69-СОНЛИ МАКТАБДА “ХОТИРА – АЗИЗ, ҚАДР – МУҚАДДАС” ДЕБ НОМЛАНГАН ХОТИРА КЕЧАСИ ЎТКАЗИЛДИ
Мамлакатимиз бўйлаб 9 май – Хотира ва қадрлаш куни муносабати билан турли тадбирлар, учрашувлар ва хотира кечалари ташкил этилмоқда. Байрам арафасида шу азиз Ватан озодлиги учун жонини қурбон қилган мардлар, жасур ўғлонлар ёдга олиниб, уларнинг қаҳрамонликлари ёш авлодга намуна қилиб кўрсатилмоқда.
7 май куни Амударё туманидаги 69-сонли мактабда Хотира ва қадрлаш кунига бағишлаб, “Хотира – азиз, қадр – муқаддас” деб номланган учрашув кечаси ўтказилди. Кечага Аёқчи маҳалласида яшовчи собиқ афғон уруши қатнашчилари Қўзибой Давлетов, Озод Есанов, Ҳайтимбат Жуматовлар таклиф этилди. Шунингдек, мактаб директорининг маънавий-маърифий ишлар бўйича ўринбосари Жўрабек Тажимуродов, тарих фани ўқитувчилардан Роза Жумамуродова, Шарофат Абдураимова, Дилшод Худановлар, бошланғич таълим ўқитувчиси Адиба Аҳмедова, чақирувга қадар бошланғич тайёргарлик фани раҳбари Икром Гулимбетов, мактаб ижодий-маданий масалалар бўйича тарғиботчиси Санамжон Матякубова, ўқитувчилар Маҳбуба Сариева, Хосият Ўрозбоева ҳамда бошқалар иштирок этдилар.
Тадбирни мактаб ўқувчилари Сирож Йўлдошев ҳамда Азиза Озодовалар олиб боришди. Собиқ афғон уруши қатнашчилари ўқувчи-ёшларга уруш хотиралари ҳақида гапириб, бугунги тинч-осойишта кунларимиз учун жонини фидо қилган жасур юртдошларимизнинг муқаддас хотирасини эъзозлаш ва фахрийларимизнинг ҳурматини жойига қўйиш юртимизда эзгу анъанага айланганини айтиб ўтишди. Суҳбат давомида уруш хотираларидан сўзлаб бериб, бугунги дориламон кунларни қадрлашни насиҳат қилдилар. Шу билан бирга йиғилганларга дунё халқлари бошига мусибат солган машъум Иккинчи жаҳон уруши, ўша оғир кунларни матонат билан енгиб ўтган ота-боболаримизнинг енгилмас иродаси, чексиз матонати ҳақида гапириб ўтдилар.
Таъкидланганидек, мамлакатимизда 9 май умумхалқ байрами – Хотира ва қадрлаш куни сифатида кенг нишонланади. Иккинчи жаҳон урушида фашизм устидан қозонилган ғалабага муносиб ҳисса қўшган, мустақиллик йилларида хизмат бурчини бажариш чоғида ҳалок бўлган ҳарбий хизматчилар ва ҳуқуқни муҳофаза қилувчи органлар ходимларининг хотирасини абадийлаштириш, орамиздаги барча фахрийларга ҳурмат-эҳтиром кўрсатиш борасида ҳар йили муайян ишлар амалга ошириляпти. Умуман, Хотира ва қадрлаш куни чинакам миллий – умумхалқ байрамимизга айланди.
Хотира кечасида мактаб ўқитувчилари ҳам Иккинчи жаҳон урушида Ўзбекистоннинг ғалабага қўшган ҳиссаси, Ўзбекистондан фронтга жўнаб кетган ўғлонларнинг жасорати, юртдошларимизнинг фронт ортидаги матонатли ва фидокорона меҳнати, Ўзбекистонга эвакуация қилинган гўдаклар, оналар, қариялар, беморларга кўрсатилган меҳр-мурувват, саховат, бағрикенглик ҳақида қизиқарли тарихий ҳикоялар айтиб бердилар.
Тадбир давомида мактаб ўқувчилари тинчлик, Ватан ҳақида шеърлар, қўшиқлар, шўх рақслар ижро этиб, йиғилганларга хуш кайфият бахш этдилар.
Озода Худойберганова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
