ТОМОРҚА ЕРЛАРДАН САМАРАЛИ ФОЙДАЛАНИШГА ОИД СЕМИНАР БЎЛИБ ЎТДИ

Мамлакатимиз аҳолисининг кўпчилик қисми қишлоқ жойларда истиқомат қилгани боис, уларнинг турмуш фаровонлиги қишлоқ хўжалиги тармоғи билан боғлиқ. Бугунги кунда аграр тизим аҳолига озиқ-овқат маҳсулотлари етиштирувчигина эмас, балки янги иш ўринлари яратиш ва аҳоли бандлигини таъминлашда ҳам муҳим соҳага айланди. Шу боисдан ҳам қишлоқ жойларда аҳолига экин майдонларини ажратиш, томорқа ерларидан самарали фойдаланишини таъминлашга алоҳида эътибор қаратилмоқда.

Шуниси эътиборлики, Амударё тумани бўйича ҳудудларда аҳоли томорқа ерларини шудгорлаш, зарур уруғлик ва кўчат етказиб бериш, хонадонларга ихчам иссиқхона қуриб бериш, шунингдек оилаларда  даромад манбаларини кўпайтириш мақсадида эчки, қўй, парранда, асалари уялари, қуён етказиб бериш каби хизматларни амалга оширадиган 12 та “Томорқа хизмати” масъулияти чекланган жамиятлари фаолияти йўлга қўйилган.

Томорқа ер эгаларига амалий ёрдам кўрсатиш мақсадида тўқсонбости усулида экинларни экиш юзасидан шу кунгача овул ва маҳаллаларда 41 та семинарлар ташкил этилиб, уларда 1500 нафардан ортиқ уста деҳқонлар, овул ва маҳалла фуқаролар йиғинлари раислари, томорқа ер эгалари иштирок  этдилар. Бунингдек саъй-ҳаракатлар натижасида ҳудудий дастурга асосан аҳоли томорқаларига экилиши белгиланган 1484 гектар ўринга 1632 гектар томорқа ерларга тўқсонбости усулида экинлар экилган.

26 март куни Қиличбой овулидаги намунали томорқа ер эгаларидан бири,  “Меҳнаткаш деҳқон” кўкрак нишони соҳиби Бахтиёр Манглиев хонадонида Ўзбекистон фермер, деҳқон хўжаликлари ва томорқа ер эгалари Кенгаши бўлим бошлиғи Умирзоқ Раҳматов иштирокида томорқачилик тажрибаларини оммалаштириш, Бахтиёр  Манглиев иш услубини барча маҳаллалар овуллардаги аҳоли томорқаларида йўлга қўйиш мақсадида семинар ўтказилди.

Тадбирга сектор раҳбари, қишлоқ хўжалиги масъуллари, овул ва маҳаллалар фуқаролар йиғинлари раислари, ҳудудлардаги ҳоким ёрдамчилари, томорқа ер эгалари иштирок этдилар. Йиғилганларга Ўзбекистон  фермер, деҳқон хўжаликлари ва томорқа ер эгалари Кенгаши бўлим бошлиғи Умрзоқ Раҳматов, туман  фермер, деҳқон хўжаликлари ва томорқа ер эгалари Кенгаши раиси Илҳом Полвоновлар томорқадан унумли фойдаланиш юзасидан маъруза қилдилар. Кейин Бахтиёр Манглиевнинг 4 сотихлик иссиқхонаси кўздан кечирилди ва барча бу ерда амалга оширилаётган ишлар билан таништирилди, эришилаётган натижалар ҳақида батафсил маълумотлар берилди.

Бахтиёр Манглиев иссиқхонада деҳқончилик қилиш бўйича улкан тажриба тўплаган томорқачидир. Ўтган йилнинг кузида у 4 сотихлик иссиқхонасининг 2 сотих жойига пиёз, 1 сотих жойига редиска, 1 сотихига турли кўкатлар эккан эди. Оила аъзолари билан ҳамжиҳатликда экинларни яхши парвариш қилгани боис, қиш бўйи бозорга кўкатлар, кўк пиёз сотиб, ёздагидай даромад олиб келди. Ҳозирги кунда редискалари ҳам сотишга яраб қолди ва кундалик даромади яна ҳам кўпайди. Натижада оила фаровон, дастурхони тўкин. Демак, астойдил меҳнат қилинса, яхши ишлаб, яхши яшашга иштиёқ бўлса, 4 сотихгина ер ҳам улкан даромад манбаи бўлар экан.

Албатта, бунингдек тажрибаларни оммалаштириш туманимизда томорқа ерлардан самарали фойдаланиш, қишлоқ аҳолисининг бандлигини таъминлаш ва  доимий даромадга эга бўлишларига эришишда, камбағалликни қисқартиришда келгусида ўзининг ижобий натижаларини беради.

Ҳозирги даврда туманимизда 39 минг 406 нафар томорқа ер эгалари ихтиёрида  6652 гектар экин майдони мавжуд. Бу майдонлардан самарали фойдаланилишига эришиш мақсадида тажрибали томорқачилар Оқ олтин овулидан Янгибой Қурбонбоев, Бобур овулидан Абдураҳмон Матсапоев, Чойкўл овулидан Маҳмуджон Норбоев, Қорамон маҳалласидан Отахон Ўтамуродовларнинг йил давомида томорқадан даромад олиш тажрибалари юзасидан тарғиботлар олиб борилмоқда. Бахтиёр Манглиев хонадонида ўтказилган семинар ҳам айнан томорқадан йил давомида маҳсулот етиштириш ва даромад олишни оммалаштиришга хизмат қилади.

Семинар барча иштирокчиларда улкан таассуротлар қолдирди. Масъуллар иштирокчиларни қизиқтирган саволларга батафсил жавоблар бердилар.

Ойгул РАЖАБОВА.