Сиёсат 31.03.2022 👁 391

Ўзбекистон Республикаси Олий Мажлиси Сенатининг 24-ялпи мажлисида қабул қилинган қонун ҳужжатлари мазмун-моҳиятига бағишланган йиғилиш бўлиб ўтди

Маълумки, жорий йил 17-19 март кунлари Тошкент шаҳрида Ўзбекистон Республикаси Олий Мажлиси Сенатининг йигирма тўртинчи ялпи мажлиси бўлиб ўтган эди. Ялпи мажлисда 18 та масала, шу жумладан 9 та қонун кўриб чиқилиб, сенаторлар томонидан қизғин муҳокама қилинди.

30 март куни Амударё тумани ҳокимлигининг мажлислар залида Сенатнинг ялпи мажлисида кўриб чиқилган масалаларнинг мазмун-моҳиятини тушунтириш ва жамоатчилик назоратини йўлга қўйиш бўйича йиғилиш бўлиб ўтди.

Йиғилишда Ўзбекистон Республикаси Олий Мажлиси Сенатининг Оролбўйи минтақасини ривожлантириш масалалари қўмитаси раиси ўринбосари, сенатор Ботир Матмуратов, туман ҳокими, Халқ депутатлари Амударё туман Кенгаши раиси Султонбой Йўлдашев, шунингдек, тумандан сайланган Қорақалпоғистон Республикаси Жўқорғи Кенгеси депутатлари, Халқ депутатлари туман Кенгаши депутатлари, сектор раҳбарлари, ҳоким ўринбосарлари ҳамда тегишли корхона ва ташкилотлар раҳбарлари, оммавий ахборот воситалари вакиллари иштирок этишди.

Дастлаб Сенатор Ботир Матмуратов ялпи мажлис давомида кўриб чиқилган маслалар юзасидан маъруза қилди.

Шундан сўнг “Суд ҳужжатлари ва бошқа органлар ҳужжатларини ижро этиш тизимини янада такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги қонуннинг мазмун-моҳияти юзасидан Амударё тумани Жиноят ишлари бўйича суди раиси Жасур Ўразбоевнинг марузаси тингланди.

Қайд қилинганидек, ушбу қонунга мувофиқ 3 та Кодекс ҳамда 4 та Қонунга ўзгартиш ва қўшимчалар киритилган бўлиб, бунинг натижасида ижро тартиб-таомиллари янада соддалаштирилади ҳамда суд ва бошқа органлар ҳужжатларининг сўзсиз ва ўз вақтида ижро этилиши таъминланади.

“Реклама тўғрисида”ги, “Ўзбекистон Республикасининг Фуқаролик кодексига қийноққа солишдан жабрланганларга етказилган зарарни қоплаш тартибини такомиллаштиришга қаратилган қўшимчалар киритиш тўғрисида”ги ва “Киберхавфсизлик тўғрисида”ги Қонунларнинг мазмун-моҳияти ҳақида Амударё тумани Адлия бўлими бошлиғи Мўъминжон Матюсупов томонидан батафсил тушунтириш берилди.

Шунингдек, йиғилишда “Ўзбекистон Республикасининг Меҳнат кодексини тасдиқлаш тўғрисида”ги қонун лойиҳаси билан туман Аҳоли бандлигига кўмаклашиш маркази масъул ходими таништириб ўтди. Таъкидланганидек, 1995 йилда қабул қилинган амалдаги Меҳнат кодекси таҳрири замонавий воқеликка мос келмаслиги сабабли хорижий давлатлар тажрибасини ўрганган ҳолда янгидан таҳрирда ишлаб чиқилган.

Бундан ташқари, йиғилишда “Органик маҳсулотлар тўғрисиги” Қонун лойиҳасининг мазмун-моҳияти билан туман Санитария-эпидемиологик осойишталик ва жамоат саломатлиги маркази бошлиғи Гулмурот Бекиев таништириб ўтди. Қайд этилганидек, ҳужжат органик маҳсулотларга доир барча муносабатларни тартибга солишга қаратилган.

Йиғилишда “Нобанк кредит ташкилотлари ва микромолиялаштириш фаолияти тўғрисида”ги, ҳамда “Корпоратив бошқарув тизими такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги қонунлар лойиҳалари бўйича ҳам сўз юритилди.

Йиғилиш якунида депутатлар ва йиғилиш иштирокчилари ўзларини қизиқтирган масалалар билан cенаторга мурожаат қилишиб, атрофлича жавоблар олдилар.

Йиғилишдан сўнг сенатор Ботир Матмуратов туман ҳокими Султонбой Йўлдашев ва сектор раҳбарлари ҳамроҳлигида “Яшил макон” лойиҳаси доирасида “Дўстлик” маҳалласи ҳудудидаги 2-сонли касб-ҳунар мактаби олдида барпо этилаётган яшил майдонга бориб, мевали ва манзарали дарахт кўчатларини ўтқазишди.