Ғўза майдонларида агротехник тадбирларнинг сифатли бажарилиши бўйича кўргазмали семинар бўлиб ўтди
Баҳорнинг ҳар бир кунини ғанимат билган деҳқонлар чигит экиш ишларини якунлаб, ғўза парваришини бошлаб юборишди.
22 апрель куни Чойкул овули ҳудудидаги “Чойкўл-Дўстлик” фермер хўжалигида 2022 йилги ҳосил учун чигит экилган майдонларда ғўза қатор ораларига биринчи ишлов бериш учун ташкил этилган культивация отрядларининг фаолиятини самарали йўлга қўйишга бағишланган кўргазмали семинар бўлиб ўтди.
Семинарда Агросаноат мажмуи устидан назорат қилиш инспекцияси Қорақалпоғистон Республикаси бошқармаси бошлиғи Анвар Йўлдашев, туман ҳокими ўринбосари Ислом Маткаримов, “Amudaryotex” масъулияти чекланган жамияти кластери раҳбари Файзулла Саъдуллаев, секторлар раҳбарлари шунингдек, фермер хўжалиги раислари иштирок этди.
Семинар давомида туманда фаолият юритаётган 352 та фермер хўжалиги майдонларида экилган ғўзаларни парваришлаш, ғўза қатор ораларига ишлов бериш, культивация қилиш, чуқур юмшатиш каби муҳим жараёнлар ҳақида батафсил тўхталиб ўтилди.
Маълумот ўрнида айтиш керакки, туманда мавжуд 352 та фермер хўжалиги майдонларининг 13 минг 900 гектар майдонида чигитлар экилган. Айни кунларда чигитлар униб чиққан майдонларда агротехник тадбирлар бошлаб юборилган.
“Чойкўл-Дўстлик” фермер хўжалигида бўлиб ўтган семинарда майдонларда ўқариқларни олиш, сувдан тежамкор фойдаланиш билан боғлиқ чора-тадбирларни бажариш тартиби батафсил тушунтирилди.
Шунингдек ишчиларга, энг аввало, механизаторларга барча шарт-шароитларни яратиш, ойликларини ўз вақтида етказиб бериш зарурлиги алоҳида таъкидланди.
Экилган ғўзаларни парваришлаш вақтида суғориш, бегона ўтлардан ҳимоя қилиш, минерал ўғитлар билан вақтида озиқлантириб бориш яқин ойлар ичида фермер хўжаликлари олдида турган энг муҳим ва долзарб вазифалар экани қайд этилди. Айниқса, уруғчилик хўжаликларида бу масалаларга жиддий эътибор қаратиш лозимлиги таъкидланди. Боиси, келгуси йил пахта ҳосилининг мўл ва сифатли бўлиши бу йил етиштириладиган уруғликнинг соғлом ва талабга жавоб берадиган бўлишига боғлиқ.
Семинарда таъкидланганидек, фермер хўжалиги майдонларида бир текис униб чиққан ғўза ниҳоллари азотли, фосфорли, калийли ўғитлар билан озиқлантирилиб, навларнинг тозалиги ва сифатли ўсиши учун зарур куч ва воситалар тўлиқ йўналтирилган тақдирдагина мўл пахта ҳосили олиш мумкин.
Семинар давомида ғўза парвариши билан бир қаторда, ғаллачилик ва пиллачилик билан боғлиқ масалалар ҳам туман секторлар раҳбарлари ва масъуллар иштирокида муҳокама қилинди ва амалга ошириш лозим бўлган масалалар келишиб олинди.
Туман ҳокимлигининг Ахборот хизмати
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
