ тили ва адабиётидан дарс берган севимли шогирди А.Жалғасбаева 2019 йилда олийгоҳнинг ўзи ўқиган факультетига ўқишга кирганида худди ўз боласи талаба бўлгандай қувонди, ўз-ўзига ишончи ортди, ота-оналар унга ўзгача ҳурмат билан қарайдиган бўлди.
Оиласидаги юмушлари, 2013 йилда туғилган қизи Айдана, 2018 йилда туғилган ўғли Нурдаулетлар тарбиясидан ортиб, Майра дарсдан кейин ҳам ўқувчиларини тўгарак машғулотларига жалб этди. Натижада ўқувчилари яхши кўрсаткичларни қўлга киритди. Хусусан, 2020 йилда Г.Серикбоева, М.Ўринбоевалар НДПИнинг Туркий тиллар филологияси факультетининг қозоқ тили бўлимига ўқишга киришган бўлса, 2021 йилда бир битирувчиси Б.Рейимбоева фанлар олимпиадасининг мамлакат босқичи ғолиби бўлиб, олийгоҳга имтиҳонсиз қабул қилинди.
Жамиятимизда ўз оиласининг тинч-тотувлигини, аҳиллигини таъминлабгина қолмай, ёш авлодни иқтидорли, билимли, маънавиятли қилиб тарбиялашга муносиб ҳисса қўшаётган Майра, у каби фидойи аёл-қизларга бу таъриф ҳам кам, назаримда.
Илоҳим, омон бўлинг, касбингиздан барака топинг!
Ойгул РАЖАБОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
