«УСТОЗНИ ЭСЛАБ» НОМЛИ ХОТИРА ТАДБИРИ ЎТКАЗИЛДИ

Ўзбекистондагина эмас, Туркманистон, Тожикистон, Қирғизистон давлатларида ҳам ўзининг соҳир овози билан куйлаган қўшиқлари, халқ достонлари билан машҳур бўлган Назир қори Наҳимов қисқагина, 47 йил умр кўрган бўлса-да ўзидан асрларга тотугулик маънавий мерос қолдирди.

У 1930 йилда Хоразм вилоятининг Манғит туманида туғилган. У дунёга табиатан кўзи ожиз бўлиб келган бўлса-да, Яратган беназир қобилият ҳамда олийжаноблик, одамийлик хислатлари билан сийлаган эди. Шу боисдан кўзи ожизлар мактабида таҳсил олиш билан бирга 10 ёшидан бошлаб соз чалиб, ашулалар ижро қилган.

Уни қобилиятли дейиш камлик қилар эди. Чунки Назир Раҳимов Амударё санъатининг дарғаси, ноёб, бетакрор овоз соҳиби, ашулабоп шеърлар муаллифи, ўз шеърларига ўзи мусиқа басталаб, элга ином этган серқирра ижодкор эди, у ашула сўзига мос чолғу турида дилларни забт эта оладиган ўлмас оҳанглар ярата олган, ижро қилган эди. Юртдошларимиз бу ашулаларни ҳамон унутмай, аудио тасмалар орқали тинглаб, ҳокисор ижрочисини ҳурмат-эҳтиром билан  хотираларида сақлаб келади.

Шу йилнинг 6 май куни туман Маданият бўлими томошалар залида серқирра ижодкор, Қорақалпоғистонда хизмат кўрсатган артист Назир Раҳимов хотирасига бағишлаб “Устозни эслаб” деб номланган бадиий кеча ўтказилди.

Тадбирга Назир Раҳимовнинг шогирдлари, санъат шинавандалари, маҳаллалар фаолларидан ташқари қўшни туман ва вилоятлардан ҳам мухлислари, ижодий ҳамкорлик қилган санъаткорлар иштирок этдилар.

Тадбирни сухандан Ойбек Бегимов бошқариб борди. У дастлаб Назир қори Раҳимов ҳаёти ва ижодий фаолияти хусусида гапирди ва устоз санъаткорнинг йўлини давом эттираётган фарзандлари, неваралари ижодига ҳам тўхталди.

Тадбирда сўзга чиққан Назир Раҳимовнинг мухлисларидан бири, таълим  фахрийси Солий Собиров, элликқалъалик санъаткор Ҳожибой Сатликов, қизи Сайёра Абдураҳмоновалар у ҳақдаги хотираларидан сўзлаб бердилар.

Навбат Назир Раҳимовга ҳавас қилиб қўлига тор олган, унинг қўшиқларини айтиб санъатга кириб келган туманимизнинг иқтидорли ўғлони Баҳодир Ражабовга берилди. У мамлакатимизнинг барча  ҳудудлари санъат шинавандалари Назир Раҳимов ижросида севиб тинглаб, кўнгилларига муҳрланиб қолган “Кийик” қиссасидан парча ижро қилди.

Шунингдек, Тўлибой Йўлдошев, Анвар Худойберганов, Муроджон Ибрагимов, Музаффар Исмоилов, Зоҳидхон Нуримбетов, Ўмирбек Тўраевлар устоз санъаткор ижро этган қўшиқларни томошабинлар эътиборига тақдим этдилар.

Шуни эътироф этиш керакки, Назир Раҳимов ижро этган қўшиқлар ўзига хос оҳангдорлиги, сўзлари маънолилиги ва киши қалбининг нозик торларини черта олиши, энг покиза таассуротлар уйғота олиши билан киши хотирасида мустаҳкам ўрнашиб қолар эди. Унинг қўшиқларини ёш-у кекса барча севиб тинглаши, ўзича хиргойи қилишга ҳаракат қилиши ҳам шундандир, балки?

Қувонч билан айтиш мумкинки, Назир Раҳимов қўшиқларининг ёш шинавандалари, уларни ижро этишга  иштиёқмандлари ҳам кўп.

Тадбирда Қиличбой Маданият маркази ашула тўгараги иштирокчилари, 9-сонли Болалар мусиқа ва санъат мактаби ўқувчилари ижросида устоз снъаткор яратган қўшиқларни тинглаганларнинг кўзларига ёш қалқди. Бу Назир Раҳимов қўшиқлари ҳозирги ёшлар кўнглини ҳам забт этаётганини кўрсатади. Демак у ўзининг улкан маънавий мероси билан доимо барҳаёт! Санъат, санъат шинавандалари бор экан, демак Назир Раҳимов номи яшайверади!

Ойгул РАЖАБОВА.