НАВОИЙ НОМЛИ МАҲАЛЛАДА СОҒЛОМ ТУРМУШ ТАРЗИНИ ТАРҒИБ ҚИЛИШ БЎЙИЧА ТАДБИР ЎТКАЗИЛДИ

Жаҳон соғлиқни сақлаш ташкилоти маълумотларига кўра, ҳозирги кунда дунё мамлакатларида ўлим ва ногиронликка сабаб бўлувчи 4 та асосий юқумсиз касалликни аниқлаган. Булар - юрак-қон томир касалликлари, диабет, саратон касалликларидир. Сурункали касалликларнинг ортиши инсонлар орасида эрта ўлимга олиб келмоқда. Мамлакатимизда ҳам мазкур масалага давлат сиёсати даражасида эътибор қаратилиб, аҳоли ўртасида соғлом турмуш тарзини шакллантириш, уларга сифатли тиббий ва ижтимоий-тиббий хизмат кўрсатиш, оила саломатлигини асраш ва мустаҳкамлаш борасида муайян ишлар олиб борилмоқда.

14 май куни Навоий номли маҳалла фуқаролар йиғини биносида туман Тиббиёт бирлашмаси саломатлик  маркази  бўлими шифокорлари, фуқаролар йиғини масъуллари, спорт  тарғиботчиси ҳамда “Тараққиёт кўзгуси” газетаси мухбири Ойгул Ражабова иштирокида соғлом турмуш тарзи, жисмоний фаоллик, соғлом овқатланиш ва зарарли одатлардан сақланиш  ҳамда оилаларда тиббий маданиятни юксалтиришга қаратилган тарғибот тадбири  ўтказилди.

Тадбирда иштирок этган шифокорлар Жумабой Явкашев, Матёқуб Эрназаров, Тамара Саидова, Раъно Тажибоева, Ибодулла Нуримбетовлар халқимизнинг соғлом турмуш тарзига, хусусан, миллатимиз тақдирига дахлдор долзарб масалалар юзасидан мамлакатимизда зарур чоралар кўрилиб, ушбу соҳадаги вазифаларни ҳаётга татбиқ этишнинг мустаҳкам ҳуқуқий ва ташкилий механизмлари яратилганлигини таъкидлаб ўтишди. Президентимизнинг “Аҳолининг соғлом овқатланишини таъминлаш бўйича қўшимча-чора тадбирлари” Қарорига кўра ҳозирги кунда 6-23 ойлик болалар учун уй шароитида тайёрланган овқатларни бойитиш мақсадида микронутриент кукуни билан, 6 ойликдан 5 ёшгача бўлган болалар A витамини билан, 2-10 ёшдаги болалар гельминтоз профилактикаси бўйича махсус препаратлар билан, ҳомиладор ва бола эмизувчи аёллар ҳамда 3-15 ёшдаги болалар йод препарати билан, 35 ёшгача туғиш ёшидаги аёллар темир ва фолий кислотаси препарати билан бепул таъминланаётгани айтиб ўтилди.

Ундан ташқари, 18 ёшдан 64 ёшгача бўлган айрим фуқаролар орасида  жисмоний фаолликнинг камлиги, тамаки ва спиртли ичимликларни истеъмол қилиши ва соғлом турмуш тарзига риоя қилмаслик натижасида кўплаб сурункали касалликлар сони ортаётгани, катта ёшдаги аҳолининг аксарияти ортиқча вазндан, қон босими ошишидан азият чекаётгани, бу эса, ўз навбатида, қандли диабет, юрак-қон томир касалликлари, бош мия қон айланиши фаолиятининг бузилиши, бўғин касалликлари ва бошқа бир қанча хасталикларнинг ривожланишига олиб келаётгани хусусида сўз юритилди. Бундай ҳолатларнинг олдини олиш учун ҳар бир инсон соғлом турмуш тарзига мунтазам равишда амал қилиши кераклиги, зарарли одатлардан воз кечиши лозимлиги таъкидланди.

Тадбир сўнггида  Тиббиёт бирлашмаси ҳовлисида нафас гимнастика ва эрталабки бадантарбия машғулотларнинг инсон органзмига ижобий таъсири тўғрисида тушунчалар берилди. Шунингдек,  тиббиёт ходимлари ва маҳалла фуқаролари иштирокида нафас гимнастикаси ва бадантарбия машғулотлари амалий тарзда ўтказилди.

Ж. Явкашев, Тиббиёт бирлашмаси саломатлик маркази шифокори.