АМУДАРЁ ТУМАНИДА ИНТЕНСИВ БОҒЛАР ЯРАТИЛИБ, ЭРТАГИ САБЗАВОТ ЭКИШ НИҲОЯСИГА ЕТКАЗИЛМОҚДА

Боғдорчилик ва иссиқҳона хўжалигини ривожлантириш мақсадида Амударё туманида махсус лойиҳа офиси ташкил этилган бўлиб, айни пайтда туманда мева-сабзавотчиликни ривожлантириш, боғ, экинлар ҳосилдорлигини ошириш ва сифатини яхшилаш мақсадида Амударё туман боғдорчилик ва иссиқхона агентлиги томонидан бугунги кунга қадар 3 мингдан ортиқ мевали дарахт кўчатлари олиб келинди. Бундан ташқари, интенсив сабзавотчиликни ривожлантириш мақсадида 50 минг донадан ортиқ сабзавот ва полиз кўчатларини олиб келиш  режалаштирилган.

Шунингдек, Амударё тумани бўйича 915 гектар очиқ майдонларга ҳар хил турдаги сабзавот экинлари экиш режалаштирилган бўлиб, бугунги кунда мазкур майдонларда сабзавот уруғларини экиш ишлари қизғин олиб борилмоқда.

Сифатли картошка етиштириш ва ички бозорни маҳаллий картошка маҳсулотлари билан тўлдириш мақсадида тумандаги “Amudaryotex” хорижий корхонаси кластери томонидан 310 гектар майдонга серҳосил навли картошка уруғларини жойлаштириш учун уруғни ўз вақтида етказиб бериш таъминланди.

Жорий деҳқончилик йилида 130 гектар майдонда соя ўсимлигини етиштириш кўзда тутилган. Шу мақсадда тумандаги қишлоқ хўжалик корхоналари томонидан соя экиладиган ер майдонларида барча агротехник тадбирлар муваффақиятли амалга оширилиб, айни кунларда экиш жараёни якунига етказилмоқда.

Туманимиздаги боғдорчилик тармоғига эга қишлоқ хўжалик корхоналари томонидан интенсив боғлар барпо этишга ҳам алоҳида эътибор қаратилмоқда. Янгидан интенсив боғлар бунёд этиш ишлари туман ҳокими Султонбой Йўлдашевнинг шахсий иштироки ва ташаббуси билан амалга оширилаётгани туфайли эрта баҳорданоқ 200 гектар майдонларга турли мевали дарахт кўчатлари, 30 гектар майдонга узум токлари сифатли қилиб экилди.

Айни кунларда туманимиз қишлоқ хўжалиги корхоналари томонидан эртаги сабзавот экинларини экиш ишлари ҳам сифатли якунига етказилмоқда. Хусусан, Амударё тумани ҳокими Султонбой Йўлдашев раҳбарлигидаги 1-сектор ҳудудидаги Чойкўл, Тўлқин, Қипчоқ, Назархон овуллари ҳамда Бекбой Тўқай хўжаликлари ҳудудидаги фермер хўжаликлари тасарруфидаги 56 гектар майдонга картошка, 80 гектар ерга сабзи, 35 гектар пиёз, 38 гектар майдонга соя ўсимлиги экиш режалаштирилган бўлиб, мазкур экинларни экиш ишлари сифатли якунланди. Айни пайтда сектор ҳудудидаги сабзавот экилган майдонларда бир текис униб чиққан ниҳолларни дастлабки парваришлаш, агротехник тадбирларни амалга ошириш ишлари бошлаб юборилди.

Амударё туман прокурори раҳбарлигидаги 2-сектор ҳудудига қарашли Манғит, Амир Темур номли, Йўлдош Ўрозбоев номли, Қиличбой, Туркманистон муқобил машина-трактор парклари хизмат кўрсатувчи қишлоқ хўжалик корхоналари томонидан ҳам эртаги сабзавот экиш режаси 100 фоиз бажарилди. Мазкур ҳудудлардаги 88 та фермер хўжаликларида белгиланган режага кўра, 101 гектар ерга картошка, 68 гектар сабзи, 46 гектар майдонга пиёз ва 29 гектар ерга соя экилиб, бу борадаги режа ортиғи билан адо этилди.

3-сектор ҳудудидаги Бўз ёп, Хитой, Бобур номли ва Оқ олтин овуллари ҳамда Ўзбекистон маҳалласида жами 119 гектар картошка, 109 гектар сабзи, 30 гектар пиёз ва 46 гектар ерга соя экинлари сифатли қилиб экилди.

4-сектор ҳудудидаги Қангли ва Тошёп овуллари ҳамда Намуна маҳалласи ҳудудларида ҳам жорий йилда рўй бераётган сув танқислигига қарамасдан 16 апрель ҳолатига 33,5 гектар ерга картошка экилиб, бу борадаги режа 98,5 фоиз, 21,5 гектар ерга сабзи уруғи экилиб, режа 89,6 фоизни ташкил этмоқда ва мазкур экинларни экиш ишлари жадал суръатларда олиб борилмоқда.

Шунингдек, сектор ҳудудидаги фермер хўжаликларида 27 гектар ерга пиёз, 17 гектар ерга соя ўсимлиги экилиб, бу борадаги режа 100 фоизга адо этилди.

Жорий йилнинг 16 апрель ҳолатига Амударё тумани бўйича жами 308 гектар ерга картошка, 279 гектар сабзи, 138 гектар пиёз ва 130 гектар соя ўсимлиги экилиб, гектарларда бир текис униб чиқаётган сабзавот ниҳолларига дастлабки агротехник ишлов бериш ишлари бошлаб юборилди.

Робия ЙЎЛДОШЕВА.