Oʻzbekiston Respublikasi Oliy Majlisi Senatining 24-yalpi majlisida qabul qilingan qonun hujjatlari mazmun-mohiyatiga bagʻishlangan yigʻilish boʻlib oʻtdi

Maʼlumki, joriy yil 17-19-mart kunlari Toshkent shahrida Oʻzbekiston Respublikasi Oliy Majlisi Senatining yigirma toʻrtinchi yalpi majlisi boʻlib oʻtgan edi. Yalpi majlisda 18 ta masala, shu jumladan 9 ta qonun koʻrib chiqilib, senatorlar tomonidan qizgʻin muhokama qilindi.

30-mart kuni Amudaryo tumani hokimligining majlislar zalida Senatning yalpi majlisida koʻrib chiqilgan masalalarning mazmun-mohiyatini tushuntirish va jamoatchilik nazoratini yoʻlga qoʻyish boʻyicha yigʻilish boʻlib oʻtdi.

Yigʻilishda Oʻzbekiston Respublikasi Oliy Majlisi Senatining Orolboʻyi mintaqasini rivojlantirish masalalari qoʻmitasi raisi oʻrinbosari, senator Botir Matmuratov, tuman hokimi, Xalq deputatlari Amudaryo tuman Kengashi raisi Sultonboy Yoʻldashev, shuningdek, tumandan saylangan Qoraqalpogʻiston Respublikasi Joʻqorgʻi Kengesi deputatlari, Xalq deputatlari tuman Kengashi deputatlari, sektor rahbarlari, hokim oʻrinbosarlari hamda tegishli korxona va tashkilotlar rahbarlari, ommaviy axborot vositalari vakillari ishtirok etishdi.

Dastlab Senator Botir Matmuratov yalpi majlis davomida koʻrib chiqilgan maslalar yuzasidan maʼruza qildi.

Shundan soʻng “Sud hujjatlari va boshqa organlar hujjatlarini ijro etish tizimini yanada takomillashtirilishi munosabati bilan Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida”gi qonunning mazmun-mohiyati yuzasidan Amudaryo tumani Jinoyat ishlari boʻyicha sudi raisi Jasur Oʻrazboyevning maruzasi tinglandi.

Qayd qilinganidek, ushbu qonunga muvofiq 3 ta Kodeks hamda 4 ta Qonunga oʻzgartish va qoʻshimchalar kiritilgan boʻlib, buning natijasida ijro tartib-taomillari yanada soddalashtiriladi hamda sud va boshqa organlar hujjatlarining soʻzsiz va oʻz vaqtida ijro etilishi taʼminlanadi.

 “Reklama toʻgʻrisida”gi, “Oʻzbekiston Respublikasining Fuqarolik kodeksiga qiynoqqa solishdan jabrlanganlarga yetkazilgan zararni qoplash tartibini takomillashtirishga qaratilgan qoʻshimchalar kiritish toʻgʻrisida”gi va “Kiberxavfsizlik toʻgʻrisida”gi Qonunlarning mazmun-mohiyati haqida Amudaryo tumani Adliya boʻlimi boshligʻi Moʻʼminjon Matyusupov tomonidan batafsil tushuntirish berildi.

Shuningdek, yigʻilishda “Oʻzbekiston Respublikasining Mehnat kodeksini tasdiqlash toʻgʻrisida”gi qonun loyihasi bilan tuman Aholi bandligiga koʻmaklashish markazi masʼul xodimi tanishtirib oʻtdi. Taʼkidlanganidek, 1995-yilda qabul qilingan amaldagi Mehnat kodeksi tahriri zamonaviy voqelikka mos kelmasligi sababli xorijiy davlatlar tajribasini oʻrgangan holda yangidan tahrirda ishlab chiqilgan.

Bundan tashqari, yigʻilishda “Organik mahsulotlar toʻgʻrisigi” Qonun loyihasining mazmun-mohiyati bilan tuman Sanitariya-epidemiologik osoyishtalik va jamoat salomatligi markazi boshligʻi Gulmurot Bekiyev tanishtirib oʻtdi. Qayd etilganidek, hujjat organik mahsulotlarga doir barcha munosabatlarni tartibga solishga qaratilgan.

Yigʻilishda “Nobank kredit tashkilotlari va mikromoliyalashtirish faoliyati toʻgʻrisida”gi, hamda “Korporativ boshqaruv tizimi takomillashtirilishi munosabati bilan Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida”gi qonunlar loyihalari boʻyicha ham soʻz yuritildi.

Yigʻilish yakunida deputatlar va yigʻilish ishtirokchilari oʻzlarini qiziqtirgan masalalar bilan cenatorga murojaat qilishib, atroflicha javoblar oldilar.

Yigʻilishdan soʻng senator Botir Matmuratov tuman hokimi Sultonboy Yoʻldashev va sektor rahbarlari hamrohligida “Yashil makon” loyihasi doirasida “Doʻstlik” mahallasi hududidagi 2-sonli kasb-hunar maktabi oldida barpo etilayotgan yashil maydonga borib, mevali va manzarali daraxt koʻchatlarini oʻtqazishdi.

Senator tomonidan tumanimiz boʻylab davom etayotgan koʻchat ekish boʻyicha “Dolzarb 40 kunlik” uyushqoqlik bilan amalga oshirilayotganligi eʼtirof etildi.

Tuman hokimligining Axborot xizmati