“Беш муҳим ташаббус” доирасидаги тадбирларга старт берилди

Ўзбекистон Республикаси Президентининг “Маҳаллаларда ёшлар билан ишлаш тизимини тубдан такомиллаштириш чора-тадбирлари тўғрисида”ги қарорига асосан ёшларнинг бўш вақтини мазмунли ўтказиш мақсадида “Беш муҳим ташаббус” доирасидаги тадбирлар мунтазам равишда ўтказилиб келинмоқда.

8 апрель куни “Беш муҳим ташаббус” доирасидаги спорт тадбирларининг бошланиши муносабати билан Дўстлик маҳалласидаги Болалар ва ўсмирлар спорт мактабида тадбир бўлиб ўтди. Унда ҳар бир маҳалладан турли жабҳаларда илғор, фаол спортчи ёшлар иштирок этишди.

Тадбир аввалида туман ҳокими Султонбой Йўлдашев ёшларга яратилаётган имконият ва шарт-шароитлар ҳақида тўхталиб, Ёшлар ишлари агентлиги, туман Туризм ва спорт бўлими ва бошқа бир қатор ҳамкор ташкилотлар томонидан лойиҳа доирасида туманимизнинг барча ҳудудларидаги минглаб ёшлар орасида спорт ва соғлом турмуш тарзини оммалаштириш ҳамда ривожлантириш бўйича тадбирлар юқори савияда ўтказилиб келинаётганлигини таъкидлади.

Шундан сўнг Ўзбекистон Республикаси Спортни ривожлантириш вазирлигининг вакили Бобур Бобомурадов сўзга чиқиб, туманимизда ёшларнинг спортга бўлган қизиқишлари қўллаб-қувватланаётганлиги эътироф этди. Қолаверса, муҳтарам Президентимиз ташаббуси билан маҳалладаги ёшлар етакчиси лавозимининг ташкил этилганлиги ёшларга бўлган улкан эътибор намунаси эканлигини таъкидлади ҳамда барча ёшларга спорт мусобақаларида омад тилади.

Маълумот учун айтиб ўтиш керакки, “Беш ташаббус” доирасидаги тадбирлар 11 апрелдан бошланди. Унда 7 ёшдан 30 ёшгача бўлган ёшлар ўртасида спортнинг 9 та тури, жумладан, футбол, мини-футбол, волейбол, енгил атлетика, шахмат-шашка, стол тенниси, стритбол, воркаут бўйича мусобақалар ўтказилади. Ушбу спорт мусобақалари дастлаб, маҳаллалардаги кўчалар орасида ўтказилиб, улар орасидан иқтидорли, кучли ва истеъдодли ёшлар сараланиб олинади. Бу эса юртимиз байроғини юксакка кўтарадиган ёшларни кашф этишда муҳим омил бўлади.

Дарҳақиқат, муҳтарам Президентимиз томонидан жорий йил 11 апрель куни имзоланган “Маҳаллаларда ёшларни оммавий спортга жалб қилишни янги босқичга олиб чиқиш чора-тадбирлари тўғрисида”ги қарор ҳам айни шу мақсадларга хизмат қилади.

Қарорда келтирилишича, 2022 йилдан бошлаб ҳар йили анъанавий тарзда 30 июнь – Ўзбекистон Республикаси ёшлари куни ҳамда декабрь ойида ўтказиладиган “Ёшлар форуми” доирасида спортнинг футбол, мини-футбол, волейбол, енгил атлетика, шахмат, шашка, стол тенниси, стритбол, воркаут турлари бўйича беш босқичли оммавий спорт мусобақаларини ўтказиш тизими жорий этилади. Мусобақаларнинг биринчи босқичи – кўчалар орасида маҳаллаларда, иккинчи босқичи – секторлар кесимида маҳаллалар орасида, учинчи босқичи – сектор мусобақаларида ғолиб бўлган маҳалла жамоалари ўртасида туман миқёсида, тўртинчи босқичи – Қорақалпоғистон Республикаси ва вилоятлар миқёсида, бешинчи босқичи эса Ўзбекистон миқёсида финал мусобақалари шаклида ўтказилади.

Ўтказилаётган спорт мусобақаларидан кўзланган асосий мақсад – эртанги кун эгаларининг қалбида Ватанга муҳаббат ва садоқат, миллий ғурур ва ифтихор туйғуларини қарор топтириш, ёшларимизнинг буюк аждодларимизга муносиб авлод бўлиб вояга етишларига имконият яратишдир.

Туман ҳокимлигининг Ахборот хизмати.