«USTOZNI ESLAB» NOMLI XOTIRA TADBIRI OʻTKAZILDI

Oʻzbekistondagina emas, Turkmaniston, Tojikiston, Qirgʻiziston davlatlarida ham oʻzining sohir ovozi bilan kuylagan qoʻshiqlari, xalq dostonlari bilan mashhur boʻlgan Nazir qori Nahimov qisqagina, 47-yil umr koʻrgan boʻlsa-da oʻzidan asrlarga totugulik maʼnaviy meros qoldirdi.

U 1930-yilda Xorazm viloyatining Mangʻit tumanida tugʻilgan. U dunyoga tabiatan koʻzi ojiz boʻlib kelgan boʻlsa-da, Yaratgan benazir qobiliyat hamda oliyjanoblik, odamiylik xislatlari bilan siylagan edi. Shu boisdan koʻzi ojizlar maktabida tahsil olish bilan birga 10 yoshidan boshlab soz chalib, ashulalar ijro qilgan.

Uni qobiliyatli deyish kamlik qilar edi. Chunki Nazir Rahimov Amudaryo sanʼatining dargʻasi, noyob, betakror ovoz sohibi, ashulabop sheʼrlar muallifi, oʻz sheʼrlariga oʻzi musiqa bastalab, elga inom etgan serqirra ijodkor edi, u ashula soʻziga mos cholgʻu turida dillarni zabt eta oladigan oʻlmas ohanglar yarata olgan, ijro qilgan edi. Yurtdoshlarimiz bu ashulalarni hamon unutmay, audio tasmalar orqali tinglab, hokisor ijrochisini hurmat-ehtirom bilan  xotiralarida saqlab keladi.

Shu yilning 6-may kuni tuman Madaniyat boʻlimi tomoshalar zalida serqirra ijodkor, Qoraqalpogʻistonda xizmat koʻrsatgan artist Nazir Rahimov xotirasiga bagʻishlab “Ustozni eslab” deb nomlangan badiiy kecha oʻtkazildi.

Tadbirga Nazir Rahimovning shogirdlari, sanʼat shinavandalari, mahallalar faollaridan tashqari qoʻshni tuman va viloyatlardan ham muxlislari, ijodiy hamkorlik qilgan sanʼatkorlar ishtirok etdilar.

Tadbirni suxandan Oybek Begimov boshqarib bordi. U dastlab Nazir qori Rahimov hayoti va ijodiy faoliyati xususida gapirdi va ustoz sanʼatkorning yoʻlini davom ettirayotgan farzandlari, nevaralari ijodiga ham toʻxtaldi.

Tadbirda soʻzga chiqqan Nazir Rahimovning muxlislaridan biri, taʼlim  faxriysi Soliy Sobirov, ellikqalʼalik sanʼatkor Hojiboy Satlikov, qizi Sayyora Abdurahmonovalar u haqdagi xotiralaridan soʻzlab berdilar.

Navbat Nazir Rahimovga havas qilib qoʻliga tor olgan, uning qoʻshiqlarini aytib sanʼatga kirib kelgan tumanimizning iqtidorli oʻgʻloni Bahodir Rajabovga berildi. U mamlakatimizning barcha  hududlari sanʼat shinavandalari Nazir Rahimov ijrosida sevib tinglab, koʻngillariga muhrlanib qolgan “Kiyik” qissasidan parcha ijro qildi.

Shuningdek, Toʻliboy Yoʻldoshev, Anvar Xudoyberganov, Murodjon Ibragimov, Muzaffar Ismoilov, Zohidxon Nurimbetov, Oʻmirbek Toʻrayevlar ustoz sanʼatkor ijro etgan qoʻshiqlarni tomoshabinlar eʼtiboriga taqdim etdilar.

Shuni eʼtirof etish kerakki, Nazir Rahimov ijro etgan qoʻshiqlar oʻziga xos ohangdorligi, soʻzlari maʼnoliligi va kishi qalbining nozik torlarini cherta olishi, eng pokiza taassurotlar uygʻota olishi bilan kishi xotirasida mustahkam oʻrnashib qolar edi. Uning qoʻshiqlarini yosh-u keksa barcha sevib tinglashi, oʻzicha xirgoyi qilishga harakat qilishi ham shundandir, balki?

Quvonch bilan aytish mumkinki, Nazir Rahimov qoʻshiqlarining yosh shinavandalari, ularni ijro etishga  ishtiyoqmandlari ham koʻp.

Tadbirda Qilichboy Madaniyat markazi ashula toʻgaragi ishtirokchilari, 9-sonli Bolalar musiqa va sanʼat maktabi oʻquvchilari ijrosida ustoz snʼatkor yaratgan qoʻshiqlarni tinglaganlarning koʻzlariga yosh qalqdi. Bu Nazir Rahimov qoʻshiqlari hozirgi yoshlar koʻnglini ham zabt etayotganini koʻrsatadi. Demak u oʻzining ulkan maʼnaviy merosi bilan doimo barhayot! Sanʼat, sanʼat shinavandalari bor ekan, demak Nazir Rahimov nomi yashayveradi!

Oygul RAJABOVA.