“Besh muhim tashabbus” doirasidagi tadbirlarga start berildi

Oʻzbekiston Respublikasi Prezidentining “Mahallalarda yoshlar bilan ishlash tizimini tubdan takomillashtirish chora-tadbirlari toʻgʻrisida”gi qaroriga asosan yoshlarning boʻsh vaqtini mazmunli oʻtkazish maqsadida “Besh muhim tashabbus” doirasidagi tadbirlar muntazam ravishda oʻtkazilib kelinmoqda.

8-aprel kuni “Besh muhim tashabbus” doirasidagi sport tadbirlarining boshlanishi munosabati bilan Doʻstlik mahallasidagi Bolalar va oʻsmirlar sport maktabida tadbir boʻlib oʻtdi. Unda har bir mahalladan turli jabhalarda ilgʻor, faol sportchi yoshlar ishtirok etishdi.

Tadbir avvalida tuman hokimi Sultonboy Yoʻldashev yoshlarga yaratilayotgan imkoniyat va shart-sharoitlar haqida toʻxtalib, Yoshlar ishlari agentligi, tuman Turizm va sport boʻlimi va boshqa bir qator hamkor tashkilotlar tomonidan loyiha doirasida tumanimizning barcha hududlaridagi minglab yoshlar orasida sport va sogʻlom turmush tarzini ommalashtirish hamda rivojlantirish boʻyicha tadbirlar yuqori saviyada oʻtkazilib kelinayotganligini taʼkidladi.

Shundan soʻng Oʻzbekiston Respublikasi Sportni rivojlantirish vazirligining vakili Bobur Bobomuradov soʻzga chiqib, tumanimizda yoshlarning sportga boʻlgan qiziqishlari qoʻllab-quvvatlanayotganligi eʼtirof etdi. Qolaversa, muhtaram Prezidentimiz tashabbusi bilan mahalladagi yoshlar yetakchisi lavozimining tashkil etilganligi yoshlarga boʻlgan ulkan eʼtibor namunasi ekanligini taʼkidladi hamda barcha yoshlarga sport musobaqalarida omad tiladi.

Maʼlumot uchun aytib oʻtish kerakki, “Besh tashabbus” doirasidagi tadbirlar 11-apreldan boshlandi. Unda 7 yoshdan 30 yoshgacha boʻlgan yoshlar oʻrtasida sportning 9 ta turi, jumladan, futbol, mini-futbol, voleybol, yengil atletika, shaxmat-shashka, stol tennisi, stritbol, vorkaut boʻyicha musobaqalar oʻtkaziladi. Ushbu sport musobaqalari dastlab, mahallalardagi koʻchalar orasida oʻtkazilib, ular orasidan iqtidorli, kuchli va isteʼdodli yoshlar saralanib olinadi. Bu esa yurtimiz bayrogʻini yuksakka koʻtaradigan yoshlarni kashf etishda muhim omil boʻladi.

Darhaqiqat, muhtaram Prezidentimiz tomonidan joriy yil 11-aprel kuni imzolangan “Mahallalarda yoshlarni ommaviy sportga jalb qilishni yangi bosqichga olib chiqish chora-tadbirlari toʻgʻrisida”gi qaror ham ayni shu maqsadlarga xizmat qiladi.

Qarorda keltirilishicha, 2022-yildan boshlab har yili anʼanaviy tarzda 30-iyun – Oʻzbekiston Respublikasi yoshlari kuni hamda dekabr oyida oʻtkaziladigan “Yoshlar forumi” doirasida sportning futbol, mini-futbol, voleybol, yengil atletika, shaxmat, shashka, stol tennisi, stritbol, vorkaut turlari boʻyicha besh bosqichli ommaviy sport musobaqalarini oʻtkazish tizimi joriy etiladi. Musobaqalarning birinchi bosqichi – koʻchalar orasida mahallalarda, ikkinchi bosqichi – sektorlar kesimida mahallalar orasida, uchinchi bosqichi – sektor musobaqalarida gʻolib boʻlgan mahalla jamoalari oʻrtasida tuman miqyosida, toʻrtinchi bosqichi – Qoraqalpogʻiston Respublikasi va viloyatlar miqyosida, beshinchi bosqichi esa Oʻzbekiston miqyosida final musobaqalari shaklida oʻtkaziladi.

Oʻtkazilayotgan sport musobaqalaridan koʻzlangan asosiy maqsad – ertangi kun egalarining qalbida Vatanga muhabbat va sadoqat, milliy gʻurur va iftixor tuygʻularini qaror toptirish, yoshlarimizning buyuk ajdodlarimizga munosib avlod boʻlib voyaga yetishlariga imkoniyat yaratishdir.

Tuman hokimligining Axborot xizmati.