Gʻoʻza maydonlarida agrotexnik tadbirlarning sifatli bajarilishi boʻyicha koʻrgazmali seminar boʻlib oʻtdi

Bahorning har bir kunini gʻanimat bilgan dehqonlar chigit ekish ishlarini yakunlab, gʻoʻza parvarishini boshlab yuborishdi.

22-aprel kuni Choykul ovuli hududidagi “Choykoʻl-Doʻstlik” fermer xoʻjaligida 2022-yilgi hosil uchun chigit ekilgan maydonlarda gʻoʻza qator oralariga birinchi ishlov berish uchun tashkil etilgan kultivatsiya otryadlarining faoliyatini samarali yoʻlga qoʻyishga bagʻishlangan koʻrgazmali seminar boʻlib oʻtdi.

Seminarda Agrosanoat majmui ustidan nazorat qilish inspektsiyasi Qoraqalpogʻiston Respublikasi boshqarmasi boshligʻi Anvar Yoʻldashev, tuman hokimi oʻrinbosari Islom Matkarimov, “Amudaryotex” masʼuliyati cheklangan jamiyati klasteri rahbari Fayzulla Saʼdullayev, sektorlar rahbarlari shuningdek, fermer xoʻjaligi raislari ishtirok etdi.

Seminar davomida tumanda faoliyat yuritayotgan 352 ta fermer xoʻjaligi maydonlarida ekilgan gʻoʻzalarni parvarishlash, gʻoʻza qator oralariga ishlov berish, kultivatsiya qilish, chuqur yumshatish kabi muhim jarayonlar haqida batafsil toʻxtalib oʻtildi.

Maʼlumot oʻrnida aytish kerakki, tumanda mavjud 352 ta fermer xoʻjaligi maydonlarining 13 ming 900 gektar maydonida chigitlar ekilgan. Ayni kunlarda chigitlar unib chiqqan maydonlarda agrotexnik tadbirlar boshlab yuborilgan.

“Choykoʻl-Doʻstlik” fermer xoʻjaligida boʻlib oʻtgan seminarda maydonlarda oʻqariqlarni olish, suvdan tejamkor foydalanish bilan bogʻliq chora-tadbirlarni bajarish tartibi batafsil tushuntirildi.

Shuningdek ishchilarga, eng avvalo, mexanizatorlarga barcha shart-sharoitlarni yaratish, oyliklarini oʻz vaqtida yetkazib berish zarurligi alohida taʼkidlandi.

Ekilgan gʻoʻzalarni parvarishlash vaqtida sugʻorish, begona oʻtlardan himoya qilish, mineral oʻgʻitlar bilan vaqtida oziqlantirib borish yaqin oylar ichida fermer xoʻjaliklari oldida turgan eng muhim va dolzarb vazifalar ekani qayd etildi. Ayniqsa, urugʻchilik xoʻjaliklarida bu masalalarga jiddiy eʼtibor qaratish lozimligi taʼkidlandi. Boisi, kelgusi yil paxta hosilining moʻl va sifatli boʻlishi bu yil yetishtiriladigan urugʻlikning sogʻlom va talabga javob beradigan boʻlishiga bogʻliq.

Seminarda taʼkidlanganidek, fermer xoʻjaligi maydonlarida bir tekis unib chiqqan gʻoʻza nihollari azotli, fosforli, kaliyli oʻgʻitlar bilan oziqlantirilib, navlarning tozaligi va sifatli oʻsishi uchun zarur kuch va vositalar toʻliq yoʻnaltirilgan taqdirdagina moʻl paxta hosili olish mumkin.

Seminar davomida gʻoʻza parvarishi bilan bir qatorda, gʻallachilik va pillachilik bilan bogʻliq masalalar ham tuman sektorlar rahbarlari va masʼullar ishtirokida muhokama qilindi va amalga oshirish lozim boʻlgan masalalar kelishib olindi.

Tuman hokimligining Axborot xizmati