ФУҚАРОЛАР ЙИҒИНИ РАИСИ САЙЛОВИГА ДОИР ЎҚУВ СЕМИНАРИ ЎТКАЗИЛДИ

Айни кунларда мамлакатимизнинг барча ҳудудларида бўлгани каби Амударё туманида ҳам жорий йилнинг май ойида ўтказиладиган фуқаролар йиғинлари раислари сайловини ташкил этиш ва ўтказишга доир ишлар қизғин паллага кирди.

Маҳалла институти ўзини ўзи бошқариш органи сифатида маълум бир ҳудудда ижтимоий-сиёсий, маданий, диний ва бошқа соҳаларда мустақил иш олиб борувчи ижтимоий тузилмадир. Тизимда айниқса, сўнгги икки-уч йил  ичида катта ўзгаришлар юз берди, раисларнинг халқ ҳаётига шунчаки томошабин бўлиб, идорада ўтириб ишлаб ойлик оладиган вақти ўтди. Эндиликда  овул, маҳалла, шаҳарчадаги муаммоларни, халқ ҳаётидаги камчиликларни маҳалланинг ўзида ҳал этиш даври келди.

Одамларнинг оддий мурожаатлар учун ҳам ҳокимлик ва бошқа идораларга қатнаб овора  бўлишига чек қўйилмоқда. Бунинг учун элига фидойи, ишчан, ўз хизмат лавозимида сидқидилдан ишлашга шай инсонлар ўзини ўзи бошқариш органлари раислигига сайланмоғи  керак.

Шу боисдан ҳам туманимизда сайловга тайёргарлик ишларига масъулият билан қаралиб, эларо обрў-эътиборли, билимли, одамлар ҳаётидаги муаммоларни дадил кўтариб чиқиб, ижобий ҳал қилишга ҳаракат қиладиган ташаббускор инсонлар номзодлари танлаб олинишига алоҳида эътибор қаратилди.

Сайловни шаффоф, адолатли тарзда ўтказиш бўйича турли тарғибот тадбирлари ташкил этилмоқда. Хусусан, жорий йил 12 май куни тумандаги фуқаролар йиғини раиси сайловини ўтказувчи 49 та ишчи гуруҳлар учун ташкил этилган ўқув семинар ҳам шу мақсадга қаратилди.

Ўқув семинарда Ўзбекистон Республикаси Маҳалла ва нуронийларни қўллаб-қувватлаш вазирлигининг вакили Мурод Нигматов, Қорақалпоғистон Республикаси Маҳалла ва нуронийларни қўллаб-қувватлаш вазири Сағиндиқ Турманов, сайловни ташкил қилиш ва ўтказишга кўмаклашувчи туман комиссияси таркиби ва туманнинг 49 та маҳаллаларидаги ишчи гуруҳлари раҳбарлари, уларнинг ўринбосарлари ва котиблари, умумий ҳисобда жами 166 нафар иштирокчи қатнашишди.

Маълумки, маҳаллалардаги ишчи гуруҳлар сайловчиларга энг яқин бўғин ҳисобланади. Сайлов пайтида ошкораликни таъминлаш, энг муносиб номзодларни қўллаб-қувватлаш учун адолатли сайлов муҳитини яратиш, ишчи гуруҳ аъзоларининг сайлов қонунчилиги борасидаги ҳуқуқий билимларини ошириш, фидойи инсонларнинг фуқаролар йиғини раиси этиб сайланишига сабаб бўлиши шубҳасиздир.

Семинар иштирокчиларига Ўзбекистон Республикасининг “Фуқаролар йиғини раиси сайлови тўғрисида”ги Қонуни билан белгиланган Фуқаролар йиғинлари раислари сайловини   ташкил этиш ва ўтказиш билан боғлиқ норматив ҳужжатлар яна бир бор тўлиқ таништирилди. 

Ишчи гуруҳларга сайловни ўтказишдаги эътибор қаратиш лозим бўлган жиҳатлар,  қонунчилик бўйича тавсиялар берилди ҳамда намунали сайлов амалиётда қандай ўтказилиши кўрсатилди.

Шунингдек фуқароларнинг ўзини ўзи бошқариш органлари раислари сайловини намунали ташкил этиш, сайловнинг демократик асосда, шаффоф тарзда ўтказилишини таъминлаш борасида муҳим маслаҳатлар берилди.

Фуқаролар йиғини раислигига эл дарди билан яшайдиган, маҳалланинг катта-ю кичиги ҳурмат қиладиган, одамлар ташвишига елка тутишга қодир салоҳиятли инсонлар сайланиши фуқаролар танловига боғлиқ эканлиги таъкидланди.

Ойгул РАЖАБОВА.