FUQAROLAR YIGʻINI RAISI SAYLOVIGA DOIR OʻQUV SEMINARI OʻTKAZILDI

Ayni kunlarda mamlakatimizning barcha hududlarida boʻlgani kabi Amudaryo tumanida ham joriy yilning may oyida oʻtkaziladigan fuqarolar yigʻinlari raislari saylovini tashkil etish va oʻtkazishga doir ishlar qizgʻin pallaga kirdi.

Mahalla instituti oʻzini oʻzi boshqarish organi sifatida maʼlum bir hududda ijtimoiy-siyosiy, madaniy, diniy va boshqa sohalarda mustaqil ish olib boruvchi ijtimoiy tuzilmadir. Tizimda ayniqsa, soʻnggi ikki-uch yil  ichida katta oʻzgarishlar yuz berdi, raislarning xalq hayotiga shunchaki tomoshabin boʻlib, idorada oʻtirib ishlab oylik oladigan vaqti oʻtdi. Endilikda  ovul, mahalla, shaharchadagi muammolarni, xalq hayotidagi kamchiliklarni mahallaning oʻzida hal etish davri keldi.

Odamlarning oddiy murojaatlar uchun ham hokimlik va boshqa idoralarga qatnab ovora  boʻlishiga chek qoʻyilmoqda. Buning uchun eliga fidoyi, ishchan, oʻz xizmat lavozimida sidqidildan ishlashga shay insonlar oʻzini oʻzi boshqarish organlari raisligiga saylanmogʻi  kerak.

Shu boisdan ham tumanimizda saylovga tayyorgarlik ishlariga masʼuliyat bilan qaralib, elaro obroʻ-eʼtiborli, bilimli, odamlar hayotidagi muammolarni dadil koʻtarib chiqib, ijobiy hal qilishga harakat qiladigan tashabbuskor insonlar nomzodlari tanlab olinishiga alohida eʼtibor qaratildi.

Saylovni shaffof, adolatli tarzda oʻtkazish boʻyicha turli targʻibot tadbirlari tashkil etilmoqda. Xususan, joriy yil 12-may kuni tumandagi fuqarolar yigʻini raisi saylovini oʻtkazuvchi 49 ta ishchi guruhlar uchun tashkil etilgan oʻquv seminar ham shu maqsadga qaratildi.

Oʻquv seminarda Oʻzbekiston Respublikasi Mahalla va nuroniylarni qoʻllab-quvvatlash vazirligining vakili Murod Nigmatov, Qoraqalpogʻiston Respublikasi Mahalla va nuroniylarni qoʻllab-quvvatlash vaziri Sagʻindiq Turmanov, saylovni tashkil qilish va oʻtkazishga koʻmaklashuvchi tuman komissiyasi tarkibi va tumanning 49 ta mahallalaridagi ishchi guruhlari rahbarlari, ularning oʻrinbosarlari va kotiblari, umumiy hisobda jami 166 nafar ishtirokchi qatnashishdi.

Maʼlumki, mahallalardagi ishchi guruhlar saylovchilarga eng yaqin boʻgʻin hisoblanadi. Saylov paytida oshkoralikni taʼminlash, eng munosib nomzodlarni qoʻllab-quvvatlash uchun adolatli saylov muhitini yaratish, ishchi guruh aʼzolarining saylov qonunchiligi borasidagi huquqiy bilimlarini oshirish, fidoyi insonlarning fuqarolar yigʻini raisi etib saylanishiga sabab boʻlishi shubhasizdir.

Seminar ishtirokchilariga Oʻzbekiston Respublikasining “Fuqarolar yigʻini raisi saylovi toʻgʻrisida”gi Qonuni bilan belgilangan Fuqarolar yigʻinlari raislari saylovini   tashkil etish va oʻtkazish bilan bogʻliq normativ hujjatlar yana bir bor toʻliq tanishtirildi. 

Ishchi guruhlarga saylovni oʻtkazishdagi eʼtibor qaratish lozim boʻlgan jihatlar,  qonunchilik boʻyicha tavsiyalar berildi hamda namunali saylov amaliyotda qanday oʻtkazilishi koʻrsatildi.

Shuningdek fuqarolarning oʻzini oʻzi boshqarish organlari raislari saylovini namunali tashkil etish, saylovning demokratik asosda, shaffof tarzda oʻtkazilishini taʼminlash borasida muhim maslahatlar berildi.

Fuqarolar yigʻini raisligiga el dardi bilan yashaydigan, mahallaning katta-yu kichigi hurmat qiladigan, odamlar tashvishiga yelka tutishga qodir salohiyatli insonlar saylanishi fuqarolar tanloviga bogʻliq ekanligi taʼkidlandi.

Oygul RAJABOVA.