NAVOIY NOMLI MAHALLADA SOGʻLOM TURMUSh TARZINI TARGʻIB QILISh BOʻYIChA TADBIR OʻTKAZILDI

Jahon sogʻliqni saqlash tashkiloti maʼlumotlariga koʻra, hozirgi kunda dunyo mamlakatlarida oʻlim va nogironlikka sabab boʻluvchi 4 ta asosiy yuqumsiz kasallikni aniqlagan. Bular - yurak-qon tomir kasalliklari, diabet, saraton kasalliklaridir. Surunkali kasalliklarning ortishi insonlar orasida erta oʻlimga olib kelmoqda. Mamlakatimizda ham mazkur masalaga davlat siyosati darajasida eʼtibor qaratilib, aholi oʻrtasida sogʻlom turmush tarzini shakllantirish, ularga sifatli tibbiy va ijtimoiy-tibbiy xizmat koʻrsatish, oila salomatligini asrash va mustahkamlash borasida muayyan ishlar olib borilmoqda.

14-may kuni Navoiy nomli mahalla fuqarolar yigʻini binosida tuman Tibbiyot birlashmasi salomatlik  markazi  boʻlimi shifokorlari, fuqarolar yigʻini masʼullari, sport  targʻibotchisi hamda “Taraqqiyot koʻzgusi” gazetasi muxbiri Oygul Rajabova ishtirokida sogʻlom turmush tarzi, jismoniy faollik, sogʻlom ovqatlanish va zararli odatlardan saqlanish  hamda oilalarda tibbiy madaniyatni yuksaltirishga qaratilgan targʻibot tadbiri  oʻtkazildi.

Tadbirda ishtirok etgan shifokorlar Jumaboy Yavkashev, Matyoqub Ernazarov, Tamara Saidova, Raʼno Tajiboyeva, Ibodulla Nurimbetovlar xalqimizning sogʻlom turmush tarziga, xususan, millatimiz taqdiriga daxldor dolzarb masalalar yuzasidan mamlakatimizda zarur choralar koʻrilib, ushbu sohadagi vazifalarni hayotga tatbiq etishning mustahkam huquqiy va tashkiliy mexanizmlari yaratilganligini taʼkidlab oʻtishdi. Prezidentimizning “Aholining sogʻlom ovqatlanishini taʼminlash boʻyicha qoʻshimcha-chora tadbirlari” Qaroriga koʻra hozirgi kunda 6-23 oylik bolalar uchun uy sharoitida tayyorlangan ovqatlarni boyitish maqsadida mikronutriyent kukuni bilan, 6 oylikdan 5 yoshgacha boʻlgan bolalar A vitamini bilan, 2-10 yoshdagi bolalar gelmintoz profilaktikasi boʻyicha maxsus preparatlar bilan, homilador va bola emizuvchi ayollar hamda 3-15 yoshdagi bolalar yod preparati bilan, 35 yoshgacha tugʻish yoshidagi ayollar temir va foliy kislotasi preparati bilan bepul taʼminlanayotgani aytib oʻtildi.

Undan tashqari, 18 yoshdan 64 yoshgacha boʻlgan ayrim fuqarolar orasida  jismoniy faollikning kamligi, tamaki va spirtli ichimliklarni isteʼmol qilishi va sogʻlom turmush tarziga rioya qilmaslik natijasida koʻplab surunkali kasalliklar soni ortayotgani, katta yoshdagi aholining aksariyati ortiqcha vazndan, qon bosimi oshishidan aziyat chekayotgani, bu esa, oʻz navbatida, qandli diabet, yurak-qon tomir kasalliklari, bosh miya qon aylanishi faoliyatining buzilishi, boʻgʻin kasalliklari va boshqa bir qancha xastaliklarning rivojlanishiga olib kelayotgani xususida soʻz yuritildi. Bunday holatlarning oldini olish uchun har bir inson sogʻlom turmush tarziga muntazam ravishda amal qilishi kerakligi, zararli odatlardan voz kechishi lozimligi taʼkidlandi.

Tadbir soʻnggida  Tibbiyot birlashmasi hovlisida nafas gimnastika va ertalabki badantarbiya mashgʻulotlarning inson organzmiga ijobiy taʼsiri toʻgʻrisida tushunchalar berildi. Shuningdek,  tibbiyot xodimlari va mahalla fuqarolari ishtirokida nafas gimnastikasi va badantarbiya mashgʻulotlari amaliy tarzda oʻtkazildi.

J. Yavkashev, Tibbiyot birlashmasi salomatlik markazi shifokori.