МУСИҚА ВА САНЪАТ МАКТАБИДА УСТОЗ САНЪАТКОР БИЛАН УЧРАШУВ ЎТКАЗИЛДИ

Санъат одамларнинг эстетик талабларини қондириш билан бирга, ўз тараққиётининг турли даврларида жамият аъзоларини ақлий ва ҳиссий жиҳатдан ривожлантириш воситаси бўлиб келган. Санъат одамларнинг моддий ва маънавий фаолиятидаги билими, тажрибаси, маҳорати ва қобилиятини намоён этувчи бадиий ижодиёт маҳсулидир.

Инсон зоти борки, мусиқа ва санъат асарларидан баҳра олади, гоҳ сокин, гоҳ жўшқин, гоҳ дардли куй-қўшиқларни тинглаб, ором олади, дунёни, ўзини, ўзлигини англашга, тириклик, ҳаёт мазмун-моҳиятини теранроқ англашга интилаверади. Шу баробарида элга манзур қўшиқлар ижро этган санъаткорларга ҳурмат-эътибори ортаверади.

Туманимизда санъат соҳасида ўзига хос мактаб яратган, ёшларнинг севимли мураббийси, дилга яқин қўшиқлари билан нафақат туманда, ҳатто мамлакатимизда, хорижда ҳам ўз ижроси билан тингловчилар қалбини забт этган Қорақалпоғистонда хизмат кўрсатган маданият ходими Гулмурза Нурматов ҳам ана шундай ҳофизларнинг бири десак, адашмаган бўламиз.

У узоқ йиллар тумандаги Болалар мусиқа ва санъат мактабида директор, туман Маданият бўлими мудири лавозимларида сидқидилдан меҳнат қилди. Ўзининг ижрочилик маҳорати, ижодкорлиги билан, санъатга фидойилиги билан шогирдларининг юксак ҳурмат-эътиборини қозонган Гулмурза Нурматов бу йил ҳаётининг табаррук саксонинчи баҳорини қарши олди.

Шу муносабат билан жорий йилнинг 29 мартида туман Болалар мусиқа ва санъат мактабида отахон ҳофиз билан мактаб ўқувчиларининг учрашуви бўлиб ўтди. Туман маданият бўлими, мактаб раҳбарияти ҳамкорлигида ташкил этилган кечага ўқувчилар, ўқитувчилар, Гулмурза Нурматовнинг санъат соҳасида фаолият юритаётган шогирдлари иштирок этдилар.

Тадбирни туман Маданият бўлими ходими, сухандон Ойбек Бегимов бошқариб борди. Сўзга чиққан туман Болалар мусиқа ва санъат мактаби директори Йўлдош Абдалов устоз санъаткорни 80 йиллик юбилейи билан қизғин қутлди. Устознинг босиб ўтган ҳаёт ва ижодий йўли, сермаҳсул фаолияти ҳақида берилган маълумотлар ўқувчиларда катта таассуротлар қолдирди.

Гулмирза Нурматов ҳам санъат йўлини танлаган ёшларни машаққатлардан чўчимай, ижодий баркамоллик сари дадил интилишга, халқимизга манзур бўладиган куй-қўшиқлар яратиб, маромига етказиб ижро этишга даъват этди. Ўз навбатида умтоз ижодкор ўзига кўрсатилаётган ҳурмат-эътибор учун Болалар мусиқа ва санъат мактаби раҳбариятига миннатдорчилик билдирди.

Тадбирда иштирок этган мактаб ўқитувчилари, ўқувчилари Гулмурза Нурматовга ижодий фаолиятига доир ўзларини қизиқтирган саволларни бериб, батафсил жавоблар олдилар.

Тадбир сўнгида Болалар мусиқа ва санъат мактаби ўқувчилари ижросида концерт дастури намойиш этилди. Болалигидан Усмон Аҳмедов, Назир Раҳимов, Ражаббой Бобожонов каби санъат дарғалари назарига тушиб, улардан улкан сабоқлар олиб, бирга ижод қилган устоз ижодкор бугун табаррук ёшга етди. Ёшлигидан элимизнинг суюкли санъаткорлари билан саҳналарда бирга концерт дастурларда қатнашиб, уларнинг санъатидан, эл хизмати йўлидаги фидойиликларидан ўрнак олиб келган Гулмирза Нурматов ҳаёти давомида устозларининг йўлини шараф билан давом эттирди. Саксон ёшида ҳам овозидаги жўшқинлик, куйлаш иштиёқи сўнмаган устоз санъаткорнинг ҳаётидан, фаолиятидан барча ибрат олса арзийди.

Ойгул РАЖАБОВА.